Limle 16 - Fulfulde Bible

Tuurtol Koora e Datan e Abiram

¹ Koora ɓii Yicehar ɓii Kehat ɓii Lewi bee Datan e Abiram, ɓiɓɓe Eliyabu e Oon ɓii Pelet

² tuurtani Muusa, worɓe teemeɗɗe ɗiɗo e cappanɗe njowo, ardiiɓe Isra'iila ewnaaɓe, manaaɓe nder ummaatoore fuu kawtani ɓe.

³ Ɓe kawti dow Muusa e Haruna, ɓe mbi'i: “On ƴaɓɓi keerol baawɗe mon. Yimɓe ummaatoore fuu ɓe senaaɓe, Jawmiraawo boo ɗon caka maɓɓe. Koni ɓurnoton ko'e mon dow mooɓtorde Jawmiraawo?”

⁴ Nde Muusa nani ɗum, o sujidi.

⁵ Nden o wi'i Koora e tokkiiɓe ɗum fuu: “Jaŋngo fajiri Jawmiraawo anndinan en moy woni mo muuɗum, moy laati cenaaɗo. O ɓadinan mo yeeso maako, o ɓadinan mo o suɓata ɗum yeeso maako.

⁶ An e ummaatoore ma fuu, mbaɗe ɗu'um: Koo'e pehe uurorɗe.

⁷ Jaŋngo fajiri mbaate ƴulɓe yiite e uurle nder maaje, njahre ɗum yeeso Jawmiraawo. Nden kam en ngi'an mo Jawmiraawo suɓata, laatiiɗo cenaaɗo boo. Onon Lewi'en on ƴaɓɓake keerol baawɗe mooɗon!”

⁸ Muusa tokki wi'ugo Koora: “Nane, onon Lewi'en!

⁹ Allah Isra'iila suɓi on caka ummaatoore muuɗum fuu, ɓaditini on bee muuɗum, haa on njaggano mo haa jooɗorde maako. O darni on yeeso Isra'iila'en haa on kuuwa yeeso maɓɓe boo. Ɗum he'aay on na?

¹⁰ O ɓaditini on bee maako, an bee banndiraaɓe ma Lewi'en fuu. Nden nii on ɗon ɗaɓɓa boo kuugal limanku!

¹¹ Fakat, an bee mooɓre ma fuu, on ɗon tuurtana Jawmiraawo. Haruna o moy haa on ngurŋgurta dow maako?”

¹² Nden Muusa neli, ewni Datan e Abiram, ɓiɓɓe Eliyabu, ammaa ɓe mbi'i: “Min ngarataa!

¹³ A wurtini min diga lesdi keewndi kosam e njumri, ngam mbarugo min nder ladde nde'e. Ɗum he'aay na? A yiɗi boo laamanaago min na?

¹⁴ Kayya! A yahraay min nder lesdi keewndi kosam e njumri, a marnaay min gese e inabooje. A yiɗi bilkiɗingo min na? Min ngarataa!”

¹⁵ Muusa tikki masin, wi'i Jawmiraawo: “Taa jaɓ dokke maɓɓe! Mi jaɓaay koo wamnde woore haa maɓɓe. Mi waɗaay koo gooto maɓɓe kalluɗum boo!”

¹⁶ Muusa wi'i Koora: “An, mooɓre ma fuu e Haruna, mbaŋge jaŋngo yeeso Jawmiraawo.

¹⁷ Koo moy mooɗon hoo'a feho uurorgo, waɗa uurle nder maago, yahra ɗum yeeso Jawmiraawo, waato pehe teemeɗɗe ɗiɗi e cappanɗe jowi. An e Haruna, onon boo koo'e ɗe mooɗon.”

¹⁸ Ɓe mbaɗi bana non. Koo moy hoo'i feho mum, waɗi ƴulɓe yiite e uurle nder maago, dari haa nastirde laymaaru fottirde, hawtaade bee Muusa e Haruna.

¹⁹ Koora mooɓti jama'aare fuu yeeso nastirde laymaaru fottirde. Nden tedduŋgal Jawmiraawo waŋgani ummaatoore fuu.

²⁰ Jawmiraawo wi'i Muusa e Haruna:

²¹ “Ndaaye bee ummaatoore nde'e, haa mi halka nde jonta nii.”

²² Ammaa Muusa e Haruna cujidi, mbi'i: “Yaa Allah, an hokki marɗum ɓanndu fuu yoŋki. To gooto waɗi hakke, a tikkanan ummaatoore fuu na?”

²³ Jawmiraawo jaabi Muusa:

²⁴ “Umru yimɓe fuu ndaayo nokkuure haa Koora e Datan e Abiram njooɗi.”

²⁵ Muusa ummi, yahdi bee ndotti'en Isra'iila haa Datan e Abiram.

²⁶ Nden o wi'i ummaatoore: “Ndaaye laymaaji halluɓe ɓe'e, taa meeme ko ɓe mari sam, to on ngiɗaa on nattida bee maɓɓe daliila hakkeeji maɓɓe fuu!”

²⁷ Yimɓe ndaayi nokkuure haa Koora e Datan e Abiram njooɗi. Datan e Abiram ngurti, ɗon ndari haa dammuɗe laymaaji muuɗum'en, kamɓe e rewɓe maɓɓe e ɓikkoy maɓɓe e taaniraaɓe maɓɓe.

²⁸ Muusa wi'i yimɓe: “Ndaa bana nii anndirton Jawmiraawo neli yam huuwugo kuuɗe ɗe'e fuu e mi huuwaay ɗe bee anniya am.

²⁹ To worɓe ɓe'e maayi bana yimɓe fuu maayrata, to balɗe maɓɓe timmi bana balɗe yimɓe fuu timmirta, nden kam naa ɗum Jawmiraawo neli yam.

³⁰ Ammaa to Jawmiraawo waɗi ko meeɗaay laataago, to lesdi maɓɓitake, moɗi ɓe, kamɓe e maral maɓɓe fuu, to ɓe njippake haa joonde maayɓe bee yoŋki, nden kam on anndan ɓe njawi Jawmiraawo!”

³¹ Nde Muusa timmini wi'go ɗum, lesdi seeki les kosɗe Datan e Abiram,

³² maɓɓiti, moɗi ɓe, kamɓe e ci'e maɓɓe non boo yimɓe Koora e ko ɓe mari fuu.

³³ Ɓe njippi bee yoŋki haa joonde maayɓe, kamɓe e maral maɓɓe fuu. Lesdi maɓɓi dow maɓɓe, ɓe kalki caka ummaatoore.

³⁴ Isra'iila'en wonɓe kommbi maɓɓe fuu nani gookaali maɓɓe, ndoggi, mbi'i: “Taa lesdi moɗa en, enen boo!”

³⁵ Yiite iwi haa Jawmiraawo, nyaami worɓe teemeɗɗe ɗiɗo e cappanɗe njowo, lii'nooɓe uurle go.