Limle 1 - Fulfulde Bible

Limki Isra'iila'en

¹ Nder nduuɓu ɗiɗaɓu ɓaawo gurtaaki Isra'iila'en diga lesdi Misra, lewru ɗiɗaɓru, nyannde go'oore maaru, Jawmiraawo wolwani Muusa nder laymaaru fottirde haa ladde hamaadaare Sina. O wi'i:

^2-3 “An e Haruna, mbaɗe binndol: Mbinnde limgal yimɓe jama'aare Isra'iila fuu fodde asli muuɗum'en e ci'e muuɗum'en, mbinnde inɗe worɓe fuu, waawanɓe hoo'ugo balmi konu, ɓe duuɓi noogas e ko ɓuri, koo moy nder mooɓre konu muuɗum.

⁴ Haa lenyol fuu baaba-saare gooto wallan on.

⁵ Ndaa inɗe wallanɓe on: Nder lenyol Ruben, Elicuru ɓii Sedewur.

⁶ Nder lenyol Simeyon, Selumiyel ɓii Curisadday.

⁷ Nder lenyol Yahuuda, Nahasunu ɓii Amminadabu.

⁸ Nder lenyol Issakar, Netaneyel ɓii Cu'ar.

⁹ Nder lenyol Zabulon, Eliyabu ɓii Helon.

¹⁰ Nder lenyol Efrayim ɓii Yusufu, Eliisama ɓii Ammihudu e haa lenyol Manassa boo, Gamaliyel ɓii Pedacuru.

¹¹ Nder lenyol Benyamin, Abidan ɓii Gidi'oni.

¹² Nder lenyol Dan, Ahi'ezer ɓii Ammisadday.

¹³ Nder lenyol Aser, Pagiyel ɓii Okran.

¹⁴ Nder lenyol Gada, Eliyasaf ɓii De'uwel.

¹⁵ Nder lenyol Neftali, Ahiira ɓii Enan.”

¹⁶ Kamɓe ngoni worɓe suɓaaɓe nder jama'aare, ardiiɓe le'i muuɗum'en, ɓe ardiiɓe ujineeje Isra'iila.

¹⁷ Muusa e Haruna koo'i yimɓe suɓaaɓe innde bee innde ɓe'e.

¹⁸ Ɓe mooɓti jama'aare fuu nyannde go'oore nder lewru ɗiɗaɓru. Isra'iila'en fuu mbinndaama nder defte fodde asli e ci'e muuɗum'en. Ɓe mbinndi inɗe worɓe ɓe duuɓi noogas e ko ɓuri fuu, gooto gooto,

¹⁹ Muusa limi yimɓe nder ladde hamaadaare Sina bana Jawmiraawo umruno mo.

²⁰ Worɓe ɓe duuɓi noogas e ko ɓuri, waawanɓe hoo'ugo balmi konu fuu mbinndaama innde innde, fodde asli muuɗum'en e ci'e muuɗum'en. Ɓe puɗɗiri bee lenyol Ruben, afo Isra'iila.

²¹ Limgal limaaɓe nder lenyol Ruben waɗi ujine cappanɗe nayo e njoweego e teemeɗɗe njowo (46.500).

^22-23 Lenyol Simeyon: Ujine cappanɗe njowo e njoweenayo e teemeɗɗe tato (59.300).

^24-25 Lenyol Gada: Ujine cappanɗe nayo e njowo e teemeɗɗe njoweego e cappanɗe njowo (45.650).

^26-27 Lenyol Yahuuda: Ujine cappanɗe njoweeɗiɗo e nayo e teemeɗɗe njoweego (74.600).

^28-29 Lenyol Issakar: Ujine cappanɗe njowo e nayo e teemeɗɗe nayo (54.400).

^30-31 Lenyol Zabulon: Ujine cappanɗe njowo e njoweeɗiɗo e teemeɗɗe nayo (57.400).

^32-33 Lenyol Efrayim ɓii Yusufu: Ujine cappanɗe nayo e teemeɗɗe njowo (40.500).

^34-35 Lenyol Manassa ɓii Yusufu: Ujine cappanɗe tato e ɗiɗo e teemeɗɗe ɗiɗo (32.200).

^36-37 Lenyol Benyamin: Ujine cappanɗe tato e njowo e teemeɗɗe nayo (35.400).

^38-39 Lenyol Dan: Ujine cappanɗe njoweego e ɗiɗo e teemeɗɗe njoweeɗiɗo (62.700).

^40-41 Lenyol Aser: Ujine cappanɗe nayo e ngo'o e teemeɗɗe njowo (41.500).

^42-43 Lenyol Neftali: Ujine cappanɗe njowo e tato e teemeɗɗe nayo (53.400).

^44-46 Bana nii Muusa e Haruna e baaba-ci'e'en laatiiɓe ardiiɓe le'i sappo e ɗiɗi limi worɓe Isra'iila'en ɓe duuɓi noogas e ko ɓuri waawanɓe hoo'ugo balmi konu fuu, fodde ci'e maɓɓe. Limgal maɓɓe fuu waɗi ujine teemeɗɗe njoweego e tato e teemeɗɗe njowo e cappanɗe njowo (603.550).

⁴⁷ Ammaa lenyol Lewi'en, fodde lenyol baabiraaɓe muuɗum'en limdaaka bee maɓɓe,

⁴⁸ ngam Jawmiraawo wi'no Muusa:

⁴⁹ “Taa mbinnde lenyol Lewi, taa limu ngol caka Isra'iila'en.

⁵⁰ Ammaa halfin Lewi'en kuugal nder jooɗorde seedamku alkawal, non boo kuuwruɗe gonɗe nder maare fuu. Ɓe ndoondo jooɗorde e kuuwruɗe maare, ɓe kuuwa nder maare e ɓe caŋngina nder taarde maare boo.

⁵¹ Sey Lewi'en piista jooɗorde saa'i nde jahaaŋgal ummoto fuu. Nde caŋnginton fuu boo, ɓe ndarna nde fahin. To goɗɗo feere ɓaditake nde, o mbareteeɗo.

⁵² Isra'iila'en luttuɓe caŋngina haa nokkuuje muuɗum'en, koo moy bee mooɓre konu mum, baŋnge tuutawal fodde yeɓre mum.

⁵³ Lewi'en kam caŋngina nder taarde jooɗorde, ngam taa tikkere am ukko dow jama'aare Isra'iila. Ɓe cuklanto kuuɗe nder jooɗorde sundukru alkawal.”

⁵⁴ Isra'iila'en mbaɗi fuu kal-kal bana no Jawmiraawo umruno Muusa.