Laataanooji 43 - Fulfulde Bible

Benyamin yahdi bee deerɗiraaɓe muuɗum haa Misra

¹ Weelo ɓesdi saatugo nder lesdi Kanaana.

² Nde yimɓe saare Yaakubu timmidini nyaamugo alkamaari ndi ɓe ngaddoyno diga Misra, Yaakubu wi'i ɓiyum'en: “Njehe kadiboo, coodane en nyaamdu seɗɗa.”

³ Yahuuda wi'i mo: “Goɗɗo oo reentini min laaɓɗum, o wi'i: On ngi'ataa yam sam to deerɗiraawo mon wardaay bee mooɗon.

⁴ To a jaɓi neldugo deerɗiraawo amin bee amin, nden kam min njahan soodanoygo ma nyaamdu.

⁵ Ammaa to a jaɓaay, minin boo min njahataa ton. Ngam goɗɗo oo wi'i: On ngi'ataa yam sam to deerɗiraawo mon wardaay bee mooɗon.”

⁶ Isra'iila wi'i: “Koni kuuwanɗon yam kalluɗum ɗu'um bee anndingo goɗɗo oo on ngoodi deerɗiraawo feere fahin?”

⁷ Ɓe njaabi: “O ƴami min bee tukku haala ko'e amin e saare amin, o wi'i: Baaba mooɗon ɗon bee yoŋki na? On ngoodi deerɗiraawo goɗɗo na? Min jaabi mo fodde ƴamɗe ɗe'e. Min anndaano o wi'an: Ngarde bee deerɗiraawo mooɗon.”

⁸ Yahuuda wi'i baaba muuɗum Isra'iila: “Accu derkeejo yahda bee am. Min ummoto, min ndilla, bana non en tammi wurdugo, en maayataa, minin bee maaɗa e ɓikkoy amin fuu.

⁹ Min fiyi dammaana ngam maako, a ƴamammi to mi wartiraay mo haa kommbi maaɗa. Limanam ɗum aybe haa foroy.

¹⁰ To min neeɓaayno haa ton, min ngartanno jonta nde ɗiɗi.”

¹¹ Isra'iila, baaba maɓɓe wi'i ɓe: “To ɗum laatake non, mbaɗe ɗu'um: Koo'e ɓurɗum wooɗugo haa lesdi men nder boorooji mon, njahrane goɗɗo oo dokkal: Ɗaccere uurnde seɗɗa e njumri seɗɗa e uurle e tamre uurdi e ɓiɓɓe leɗɗe belɗe joorɗe diga leɗɗe feere feere.

¹² Koo'e ceede haa juuɗe mon. Non boo ceede baataaɗe haa hunnduko boorooji mooɗon, koo'e ɗe fahin, teema ɗum ngooytu.

¹³ Koo'e deerɗiraawo mooɗon, umme, lorte haa goɗɗo oo.

¹⁴ Allah Baawɗo heɓnana on mo'ere haa goɗɗo oo, o yoofta deerɗiraawo mooɗon oya e Benyamin. Min boo, to nii doole mi sooya ɓikkoy am, sey mi sooya koy!”

¹⁵ Deerɗiraaɓe koo'i dokkal maajum, ɓe cowi ceede haa juuɗe maɓɓe, ɓe koo'i Benyamin boo. Ɓe ummi, ɓe ndilli Misra. Ton ɓe ngari yeeso Yusufu.

Yusufu weerni deerɗiraaɓe muuɗum

¹⁶ Nde Yusufu yi'i Benyamin bee maɓɓe, o wi'i kaliifaajo saare maako: “Nastin worɓe ɓe'e nder suudu, hirsu ndabbaawa, defu nga, ngam ɓe nyaamdan bee am caka nyalawma.”

¹⁷ Goɗɗo go waɗi ko Yusufu umri mo. O yahri ɓe nder saare Yusufu.

¹⁸ Nde ɓe ɗon njahra ɓe nder saare Yusufu, ɓe kultori, ɓe mbi'i: “Ɓe ɗon njahra en daliila ceede loriiɗe nder boorooji meeɗen aran go. Ɓe ukkanto en, ɓe njarna en bone, ɓe mbaɗa en maccuɓe bee bamɗe meeɗen fuu.”

¹⁹ Ɓe ɓaditi kaliifaajo saare Yusufu, ɓe mbolwani mo haa dammugal saare.

²⁰ Ɓe mbi'i: “Useni, naywa, min ngarino aran soodugo nyaamdu.

²¹ Nde min njotti haa min mbaalata jemma, min maɓɓiti boorooji amin. Koo moy amin tawi ceede mum haa hunnduko booro mum. Fakat ɗum saman ceede ɗe min njoɓno. Ammaa min ngartiri ɗe haa juŋngo amin.

²² Min ngaddi ceede goɗɗe boo ngam soodugo nyaamdu. Min anndaa moy waati ceede amin nder boorooji amin.”

²³ O jaabi: “Nde'ite, taa kultore! Ɗum Allah mooɗon, Allah baaba mooɗon waatani on ndesaari nder boorooji mooɗon. Ceede mon jottiiɗe yam.” Nden o wurtini Simeyon haa maɓɓe.

²⁴ O nastini ɓe nder saare Yusufu. O waddani ɓe ndiyam haa ɓe loota kosɗe maɓɓe. O hokki bamɗe maɓɓe boo huɗo.

²⁵ Ɓe taaskitini dokkal go hiddeko Yusufu wara caka nyalawma. Ngam ɓe nani, ton ɓe nyaamdata bee maako.

²⁶ Nde Yusufu warti saare, ɓe lii'ani mo dokkal ngal ɓe njogi, ɓe cujidani mo haa lesdi.

²⁷ O ƴami njamu maɓɓe, o wi'i: “Noy baaba mooɗon ndottiijo mo mbi'ɗon yam haala mum, o ɗon yeeɗa na?”

²⁸ Ɓe njaabi mo: “Maccuɗo ma, baaba amin o jamo, o ɗon yeeɗa.” Ɓe turi, ɓe cujidi fahin.

²⁹ Yusufu laari, yi'i Benyamin, deerɗiiko, ɓii daada mum. O ƴami: “Oo woni minyiraawo mooɗon, mo mbi'ɗon yam haala mum na?” O wi'i Benyamin: “Allah mo'ane, ɓiŋngel am!”

³⁰ Nde Yusufu yi'i Benyamin, ɓernde maako heewi ngenka deerɗiiko. O wurti law, o nasti suudu maako, o woyi ton.

³¹ Ɓaawoɗon, o sulmi gite maako, o wurti, o tiɗɗitini, o umri: “Ngadde nyaamdu!”

³² Ɓe njo'inani mo nyaamdu maako dow taabal feere, deerɗiiko'en haa taabal goɗŋgal e Misra'en nyaamdotooɓe bee maako boo feere maɓɓe. Ngam Misra'en nyaamdataa bee Ibraniŋke'en, ngam ɗum karamɗum haa diina maɓɓe.

³³ Deerɗiraaɓe maako njooɗi tiitotiri bee maako. Diga afo fodde afaaku mum haa gaajiijo fodde duuɓi mum. Ɓe ndaarndaartiri, ɓe kayɗini.

³⁴ O neldi ɓe geɗe haa nyaamdu maako. Ammaa geɗal Benyamin ɓuri ɗe maɓɓe ɗuuɗugo cowi jowi. Ɓe njardi, ɓe ceyodi bee maako.