Limle 17 - Fulfulde Bible

Taasaaje uurorɗe

¹ Jawmiraawo wi'i Muusa:

² “Umru Eli'azaaru ɓii Haruna limanjo, o saŋkita yiite haa daayiiɗum, o wurtina pehe go diga ndoondi, ngam ɗe cenaaɗe.

³ Koo'e pehe worɓe ɓe'e, mbaraaɓe daliila hakkeeji muuɗum'en, tappe ɗe, ngartire ɗe beɗi cewɗi, cudde hirsirde bee maaji, ngam ɗe lii'aama yeeso Jawmiraawo, ɗe laatake cenaaɗe. Ɗe laatanto Isra'iila'en alaama.”

⁴ Eli'azaaru limanjo hoo'i pehe njamndi mboɗeeri ɗe wulaaɓe ngadduno. Ɓe tappi ɗe, ɓe cuddi hirsirde bee maaje.

⁵ Ɗum reentini Isra'iila'en ngam taa goɗɗo mo iwaay danygol Haruna ɓadito hirsirde ngam lii'anaago Jawmiraawo uureteeɗum, ngam taa o halka bana Koora e mooɓre mum. Ɗum fuu ɗum laati bana Jawmiraawo umruno Muusa.

Haruna hisni yimɓe

⁶ Jaŋngo man ummaatoore fuu ngurŋgurti dow Muusa e Haruna, wi'i: “Onon mbari jama'aare Jawmiraawo.”

⁷ Yimɓe mooɓi dow Muusa e Haruna. Nde ɓe kuuciti heedi laymaaru fottirde, ɓe ngi'i ruulde ɗon sudda ndu, tedduŋgal Jawmiraawo waŋgi.

⁸ Muusa e Haruna njehi, ndari yeeso laymaaru fottirde.

⁹ Jawmiraawo wi'i Muusa:

¹⁰ “Cennde bee ummaatoore nde'e, haa mi halka nde jonta nii!” Nden ɓe cujidi.

¹¹ Muusa wi'i Haruna: “Hoo'u feho uurorgo, waɗ ƴulɓe yiite ɗe a hooci haa hirsirde e uurle dow maago. Nden yaawɗa, nastu caka ummaatoore, keɓna nde yaafuye ngam tikkere Jawmiraawo ummake, masiibo boo fuɗɗi!”

¹² Haruna waɗi bana no Muusa wi'i mo. O doggi haa caka mooɓtorde. Nde o yi'i masiibo fuɗɗi caka yimɓe, o waɗi uurle dow ƴulɓe yiite ngam o heɓana jama'aare yaafuye.

¹³ Haruna dari hakkunde yeeɗɓe e maayɓe, nden masiibo boo jinni.

¹⁴ Masiibo mbari yimɓe ujine sappo e nayo e teemeɗɗe njoweeɗiɗo (14.700), mbaraaɓe daliila tuurtol Koora limaaka.

¹⁵ Nde masiibo jinni, Haruna lorti haa Muusa haa dammugal laymaaru fottirde.

Sawru Haruna

¹⁶ Jawmiraawo wi'i Muusa:

¹⁷ “Umru Isra'iila'en ngadda cabbi sappo e ɗiɗi, sawru wooru ngam koo moy ardiiɗo lenyol fuu. Winndu innde koo moy dow sawru mum.

¹⁸ Nden winndu innde Haruna dow sawru lenyol Lewi, ngam ardiiɗo lenyol fuu mara sawru wooru.

¹⁹ Nden wallin cabbi man nder laymaaru fottirde yeeso sundukru seedamku, nokkuure nde pottanmi bee mooɗon.

²⁰ Sawru gorko mo cuɓmi, finnan. Bana non nde'itiranmi ngurŋgurtol Isra'iila'en dow mooɗon.”

²¹ Muusa yecci ɗum Isra'iila'en. Ardiiɓe le'i maɓɓe fuu ndokki mo cabbi muuɗum'en, cabbi sappo e ɗiɗi. Sawru Haruna ɗon haa caka caɓɓi maɓɓe.

²² Muusa wallini ɗi yeeso Jawmiraawo nder laymaaru seedamku.

²³ Jaŋngo man Muusa nasti laymaaru seedamku. Ndaa, sawru Haruna mo lenyol Lewi wiliti, waɗi pinndi, lawjaaje boo ɓenndi.

²⁴ Muusa hoociti cabbi fuu diga yeeso Jawmiraawo, wurtini ɗi haa Isra'iila'en. Ɓe ngi'i ko laati. Nden ardiiɗo fuu hoositi sawru mum.

²⁵ Jawmiraawo wi'i Muusa: “Lornu sawru Haruna yeeso sundukru alkawal. Cige ndu ton, ndu laatano tuurtanɓe alaama. Sey ɓe acca ngurŋgurtugo dow am, ngam taa ɓe maaya.”

²⁶ Muusa waɗi bana ko Jawmiraawo umruno ɗum.

²⁷ Isra'iila'en mbi'i Muusa: “Fakat min maayan. Minin fuu min kalkan!

²⁸ To goɗɗo ɓaditake jooɗorde Jawmiraawo, o maayan. To non kam, minin fuu min maayɓe!”