Limle 31 - Fulfulde Bible

Konu bee Mediyan'en

¹ Jawmiraawo wi'i Muusa:

² “Waata Mediyan'en ngam halleende nde ɓe mbaɗi Isra'iila'en. Ɓaawo man a hawtoyan bee yimɓe ummaatoore ma.”

³ Muusa wi'i ummaatoore: “Taaskitine jama'aare konu haa nde waato Mediyan'en, nde waŋgina kiita Jawmiraawo dow maɓɓe.

⁴ Nele worɓe ujineere nder lenyol Isra'iila koo ngole, taaskaniiɓe konu.”

⁵ Ɓe cuɓi worɓe ujineere ujineere nder le'i fuu, waato ujine sappo e ɗiɗo (12.000), taaskaniiɓe konu.

⁶ Muusa neli ɓe haɓugo, kamɓe e Pinehas ɓii Eli'azaaru, limanjo kalfitinaaɗo kuuje ceniiɗe e luwe maatinirɗe.

⁷ Ɓe kaɓi bee Mediyan'en, bana Jawmiraawo umruno Muusa. Ɓe mbari worɓe fuu.

⁸ Ɓe mbari laamiiɓe Mediyan njowo bee kaafahi: Ewi, Rekem, Cuuru, Huuru e Reeba, non boo Balaama ɓii Be'or.

⁹ Isra'iila'en naŋngi rewɓe Mediyan'en e ɓikkoy maɓɓe, kooci dabbaaji maɓɓe e jawdi maɓɓe fuu.

¹⁰ Ɓe nguli berniiji e caŋngeeje Mediyan'en fuu.

¹¹ Nden ɓe adi keɓal konu e naŋngaaɓe e dabbaaji,

¹² ɓe njahri ɗum haa Muusa e Eli'azaaru limanjo e jama'aare Isra'iila, haa saŋngeere nder laɗɗe Mo'ab baŋnge maayo Urdun, haa fuunaaŋge Yeriko.

¹³ Muusa e Eli'azaaru e ardiiɓe jama'aare fuu ngurti saŋngeere ngam potta bee maɓɓe.

¹⁴ Muusa tikkani mawɓe konu, waato hoore'en dow ujineere e hoore'en dow teemerre, wartuɓe haɓre.

¹⁵ O wi'i ɓe: “Koni accuɗon rewɓe fuu bee yoŋki?

¹⁶ Kamɓe ɓen tokki sawari Balaama, esti Isra'iila'en haa ɓe zammbi Jawmiraawo bee haala Pe'or. Kanjum fooɗani jama'aare Jawmiraawo masiibo.

¹⁷ Ngam maajum mbare ɓikkoy ngorkoy e rewɓe meeɗɓe gorko fuu.

¹⁸ Sey ɓikkoy ndehoy koy meeɗaay gorko tawon, kaŋkoy tan accoton bee yoŋki haa maron koy.

¹⁹ Ammaa koo moy mooɗon mbari goɗɗo malla meemi maayɗo, sey reena yaasi saŋngeere nyalɗe joweeɗiɗi. Nyannde tataɓre e nyannde joweeɗiɗaɓre, laɓɓine ko'e mon, onon e naŋngaaɓe mon.

²⁰ Laɓɓine boo limce mon e kuuje kuuwraaɗe bee laral e gaasa be'i e leggal fuu.”

²¹ Eli'azaaru limanjo wi'i honooɓe wartuɓe haɓre: “Ndaa farilla ka Jawmiraawo hokki Muusa:

^22-23 Ko yiite nyaamataa fuu, bana kaŋŋeeri e cardi e njamndi mboɗeeri e ɓaleeri e jamɗe goɗɗe fuu, nastine ɗum nder yiite, ammaa ɗum ndiyam ittirɗam coɓki tan laɓɓinta ɗum. Ko yiite nyaamata ɗum fuu boo, laɓɓine ɗum bee ndiyam.

²⁴ Nyannde joweeɗiɗaɓre loote limce mon, ngam haa on laaɓa, ɓaawoɗon naste saŋngeere.”

Cennduki keɓal konu

²⁵ Jawmiraawo wi'i Muusa:

²⁶ “An e Eli'azaaru limanjo e baaba-ci'e'en nder jama'aare, sey on lima keɓal konu, yimɓe e dabbaaji fuu.

²⁷ Cennde ɗum geɓe ɗiɗi, yeɓre woore ngam waɗɓe konu, yeɓre woore boo ngam yeɓre jama'aare luttunde.

²⁸ Haa yeɓre waɗɓe konu, ittaneeɗam geɗal am waato marɗum yoŋki gootel nder teemeɗɗe jowi, haa yimɓe e na'i e bamɗe e baali e be'i.

²⁹ Hoo'u ɗum nder keɓal maɓɓe, hokku ɗum Eli'azaaru limanjo, ɗum dokkal ittaaŋgal ngam am.

³⁰ Haa keɓal Isra'iila'en luttuɓe boo, wurtin marɗum yoŋki gootel nder cappanɗe jowi, haa yimɓe e na'i e bamɗe e baali e be'i. Hokku ɗum Lewi'en huuwooɓe haa jooɗorde am.”

³¹ Muusa e Eli'azaaru limanjo mbaɗi ko Jawmiraawo umri Muusa.

³² Ndaa ko lutti nder ko honooɓe koo'uno: Baali e be'i ujine teemeɗɗe joweego e cappanɗe joweeɗiɗi e jowi (675.000),

³³ na'i ujine cappanɗe joweeɗiɗi e ɗiɗi (72.000),

³⁴ bamɗe ujine cappanɗe joweego e go'o (61.000)

³⁵ e faanyɓe rewɓe ujine cappanɗe tato e ɗiɗo (32.000) ɓe meeɗaay gorko tawon.

³⁶ Waɗɓe konu keɓi reeta maajum, waato baali e be'i ujine teemeɗɗe tati e cappanɗe tati e joweeɗiɗi e teemeɗɗe jowi (337.500),

³⁷ teemeɗɗe joweego e cappanɗe joweeɗiɗi e jowi (675) nder maaji ittanaama Jawmiraawo,

³⁸ na'i ujine cappanɗe tati e joweego (36.000), cappanɗe joweeɗiɗi e ɗiɗi (72) nder maaji ittanaama Jawmiraawo,

³⁹ bamɗe ujine cappanɗe tati e teemeɗɗe jowi (30.500), cappanɗe joweego e go'o (61) nder maaji ittanaama Jawmiraawo

⁴⁰ e faanyɓe rewɓe ujine sappo e njoweego (16.000), cappanɗe tato e ɗiɗo (32) nder maɓɓe koocaama ngam Jawmiraawo.

⁴¹ Muusa hokki ɗum Eli'azaaru, ɗum dokkal ittaaŋgal ngam Jawmiraawo, bana Jawmiraawo umruno mo.

^42-46 Jama'aare boo heɓi yeɓre reeta luttunde, waato baali e be'i ujine teemeɗɗe tati e cappanɗe tati e joweeɗiɗi e teemeɗɗe jowi (337.500), na'i ujine cappanɗe tati e joweego (36.000), bamɗe ujine cappanɗe tati e teemeɗɗe jowi (30.500), faanyɓe rewɓe ujine sappo e njoweego (16.000).

⁴⁷ Muusa wurtini boo gootel nder cappanɗe jowi haa yimɓe e dabbaaji, hokki ɗum Lewi'en huuwooɓe haa jooɗorde Jawmiraawo, bana Jawmiraawo umruno mo.

⁴⁸ Nden mawɓe konu, waato hoore'en dow ujineere e hoore'en dow teemerre, ngari haa Muusa,

⁴⁹ mbi'i mo: “Min limi honooɓe wonɓe les ardaaŋgal amin. Walaa koo gooto maɓɓe majji.

⁵⁰ Ngam maajum min ngaddi kuuje kaŋŋeeri: Palamje e jawe e kalagaaje e yerihon e koɗoy ɗe koo moy amin heɓi nder konu. Min ɗon lii'ano ɗum Jawmiraawo ngam heɓango yoŋkiiji amin yaafuye yeeso maako.”

⁵¹ Muusa e Eli'azaaru njaɓi kuuje kaŋŋeeri ɗe'e fuu.

⁵² Ɓe awni kaŋŋeeri ndi mawɓe konu, waato hoore'en dow ujineere e hoore'en dow teemerre ngaddi ɗum, ɗum waɗi baakin kilo teemerre e cappanɗe joweeɗiɗi (170).

⁵³ Ammaa koo moy caka honooɓe njogiti keɓal mum.

⁵⁴ Muusa e Eli'azaaru njaɓi kaŋŋeeri haa mawɓe konu, waato hoore'en dow ujineere e hoore'en dow teemerre, njahri ndi nder laymaaru fottirde, ngam ɗum laatano Isra'iila'en ciftinorɗum yeeso Jawmiraawo.