Laataanooji 6 - Fulfulde Bible

Halleende yimɓe e anniya Allah ngam halkugo ɓe

¹ Nde yimɓe puɗɗi ɗuuɗugo dow lesdi, ɓe danyi ɓiɓɓe rewɓe.

² Ɓiɓɓe Allah ngi'i ɓiɓɓe rewɓe yimɓe no mbooɗiri, ɓe cuɓi woɗɓe maɓɓe, ɓe te'i ɓe.

³ Nden Jawmiraawo wi'i: “Ruuhu am wonataa nder neɗɗo foroy, ngam o maayoowo, balɗe ngeendam maako ɓurataa duuɓi teemerre e noogas (120).”

⁴ Saa'i maajum, maapinndi'en ɗonno nder duniyaaru. Kamɓe laati maapinndi'en ɓooyma haa lesdi, manaaɓe. Ɓe ɗonno boo yaake ɓiɓɓe Allah kawtino bee ɓiɓɓe rewɓe yimɓe, ndanyidi ɓiɓɓe bee ɓiɓɓe rewɓe ɓe'e. Kamɓe ngoni doolɗooɓe, jam'en tedduŋgal.

⁵ Jawmiraawo yi'i no halleende yimɓe ɗuuɗiri dow lesdi. Nyalaade fuu anniyaaji e numooji ɓerɗe maɓɓe kuucitani halleende.

⁶ Numooji Jawmiraawo ngayliti ɓaawo nde o tagi yimɓe dow lesdi. Ɓernde maako naawi.

⁷ O wi'i: “Mi nattinan yimɓe ɓe tagmi dow lesdi haa yotto dabbaaji e ladooji e colli. Mi tagataano ɗum.”

⁸ Ammaa Nuuhu heɓi yerduye Jawmiraawo.

Allah hoo'i anniya hisnugo Nuuhu

⁹ Ndaa habaru danygol Nuuhu: Nuuhu o adiliijo e timmuɗo caka yimɓe nder zamanuuru muuɗum. O tokki laawol Allah.

¹⁰ O danyi ɓiɓɓe worɓe tato: Sem e Haamu e Yafet.

¹¹ Lesdi wonni haa yeeso Allah, ndi heewi toonyaare.

¹² Allah laari lesdi, ndaa ndi wonnake, ngam marɗum yoŋki fuu wonni yahdu muuɗum dow lesdi.

¹³ Allah wi'i Nuuhu: “Mi annini timmingo tagle fuu. Lesdi heewi toonyaare ngam daliila yimɓe. Mi nattinan ɓe hawtaade bee lesdi fuu.

¹⁴ Waɗanan hoore maaɗa koommbowal maŋngal, ngal leɗɗe gofir. A waɗa cuuɗi nder maagal, a sukka burɗe maagal bee taari, nder e yaasi fuu.

¹⁵ Ndaa nii mbaɗirta ngal: Njuutirka maagal mara meetir teemerre e cappanɗe jowi (150), njaajirka maagal meetir noogas e jowi (25) e towirka maagal boo meetir sappo e jowi (15).

¹⁶ Sey a hippa ngal, a waɗa wurdere haa koommbowal, nde reeta meetir gootel, haa les mbippu maagal. Waɗ dammugal koommbowal haa caka wuttudu maagal. Senndu towirka maagal haa waɗa cuuɗi tati, wooru dow wooru.

¹⁷ Mi waddan ilam dow lesdi, ngam halkugo ko yeeɗata les asama, marndum poofɗe ngeendam. Ko woni dow lesdi fuu nattan.

¹⁸ Ammaa mi haɓɓan alkawal bee maaɗa. A nastan koommbowal, an e ɓiɓɓe maaɗa e debbo maaɗa e rewɓe ɓiɓɓe maaɗa.

¹⁹ Haa geetum, marɗum ɓanndu fuu, hoo'u ɗiɗi ɗiɗi nder koommbowal, gorɗum e debbum, ɗum hisa hawtaade bee maaɗa.

²⁰ Haa colli fodde asli maaji e dabbaaji fodde asli maaji e ladooji lesdi fodde asli maaji. Gorɗum e debbum maaji fuu ngaran gal maaɗa, ngam hisnugo yoŋkiiji maaji.

²¹ An boo, hoo'u diga ko nyaamete fuu, sigu ɗum haa maaɗa, ɗum laato nyaamdu maaɗa e nyaamdu maaji.”

²² Nuuhu waɗi bana non, o waɗi ko Allah umri mo fuu.