Limle 18 - Fulfulde Bible

Ko Jawmiraawo halfini liman'en e Lewi'en

¹ Jawmiraawo wi'i Haruna: “An e ɓiɓɓe ma e yimɓe saare ma fuu, on ndoondoto aybeeji baɗaaɗi dow nokkuure seniinde. On ndoondoto boo aybeeji baɗaaɗi nder kuugal limanku mon.

² Waddu banndiraaɓe ma Lewi'en, lenyol kaaka ma, ɓe kuuwda bee maaɗa, ɓe mballe. An e ɓiɓɓe ma boo on kuuwan yeeso laymaaru seedamku.

³ Ɓe kuuwdan bee ma nder laymaaru. Ammaa taa ɓe ɓadito kuuje ceniiɗe malla hirsirde, ngam taa on maayda on fuu.

⁴ Ɓe mballete, ɓe kuuwdan bee maaɗa nder laymaaru fottirde, ammaa taa goɗɗo feere ɓadito on.

⁵ On kuuwan haa nokkuure seniinde e hirsirde, ngam taa tikkere am ukkano Isra'iila'en fahin.

⁶ Min mi suɓi banndiraaɓe mon Lewi'en nder Isra'iila'en fuu, ɓe laatano on dokkal, ɓe senaaɓe ngam am haa ɓe kuuwa haa laymaaru fottirde.

⁷ Ammaa an e ɓiɓɓe ma, on kuuwan kuugal limanku haa hirsirde e haa ɓaawo wiirndallo boo. Mi halfini on kuuɗe ɗe'e. Limanku woni dokkal ngal ndokkumi on. To goɗɗo feere ɓaditake on, o mbareteeɗo.”

Geɗal liman'en

⁸ Jawmiraawo wi'i Haruna: “Ndaa, mi halfini ma dokke kuuje ceniiɗe ɗe Isra'iila'en ittani yam fuu. Ɗe laato geɗal ma e geɗal danygol ma haa foroy, tabitinaaɗum bee farilla nduumiika.

⁹ Ndaa ko laatanto ma nder dokke ɓurɗe senaago, ɗe ngulataake dow hirsirde: Dokke nyaamdu e kirseteeɗi ngam ittuki hakkeeji e kirseteeɗi ngam joɓki aybeeji. Kuuje ceniiɗe ɗe Isra'iila'en lii'anto yam fuu, ɗe laatanto ma, an e danygol ma.

¹⁰ A nyaaman ko laatani ma nder kuuje ɓurɗe senaago. Ammaa sey worɓe tan nyaamata ɗe. Ɗum laatanto on huunde seniinde.

¹¹ Bana non boo dokke goɗɗe ɗe Isra'iila'en ittantammi malla lii'anto yam fuu, ɗe laatanto ma, an e ɓiɓɓe ma worɓe e rewɓe haa foroy, tabitinaaɗum bee farilla nduumiika. Koo moy nder saare ma, to soɓaay, nyaaman ɗe.

^12-13 Mi hokki ma kuuje ɓurɗe wooɗugo e kuuje ngesa arane waato nebbam e inaboojam e alkamaari. Ɗum fuu ɗum laatanto ma. Koo moy nder saare ma, to soɓaay, nyaaman ɗum.

¹⁴ Ko Isra'iila'en lii'anto yam haa foroy fuu, ɗum laatanto ma haa foroy.

¹⁵ To goɗɗo lii'anake yam ɓiɗɗo mum afo malla afi dabbaaji mum, ɗum laatanto ma boo. Ammaa sey a jaɓa coottaari ngam ɓiɓɓe afɓe e afi dabbaaji karminaaɗi fuu.

¹⁶ Accu yimɓe cootta ɓiɓɓe muuɗum'en afɓe nder lewru danyeeki maɓɓe. Saman maɓɓe woni ceede cardi jowi, fodde etirgal suudu seniindu, suleyje teemerre fuu waɗan baakin kilo gootel.

¹⁷ Ammaa afi na'i e baali e be'i coottataake, ɗi cenaaɗi ngam am. Sey a rufa ƴiiƴam maaji dow hirsirde, a wula ɓellere maaji bee yiite haa ɗum laatano yam uureeŋgol belŋgol pottuŋgol.

¹⁸ Kusel maaji laatanto ma, waato biiwol ɓaŋgtaaŋgol e daŋngo nyaamo haa kirseteeɗi boo.

¹⁹ Dokke ceniiɗe ɗe Isra'iila'en ittantammi fuu, mi hokki ma ɗe, an e ɓiɓɓe ma worɓe e rewɓe haa foroy. Ɗum tabitinaama bee farilla nduumiika. Kanjum woni alkawal duumiiŋgal ngal kaɓɓumi bee maaɗa e danygol ma, ngal tabitinaama bee maaɗa.”

²⁰ Jawmiraawo wi'i Haruna: “A heɓataa maral ndonŋgu, a marataa geɗal lesdi caka Isra'iila'en boo. Min woni maral maaɗa.”

Geɗal Lewi'en

²¹ Jawmiraawo wi'i: “Mi hokki Lewi'en zakka ka Isra'iila'en ngaddantammi fuu. Kanjum woni ngeenaari ngam kuugal maɓɓe haa laymaaru fottirde.

²² Taa Isra'iila'en ɓadito laymaaru fahin ngam taa ɓe ndoondo aybe, ɓe maaya.

²³ Lewi'en tan kuuwata haa laymaaru fottirde. To ɓe mbaɗi aybe nder kuugal maɓɓe, sey ɓe ndoondo ɗum. Kanjum woni farilla nduumiika haa gide mon fuu. Lewi'en keɓataa maral ndonŋgu caka Isra'iila'en,

²⁴ ngam mi marni ɓe zakka ka Isra'iila'en ittantammi. Ngam maajum mbi'mi ɓe ɓe keɓataa maral ndonŋgu nder Isra'iila.”

Zakka

²⁵ Jawmiraawo umri Muusa,

²⁶ o wi'a Lewi'en ni'i: “To on njaɓi zakka Isra'iila'en ka Jawmiraawo marni on, ittane mo zakka diga zakka ka keɓɗon.

²⁷ O limanan on ɗum bana dokkal alkamaari e inaboojam.

²⁸ Bana non onon boo on lii'anto Jawmiraawo dokkal haa zakka ka keɓoton haa Isra'iila'en. Dokkal man, ndokke ngal Haruna limanjo.

²⁹ Haa ko keɓoton fuu, ittane Jawmiraawo ɓurɗum wooɗugo bana dokkal ceniiŋgal.

³⁰ Wi' ɓe boo: To on ittani Jawmiraawo ɓurɗum wooɗugo, ɗum laati kal-kal bee alkamaari e inaboojam.

³¹ Onon e yimɓe ci'e mon nyaama ɗum koo toy fuu, ɗum ngeenaari kuugal mon nder laymaaru fottirde.

³² On mbaɗaay aybe to on ittani Jawmiraawo ɓurɗum wooɗugo, on coɓnataa dokke Isra'iila'en ceniiɗe, on maayataa boo.”