Limle 29 - Fulfulde Bible

Guleteeɗi juulde mawnde nder hitaande

¹ “Nyannde go'oore lewru joweeɗiɗaɓru, on mooɓto mooɓtorde senaande ngam sujidango Jawmiraawo. Taa kuuwe kuugal naawŋgal sam. Ɗum nyalaade puufki luwe.

² Lii'ane Jawmiraawo guleteeɗi, haa uureeŋgol maaji belŋgol fottana mo. Ndaa ko lii'otooɗon: Ngaari kalhaldi e njawdiri mbaalu e njawkoy njoweeɗiɗoy koy nduuɓu, ɗum fuu ɗum walaa aybe.

³ Ɓesde dokke nyaamdu boo: Kuroori ɗiggundi jiiɓaandi bee nebbam kilo joweenayi ngam ngaari fuu, kilo joweego ngam njawdiri fuu,

⁴ ngam jawgel fuu boo kilo tati tati.

⁵ Lii'e boo njawdiri mbeewa kirseteendi ngam ittuki hakkeeji mon.

⁶ Ɓesde ɗum haa guleteeɗi e dokke nyaamdu nyannde go'oore lewru, non boo haa guleteeɗi e dokke nyaamdu nyalaade nyalaade. Ɓesde dokke dufeteeɗe fodde kiitaaji darnaaɗi, haa uureeŋgol belŋgol dokke ɗe'e fuu fottana Jawmiraawo.”

Guleteeɗi nyalaade ittuki hakkeeji

⁷ “Nyannde sappoore nder lewru joweeɗiɗaɓru, on mooɓto mooɓtorde senaande ngam sujidango Jawmiraawo. Cuume, taa kuuwe kuugal naawŋgal sam.

⁸ Lii'ane Jawmiraawo guleteeɗi, haa uureeŋgol maaji belŋgol fottana mo. Ndaa ko lii'otooɗon: Ngaari kalhaldi e njawdiri mbaalu e njawkoy njoweeɗiɗoy koy nduuɓu, ɗum fuu ɗum walaa aybe.

⁹ Ɓesde dokke nyaamdu boo: Kuroori njiiɓaandi bee nebbam kilo joweenayi ngam ngaari fuu, kilo joweego ngam njawdiri,

¹⁰ ngam jawgel fuu boo kilo tati tati.

¹¹ Lii'e boo njawdiri mbeewa kirseteendi ngam ittuki hakkeeji. Ɓesde ɗum haa njawdiri mbeewa kirseteendi ngam yaafuye hakkeeji, haa guleteeɗi e haa dokke nyaamdu nyalaade nyalaade. Ɓesde dokke dufeteeɗe umraaɗe boo.”

Guleteeɗi juulde bukkaaji

¹² “Nyannde sappo e jowaɓre nder lewru joweeɗiɗaɓru, on mooɓto mooɓtorde senaande ngam sujidango Jawmiraawo. Taa kuuwe kuugal naawŋgal sam. Mbaɗane Jawmiraawo juulde nyalɗe joweeɗiɗi.

¹³ Nyannde juulde arannde, lii'ane Jawmiraawo nyaamdu wuleteendu, haa uureeŋgol maaru belŋgol fottana mo. Ndaa ko lii'otooɗon: Ga'i kalhali sappo e tati e jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

¹⁴ Ɓesde dokke nyaamdu boo: Kuroori njiiɓaandi bee nebbam kilo joweenayi ngam ngaari fuu, kilo joweego ngam njawdiri,

¹⁵ ngam jawgel fuu boo kilo tati tati.

¹⁶ Lii'e boo njawdiri mbeewa kirseteendi ngam ittuki hakkeeji. Ɓesde ɗum haa guleteeɗi e dokke nyaamdu e dokke dufeteeɗe nyalaade nyalaade.

¹⁷ Nyannde ɗiɗawre, lii'e ga'i kalhali sappo e ɗiɗi, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^18-19 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

²⁰ Nyannde tataɓre, lii'e ga'i kalhali sappo e go'o, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^21-22 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

²³ Nyannde nayaɓre, lii'e ga'i kalhali sappo, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^24-25 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

²⁶ Nyannde jowaɓre, lii'e ga'i kalhali joweenayi, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^27-28 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal maaji. Ɓesde boo njawdiri mbeewa ngam ittuki hakkeeji.

²⁹ Nyannde joweego'oore, lii'e ga'i kalhali joweetati, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^30-31 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

³² Nyannde joweeɗiɗaɓre, lii'e ga'i kalhali joweeɗiɗi, jawɗi baali ɗiɗi e njawkoy sappo e nayoy koy nduuɓu, ɗum fuu ɗum walaa aybe.

^33-34 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

³⁵ Nyannde joweetataɓre, on mooɓtoto ngam sujidango Jawmiraawo. Taa kuuwe kuugal naawŋgal sam.

³⁶ Lii'ane Jawmiraawo nyaamdu wuleteendu, haa uureeŋgol maaru belŋgol fottana mo. Ndaa ko lii'otooɗon: Ngaari kalhaldi e njawdiri mbaalu e njawkoy njoweeɗiɗoy koy nduuɓu, ɗum fuu ɗum walaa aybe.

^37-38 Lii'e ɗum hawtaade bee guleteeɗi e dokke nyaamdu e dokke dufeteeɗe umraaɗe fuu fodde limgal man. Ɓesde boo njawdiri mbeewa ngam ittuki hakkeeji.

³⁹ Kuuje ɗe'e fuu, lii'ane ɗe Jawmiraawo nder juulɗe mon: Guleteeɗi e dokke nyaamdu e dokke dufeteeɗe e kirseteeɗi ngam kawtal yimɓe bee Allah. Ɓesde boo dokke ngam kebbinki togayeeje mon malla dokke caahiiɗe.”