Limle 23 - Fulfulde Bible

¹ O wi'i Balak: “Mahanam kirsirɗe joweeɗiɗi haa ɗo. Nden waddanam ga'i kalhali joweeɗiɗi e jawɗi baali joweeɗiɗi.”

² Balak waɗi ko Balaama wi'i mo. Nden ɓe ɗiɗo fuu ɓe lii'i ngaari e njawdiri mbaalu dow hirsirde fuu.

³ Balaama wi'i Balak: “Dara ɗo baŋnge nguleteeŋga ma. Min boo mi daayoto, teema Jawmiraawo waŋgantam. Mi yeccete ko o anndintammi.” O yehi haa towndiire sookre.

⁴ Ton Allah waŋgani mo. Balaama wi'i mo: “Mi mahi kirsirɗe joweeɗiɗi. Mi lii'i ngaari kalhaldi e njawdiri mbaalu dow hirsirde fuu.”

⁵ Jawmiraawo anndini Balaama ko o tammi wolwugo, nden o wi'i mo: “Lora haa Balak, wolwan mo bana non.”

⁶ Balaama lori haa Balak, o tawi mo o ɗon dari baŋnge nguleteeŋga maako, kaŋko bee ardiiɓe Mo'abi'en fuu.

⁷ Balaama waɗi annabaaku, wi'i: “Balak, laamiiɗo Mo'ab waddi yam diga lesdi Siriya, diga kooseeje fuunaaŋge haa ɗo. O wi'i mi naalana mo danygol Yaakubu, mi telɓana mo Isra'iila'en.

⁸ Kadi, noy naaliranmi ko Allah naalaay? Noy telɓirananmi to Jawmiraawo telɓaay?

⁹ Diga dow tapaaje mi eewi ɓe. Yimɓe ɓe'e ceedi bee ummaatooje goɗɗe, kawtataa bee maaje sam.

¹⁰ Ɓiɓɓe Yaakubu nanndi bee mbulwuldi. Moy waawata limugo koo reetita maɓɓe? Mi yiɗi maayugo maayde gooŋga'en, timmoode am laato bana nde maɓɓe.”

¹¹ Balak wi'i Balaama: “Ɗume mbaɗɗaami ɗum? Mi waddi ma ngam a naala konne'en am, ammaa an a barkiɗini ɓe!”

¹² O jaabi: “Doole mi wi'e ko Jawmiraawo anndini yam.”

Annabaaku Balaama ɗiɗaɓu

¹³ Nden Balak wi'i Balaama: “War useni, yahdu bee am haa nokkuure woɗnde, a laara ɓe ton. A waawataa yi'ugo ɓe fuu, sey yeɓre maɓɓe tan. Naalanam ɓe ton!”

¹⁴ O yahri mo haa ngesa aynooɓe dow yeereere hooseere Pisiga. Ton boo o mahi kirsirɗe joweeɗiɗi, o lii'i ngaari kalhaldi e njawdiri mbaalu dow hirsirde fuu.

¹⁵ Balaama wi'i Balak: “Dara ɗo baŋnge nguleteeŋga ma. Min boo mi yahan reenugo, haa Allah waŋganammi.”

¹⁶ Jawmiraawo waŋgani mo, anndini mo ko o tammi wolwugo, nden o wi'i mo: “Lorta haa Balak, wolwan mo bana non.”

¹⁷ Balaama lorti haa Balak. O tawi mo o ɗon dari baŋnge nguleteeŋga maako, kaŋko bee ardiiɓe Mo'abi'en. Balak ƴami mo: “Ɗume Jawmiraawo wi'i?”

¹⁸ Balaama waɗi annabaaku, wi'i: “Umma, an Balak ɓii Cippor, nanam! Heɗita ko mi wi'ete!

¹⁹ Allah laataaki neɗɗo, o fewataa, o laataaki ɓii-Aadamaajo, o mimsitittaako. Ko o wi'i fuu, o waɗan ɗum. Ko o wolwi fuu, o hebbitinan ɗum boo.

²⁰ Mi barkiɗini ummaatoore nde'e ngam o barkiɗini nde. Mi waawataa faasitingo ɗum.

²¹ Jawmiraawo tawaay halleende haa danygol Yaakubu, o laaraay aybe Isra'iila, o Allah maɓɓe, o ɗon wondi bee maɓɓe, o laamiiɗo maɓɓe, ɓe ɗon maŋgta mo.

²² Allah wurtini ɓe Misra. O ɗon haɓa ngam maɓɓe bana mbana marŋga luwe cemmbiɗɗe.

²³ Ngam walaa hiila haa danygol Yaakubu, walaa hatti haa Isra'iila. To wakkati waɗi, ɓe mbi'an Yaakubu, waato Isra'iila: Ndaa ko Allah waɗi.

²⁴ Ummaatoore Isra'iila nanndi bee mbarooga nga ummoto, nga waalataako sonaa to nga faɗɗi, nga nyaami, nga yari ƴiiƴam faɗɗaaɓe!”

²⁵ Balak wi'i Balaama: “To a salake naalugo Isra'iila'en, nden kam accu barkiɗingo ɓe!”

²⁶ Balaama jaabi mo: “Na mi bi'ɗo ma: Ko Jawmiraawo anndintammi fuu, kanjum mbaɗanmi.”

Annabaaku Balaama tataɓu

²⁷ Nden Balak wi'i Balaama: “War useni, mi yahre haa nokkuure woɗnde. Teema ɗum fottanan Allah a naalanammi ɓe ton.”

²⁸ O yahri mo haa yeereere hooseere Pe'or towtunde dow ladde.

²⁹ Balaama wi'i mo: “Mahanam kirsirɗe joweeɗiɗi haa ɗo. Nden waddanam ngaari kalhaldi e njawdiri mbaalu haa hirsirde fuu.”

³⁰ Balak waɗi ko Balaama wi'i ɗum. Nden o lii'i ngaari e kalhaldi e njawdiri mbaalu dow hirsirde fuu.