Limle 15 - Fulfulde Bible

Umrooje dow kirseteeɗi e dokke

¹ Jawmiraawo wi'i Muusa,

² o umra Isra'iila'en ni'i: “To on nasti lesdi ndi mi hokki on haa on njooɗo ton, mbaɗe ɗu'um:

³ Lii'ane Jawmiraawo ngaari kalhaldi malla ndammoowa guleteeɗum malla kirseteeɗum ngam hebbingo togayeere malla caahuuji malla daliila juulɗe mon haa uureeŋgol belŋgol man fottana mo.

⁴ Koo moy yiɗi lii'ango mo dokkal bana non, sey ɓesda dokkal nyaamdu, kuroori kilo tati njiiɓaandi bee nebbam liitir gootel,

⁵ non boo dokkal inaboojam dufeteeŋgal liitir gootel, hawtaade bee jawgel guleteeŋgel malla kirseteeŋgel fuu.

⁶ Koo moy lii'oto njawdiri mbaalu, ɓesda dokkal nyaamdu, kuroori kilo joweego njiiɓaandi bee nebbam liitir bee reetita,

⁷ non boo dokkal inaboojam dufeteeŋgal liitir bee reetita haa uureeŋgol belŋgol man fottana Jawmiraawo.

⁸ Koo moy lii'anto Jawmiraawo ngaari kalhaldi nguleteendi malla kirseteendi ngam kebbinki togayeere malla ngam kawtal yimɓe bee Allah,

⁹ sey ɓesda dokkal nyaamdu, kuroori ɗiggundi kilo joweenayi jiiɓaandi bee nebbam liitir ɗiɗi,

¹⁰ non boo dokkal inaboojam dufeteeŋgal liitir ɗiɗi haa uureeŋgol belŋgol man fottana Jawmiraawo.

¹¹ Bana non kuuwroton kala ngaari, kala njawdiri mbaalu, kala mbaalu e kala mbeewa fuu.

¹² Mbaɗe ɗum fodde limgal dabbaaji ɗi lii'otooɗon fuu.

¹³ Isra'iilaajo fuu tokko farillaaji ɗi'i to o yiɗi lii'aago guleteeɗum haa uureeŋgol man fottana Jawmiraawo.

¹⁴ Nder gide mon fuu, to koɗo jooɗiiɗo caka mooɗon malla paɓɓuɗo caka mon yiɗi lii'ango Jawmiraawo nguleteeŋga ngam haa uureeŋgol man belŋgol fottana mo, sey o waɗa bana no mbaɗoton.

¹⁵ Farilla ka'a ɗon ngam mooɗon e ngam hoɗɓe wonɓe caka mooɗon. Ɗum farilla nduumiika ngam gide mon fuu: Ka laato ngam mooɗon e ngam hoɗɓe mon yeeso Jawmiraawo.

¹⁶ Umroore woore e kiita ngoota ɗon ngam mooɗon e ngam hoɗɓe wonɓe caka mooɗon.”

¹⁷ Jawmiraawo wi'i Muusa,

¹⁸ o umra Isra'iila'en ni'i: “To on nasti lesdi ndi Jawmiraawo ɗon yahra on ton,

¹⁹ to on ɗon nyaama nyaamdu lesdi man, ittane Jawmiraawo geɗal muuɗum.

²⁰ Ittane mo tamseere woore haa tamseeje mon aartuɗe, itte ɗum bana no ittirton haa demetirle mon.

²¹ Ittane Jawmiraawo geɗal maako haa kuroori mon aartundi. Umroore nde'e ɗon ngam gide mon fuu.

^22-23 To on mbaɗi hakke bilaa anniya, on ɗowtanaaki umrooje e ko Jawmiraawo anndini Muusa fuu, diga nyalaade ɗum umra e ko umrana gide mon fuu,

²⁴ to boofol man laatake ngam jama'aare waɗi hakke bilaa anniya, sey jama'aare fuu lii'o ngaari kalhaldi nguleteendi, haa uureeŋgol man belŋgol fottana Jawmiraawo. Ɓe ɓesda dokkal nyaamdu e dokkal dufeteeŋgal bana ko haani, non boo njawdiri mbeewa kirseteendi ngam ittuki hakkeeji.

²⁵ Limanjo heɓnana yimɓe ummaatoore Isra'iila fuu yaafuye. Ɓe keɓan yaafuye ngam ɓe mbaɗaay hakke man bee anniya, ɓe lii'ani Jawmiraawo nguleteeŋga maɓɓe e kirseteeŋga ngam ittuki hakkeeji maɓɓe boo.

²⁶ Ummaatoore Isra'iila e hoɗɓe wonɓe caka maɓɓe fuu keɓan yaafuye, ngam ummaatoore fuu waɗno boofol man.

²⁷ To ɗum goɗɗo gooto waɗi hakke bilaa anniya, sey o lii'o mbeewa nga nduuɓu, kirseteeŋga ngam ittuki hakke.

²⁸ Limanjo heɓna mo yaafuye haa Jawmiraawo ngam daliila hakke maako bilaa anniya.

²⁹ Umroore nde'e laarani baɗɗo aybe bilaa anniya, nde ɗon ngam Isra'iila'en, ɓiɓɓe lesdi e ngam hoɗɓe wonɓe caka maɓɓe.

³⁰ Ammaa to goɗɗo waɗi hakke bee anniya, koo o ɓii lesdi koo o koɗo, nden kam o huɗi Jawmiraawo. O gurtinteeɗo diga ummaatoore maako,

³¹ ngam o yawi wolde Jawmiraawo, o luuti umrooje maako. Fakat o gurtinteeɗo, aybe gurtinki maako do'oto dow hoore maako.”

To goɗɗo luuti umroore nyannde siwtorde

³² Yaake Isra'iila'en ɗonno nder ladde, ɓe tawi goɗɗo ɗon teena leɗɗe nyannde siwtorde.

³³ Tawɓe mo ngaddi mo yeeso Muusa e Haruna e ummaatoore fuu.

³⁴ Ɓe ayni mo booɗɗum, ngam ɓe anndaa no kiita maako waaroto.

³⁵ Nden Jawmiraawo wi'i Muusa: “Goɗɗo oo o mbareteeɗo! Jama'aare fuu fiɗa mo bee kaa'e haa yaasi saŋngeere.”

³⁶ Ummaatoore wurtini mo saŋngeere, fiɗi mo bee kaa'e haa o maayi, bana Jawmiraawo umruno Muusa.

Tuutuuji seedamku

³⁷ Jawmiraawo wi'i Muusa:

³⁸ “Umru Isra'iila'en, ɓe mbaɗa tuutuuji haa gawarle limce maɓɓe e ɓoggel carwinaaŋgel haa tuutuuru koo nduye.

³⁹ Tuutuuji man laatanto on ciftinorki. Koo ndey on ndaari ɗi, on ciftoran umrooje am, on ɗowtano ɗe, ngam taa on tokko estooji ɓerɗe mon e gite mon nastinanɗi on nder sooynde adilaaku.

⁴⁰ Bana non on numtirta umrooje am, on ɗowtano ɗe, on laato senaaɓe ngam am.

⁴¹ Min woni Allah Jawmiraawo mon, mi wurtini on lesdi Misra ngam mi laato Allah mon. Min woni Jawmiraawo Allah mon.”