Limle 10 - Fulfulde Bible

Luwe cardi

¹ Jawmiraawo wi'i Muusa:

² “Sey a waɗa luwe ɗiɗi kuuwraaɗe bee cardi ɗuuɗndi. A huuwtinira ɗe ngam mooɓtugo jama'aare e ngam egguki boo.

³ To ɓe puufi luwe ɗiɗi fuu, jama'aare fuu mooɓo kommbi ma haa nastirde laymaaru fottirde.

⁴ To ɓe puufi luwal gootal, sey ardiiɓe le'i, ardiiɓe ujineeje Isra'iila tan mooɓoto kommbi maaɗa.

⁵ To luwe puufaama arannde, fuufre konu, le'i gonɗi haa saŋngeere fuunaaŋge ummo.

⁶ To ɗe puufaama ɗiɗawre, fuufre konu, le'i gonɗi haa saŋngeere fombina ummo. To on ngiɗi ummingo caŋngeeje, puufe fuufre konu.

⁷ Ammaa ngam mooɓtugo yimɓe, taa puufe fuufre konu.

⁸ Liman'en ɓiɓɓe Haruna puufata luwe ɗe'e. Ɗum laatoto farilla nduumiika ngam mooɗon e ngam gide mon fuu.

⁹ To on nasti haɓre nder lesdi mooɗon bee konne'en kippiiɓe on, puufe fuufre konu bee luwe man. Nden kam min Jawmiraawo Allah mon mi siftoran on, mi hisna on juuɗe maɓɓe.

¹⁰ Bana non boo, nder nyalaade seyo mon, nder juulde hakkunde lebbi, puufe luwe man saa'i on ɗon lii'ano yam guleteeɗi mon e kirseteeɗi mon ngam kawtal yimɓe bee am. Nden mi siftoran on. Min woni Allah Jawmiraawo mon.”

Ummaaki Isra'iila'en diga ladde Sina

¹¹ Nder nduuɓu ɗiɗaɓu, lewru ɗiɗaɓru, nyannde noogasre maaru, ruulde ummi, acci jooɗorde seedamku alkawal.

¹² Isra'iila'en ummi, ndilli ladde Sina, mooɓe maɓɓe ɗon tokkindiri. Ruulde jippi nder ladde Paran.

¹³ Jahaaŋgal maɓɓe fuɗɗi dow umroore nde Jawmiraawo umruno bee hunnduko Muusa.

¹⁴ Yeɓre Yahuuda bee tuutawal mum aarti ummaago, fodde mooɓe konu mum. Nahasunu ɓii Amminadabu ɗowi honooɓe maare.

¹⁵ Nataneyel ɓii Cu'ar ɗowi mooɓre konu lenyol Issakar.

¹⁶ Eliyabu ɓii Helon boo ɗowi mooɓre konu lenyol Zabulon.

¹⁷ Nden ɓe taggi jooɗorde Jawmiraawo. Gersoni'en e Meraari'en ndoondi nde, nden ɓe ummi.

¹⁸ Nden yeɓre Ruben bee tuutawal mum ummi, fodde mooɓe konu mum. Elicuru ɓii Sedewur ɗowi mooɓre konu maare.

¹⁹ Selumiyel ɓii Curisadday ɗowi jama'aare konu lenyol Simeyon.

²⁰ Eliyasaf ɓii De'uwel boo ɗowi mooɓre konu lenyol Gada.

²¹ Nden Kehati'en ndoondi kuuje ceniiɗe, ɓe ummi. Jooɗorde boo ɗon darne hidde ɓe njotto.

²² Nden yeɓre Efrayim bee tuutawal mum ummi, fodde mooɓe konu mum. Eliisama ɓii Ammihudu ɗowi mooɓre konu maare.

²³ Gamaliyel ɓii Pedacuru ɗowi mooɓre konu lenyol Manassa.

²⁴ Abidan ɓii Gidi'oni boo ɗowi mooɓre lenyol Benyamin.

²⁵ Haa ɓaawo, yeɓre Dan bee tuutawal mum ummi, fodde mooɓe konu mum. Ahi'ezer ɓii Ammisadday ɗowi mooɓre konu maare.

²⁶ Pagiyel ɓii Okran ɗowi mooɓre konu lenyol Aser.

²⁷ Ahiira ɓii Enan boo ɗowi mooɓre konu lenyol Neftali.

²⁸ Mooɓe Isra'iila'en tokkindiri bana nii, koo ndeye ɓe ummi fuu.

²⁹ Muusa wi'i eekiraawo mum Hobab ɓii Re'uwel Mediyaniijo: “Min ɗon ndilla haa nokkuure nde Jawmiraawo iinani min. Yahdu bee amin. Min mboonante, ngam Jawmiraawo wi'i o woonanan Isra'iila.”

³⁰ Hobab jaabi: “Mi yahdataa bee mooɗon, ammaa mi loroto haa lesdi am e haa banndiraaɓe am.”

³¹ Muusa tiɗɗini mo, wi'i: “Useni, taa accu min, ngam an anndi nokkuuje nder ladde haa min tammi saŋngingo, a laato ɗowoowo min.

³² To a yahdi bee amin, a naftorto boo mbooɗeeŋga nga Jawmiraawo tammi waɗango min.”

³³ Isra'iila'en ummi diga hooseere Jawmiraawo, mbaɗi nyalɗe tati dow laawol. Sundukru alkawal Jawmiraawo ɗon ardi ɓe, waɗi kanyum boo nyalɗe tati dow laawol ngam tefango ɓe pellel siwtaare.

³⁴ Bee nyalawma, ruulde Jawmiraawo ɗon dow maɓɓe wakkati ɓe ɗon ngurto saŋngeere.

³⁵ Nde sundukru alkawal ummi fuu, Muusa wi'a: “Umma, yaa Jawmiraawo, haa konne'en ma caŋkito, wanyɓe ma ndogga yeeso maaɗa!”

³⁶ To sundukru darake boo, o wi'a: “Yaa Jawmiraawo, lorta haa jama'aare Isra'iila ɗuuɗnde nde'e!”