Limle 13 - Fulfulde Bible

Muusa neli horooɓe

¹ Jawmiraawo wi'i Muusa:

² “Nel worɓe sappo e ɗiɗo, gooto haa lenyol koo ngole, haa ɓe kora lesdi Kanaana ndi ndokkanmi Isra'iila'en.” Nelaaɗo fuu laato ardiiɗo nder lenyol mum.

³ Fodde umroore Jawmiraawo, Muusa neli ɓe diga ladde Paran, ɓe fuu ɓe ardiiɓe Isra'iila'en.

⁴ Ndaa inɗe maɓɓe: Haa lenyol Ruben, Sammu'a ɓii Zakkur.

⁵ Haa lenyol Simeyon, Safat ɓii Hori.

⁶ Haa lenyol Yahuuda, Kaaleb ɓii Yefunna.

⁷ Haa lenyol Issakar, Yigal ɓii Yusufu.

⁸ Haa lenyol Efrayim, Hose'a ɓii Nuuna.

⁹ Haa lenyol Benyamin, Palti ɓii Rafu.

¹⁰ Haa lenyol Zabulon, Gaddiyel ɓii Soodi.

¹¹ Haa lenyol Manassa ɓii Yusufu, Gaddi ɓii Susi.

¹² Haa lenyol Dan, Ammiyel ɓii Gemalli.

¹³ Haa lenyol Aser, Seturu ɓii Mika'iilu.

¹⁴ Haa lenyol Neftali, Nahabi ɓii Wofsi

¹⁵ e haa lenyol Gada boo Gewel ɓii Maki.

¹⁶ Kanje ngoni inɗe worɓe ɓe Muusa neli horoygo Kanaana. Ammaa Hose'a ɓii Nuuna, Muusa inndi mo Yosuwa.

¹⁷ Muusa neli ɓe horugo lesdi Kanaana, wi'i ɓe: “Nastire fombina lesdi ndi'i, nden mba'e kooseeje.

¹⁸ Ndaare no lesdi ndi'i wa'i, ndaare yimɓe ton boo, ɓe semmbiɗɓe na malla tampuɓe? Ɓe ɗuuɗɓe na malla ɓe ɗuuɗaay?

¹⁹ Ndaare boo lesdi haa ɓe njooɗi, ndi mboondi na malla ndi wooɗaay? Non boo berniiji haa ɓe njooɗi, ɗi cemmbiɗɗi na malla ɓe ɗon njooɗi nder caŋngeeje?

²⁰ Gese maɓɓe boo, ɗe ƴaamnan na malla ɗe ƴaamnataa? Leɗɗe ɗuuɗi ton na malla ɗuuɗaay? Cuusɗine ko'e mon, koo'e ɓiɓɓe leɗɗe lesdi man.” Nelaaɓe njehi saa'i ittugo inabooje aartuɗe.

²¹ Nden ɓe ndilli, ɓe kori lesdi man diga ladde Ciin haa yotti Rehob haa nastirde Hamat.

²² Ɓe mba'iri fombina, ɓe njotti Heburuun. Ahiman e Sesay e Talmay ngonno ton, ɓe danygol Anaki'en. Berniwol Heburuun aarti Co'an nder lesdi Misra jo'ineego duuɓi joweeɗiɗi.

²³ Ɓe njotti waadiwol Eskol. Ton ɓe ta'i lisal bee wukkuru inabooje, worɓe ɗiɗo ndoondi ngal bee sawru. Ɓe koo'i boo rummaanooje e ibbe.

²⁴ Ɓe inndi nokkuure man waadiwol Eskol, daliila wukkuru inabooje ndu Isra'iila'en ta'i ɗum ton.

²⁵ Ɓe kori lesdi nyalɗe cappanɗe nayi, nden ɓe lorti.

²⁶ Ɓe njehi haa Muusa e Haruna e jama'aare Isra'iila fuu haa Kaades nder ladde Paran. Ɓe ngecci ɓe fuu ko ɓe ngi'i, ɓe kolli ɓe boo ɓiɓɓe leɗɗe lesdi man.

²⁷ Ɓe mbi'i Muusa: “Min ndaari lesdi ndi nelɗa min ton. Fakat ndi heewi kosam e njumri. Ndaa ɓiɓɓe leɗɗe maari boo.

²⁸ Ammaa ummaatoore wonnde ton nde semmbiɗnde, berniiji maare boo ɗi mawɗi masin, ɗi cemmbiɗɗi. Min ngi'i Anaki'en ton boo.

²⁹ Amaleki'en ɗon njooɗi haa fombina lesdi. Heti'en e Yebusi'en e Amoori'en ɗon njooɗi dow kooseeje, Kanaani'en boo ɗon njooɗi kommbi mbeela e dow pomoole maayo Urdun.”

³⁰ Kaaleb je'ini yimɓe ummaatoore tuurtunde dow Muusa, o wi'i ɓe: “En njah nyaamugo lesdi ndi'i, ngam fakat en mbaawan jaalaago ndi!”

³¹ Ammaa yahdunooɓe bee maako mbi'i: “Aa'a en mbaawataa haɓugo bee ummaatoore nde'e ngam nde ɓuri en semmbe.”

³² Ɓe kallini lesdi man yeeso Isra'iila'en, ɓe mbi'i: “Lesdi ndi min kori ɗum, ɗon moɗa yimɓe maari. Min ngi'i jooɗiiɓe ton, ɓe fuu ɓe juuta-darɗe'en.

³³ Min ngi'i ton maapinndi'en, ɓiɓɓe Anak, min ndaari ko'e amin bana baɓɓatti. Kamɓe boo ɓe ndaari min bana non.”