Laataanooji 35 - Fulfulde Bible

Allah barkiɗini Yaakubu haa Baytila

¹ Allah wi'i Yaakubu: “Umma, yah haa Baytila, jooɗa ton. Nyiɓ hirsirde ngam Allah baŋganɗo ma saa'i a ɗonno dogga yeeso deerɗa Isuwa.”

² Yaakubu wi'i yimɓe saare muuɗum e wonduɓe bee muuɗum fuu: “Itte labbi jananɗi gonɗi caka mooɗon, cene ko'e mooɗon, cannje limce.

³ Ummen! Njehen Baytila. Ton nyiɓananmi Allah hirsirde balluɗo yam nder wakkati ɓillaare am, mo wondi bee am koo toy mi tokkino fuu.”

⁴ Ɓe ndokki Yaakubu labbi jananɗi ɗi ɓe marno fuu e yerihon maɓɓe. Yaakubu iri ɗum les lekki makki baŋnge Sikem.

⁵ Ɓe ummi, Allah waɗi kultoreeŋgol dow gure taariiɗe ɓe fuu, ngam taa ɓe tasna ɓiɓɓe Yaakubu.

⁶ Yaakubu e yimɓe wonduɓe bee muuɗum njotti Luus nder lesdi Kanaana, kanjum woni Baytila.

⁷ O nyiɓi hirsirde ton, o inndi nokkuure maajum: “Allah mo Baytila”, ngam Allah waŋgani mo ton saa'i o ɗonno dogga deerɗiiko.

⁸ Deboora, musininnooɗo Rebekka, maayi. Ɓe uwi mo kommbi Baytila, les lekki makki. Ɓe inndi ki: Lekki-bojji.

⁹ Allah waŋgani Yaakubu fahin nde o warti Paddan-Aram. O barkiɗini mo.

¹⁰ O wi'i mo: “Innde maaɗa Yaakubu. Ammaa a ewnataake Yaakubu fahin, innde ma laatoto Isra'iila.” O inndi mo Isra'iila.

¹¹ Nden Allah wi'i mo: “Min woni Allah Baawɗo. Laata ɗuuɗa-asŋgoljo, ɓesda. Laata ummaatoore, ummaatooje ɗuuɗɗe ngurtoto diga maaɗa non boo laamiiɓe ɗuuɗɓe.

¹² Lesdi ndi ndokkumi Ibrahiima e Isiyaaku, mi hokkete ndi, mi hokkan ndi danygol maaɗa ɓaawo ma.”

¹³ Allah eeŋgi, acci mo haa nokkuure nde o wolwani mo.

¹⁴ Yaakubu darni hayre haa nokkuure maajum. O rufi dokkal njaram dow maare, o waɗi nebbam dow maare boo.

¹⁵ Yaakubu inndi nokkuure haa Allah wolwanino mo Baytila.

Maayde Rahiilu

¹⁶ Ɓe ummi Baytila. Nde luttani ɓe seɗɗa yottaago Efrata, Rahiilu ɓesni. Danyki maajum saɗi.

¹⁷ Saa'i Rahiilu ɗon nder luuwe, ɓesninoowo wi'i mo: “Taa hul, ɗum ɓiɗɗo gorko a heɓi!”

¹⁸ Nde yoŋki Rahiilu ɗon wurto ngam o ɗon maaya, o inndi mo Ben-Oni. Ammaa baaba maako inndi mo Benyamin.

¹⁹ Rahiilu maayi, ɓe uwi mo haa kommbi laawol Efrata, kanjum woni Baytilaama.

²⁰ Yaakubu darni hayre siftinorde dow yenaande maako. Ɗum hayre siftinorde yenaande Rahiilu haa wargo hannde.

²¹ Isra'iila tokki laawol mum, darni laymaaru mum gaɗa Migdal-Eder.

²² Wakkati Isra'iila jooɗino nder lesdi maajum, Ruben waaldi bee Bilha, culaaɗo baaba muuɗum. Yaakubu nani haala ka'a. Ɓiɓɓe Yaakubu ngaɗi sappo e ɗiɗo.

²³ Ɓiɓɓe Leya ngoni: Ruben, afo Yaakubu e Simeyon e Lewi e Yahuuda e Issakar e Zabulon.

²⁴ Ɓiɓɓe Rahiilu ngoni: Yusufu e Benyamin.

²⁵ Ɓiɓɓe Bilha, korɗo Rahiilu, ngoni: Dan e Neftali.

²⁶ Ɓiɓɓe Zilpa, korɗo Leya ngoni: Gada e Aser. Kamɓe ngoni ɓiɓɓe Yaakubu danyanaaɓe mo haa Paddan-Aram.

²⁷ Yaakubu yotti haa baaba muuɗum Isiyaaku haa Mamre, haa Kiriyat-Arba, kanjum woni Heburuun. Ton Ibrahiima e Isiyaaku jooɗino.

²⁸ Duuɓi Isiyaaku mbaɗi teemerre e cappanɗe joweetati (180).

²⁹ O maayi, o hawtoyi bee kaakiraaɓe maako, o ndottiijo, caftuɗo balɗe. Isuwa e Yaakubu, ɓiɓɓe maako, uwi mo.