Laataanooji 34 - Fulfulde Bible

Toskaare Dina e baatol Simon bee Lewi

¹ Nyannde feere, Dina ɓiɗɗo debbo mo Leya danyani Yaakubu, wurti ngam yillaago ɓiɓɓe rewɓe lesdi man.

² Sikem ɓii Hamor Hewiijo, laamiiɗo lesdi, yi'i mo. O hoo'i mo, o waaldi bee maako, o toskini mo.

³ Ɓernde Sikem ɗakkotiri bee Dina, ɓii Yaakubu. O yiɗi paanyo debbo oo masin, o ɗaɓɓi de'itingo mo.

⁴ O wi'i baaba maako Hamor: “Ƴamanam ɓiɗɗo debbo oo, te'anam mo.”

⁵ Yaakubu nani ɓiyum Dina toskaama, ammaa nde ɓiɓɓe maako worɓe ɗonno bee dabbaaji haa gese, o jeeɗi haa ɓe ngarti.

⁶ Hamor, baaba Sikem wari haa Yaakubu ngam wolwango mo.

⁷ Saa'i nde ɓiɓɓe Yaakubu ngarti diga ngesa, ɓe nani haala ka'a. Ɗum mettini ɓe, ɓe keewi tikkere masin, ngam Sikem waɗi nyidduɗum nder Isra'iila, nde o waaldi bee ɓii Yaakubu debbo, ko waɗataake.

⁸ Ammaa Hamor wi'i ɓe: “Sikem ɓiyam yiɗi ɓiŋngel nge'el masin, useni te'ne mo ngel.

⁹ Esire bee amin, ndokke min ɓiɓɓe mooɗon rewɓe, koo'e ɓe amin boo ngam ɓikkoy mooɗon worɓe.

¹⁰ Njooɗide bee amin, lesdi ɗon ngam mooɗon, njooɗe, mbaɗe filu, on keɓa mardi.”

¹¹ Sikem wi'i baaba e deerɗiraaɓe Dina: “Acce mi heɓa mo'ere yeeso mooɗon. Ko on ƴamata fuu, mi hokkan.

¹² Njowaneeɗam sadaaki e dokkal ɗuuɗɗum masin, mi hokkan ko ƴamoton fuu, ammaa te'aneeɗam ɓiɗɗo debbo oo.”

¹³ Ɓiɓɓe Yaakubu ƴoyri Sikem e baaba muuɗum Hamor, ngam o toskini deerɗiraawo maɓɓe Dina.

¹⁴ Ɓe mbi'i: “Min mbaawataa te'ango gorko saadooniijo deerɗiraawo amin, ɗum laatanto min mbustu.

¹⁵ Min njaɓanan on to onon boo on njaɓi laataago bana amin, bee juulnugo worɓe mooɗon fuu.

¹⁶ Nden min ndokkan on ɓiɓɓe amin rewɓe, min koo'a ɓe mooɗon, min njooɗodotto bee mooɗon, en laatoto ummaatoore woore.

¹⁷ Ammaa to on nananaay min ngam haa njuulnon kam, min koo'an ɓiŋngel amin, min ndillan.”

¹⁸ Bolle maɓɓe pottani Hamor e ɓiyum Sikem.

¹⁹ Suka oo neeɓaay waɗugo ɗum, ngam o yiɗi ɓii Yaakubu masin. O tedduɗo yeeso yimɓe saare baaba maako fuu.

²⁰ Hamor e ɓiyum Sikem ngari haa dammugal wuro. Ɓe mbolwani worɓe wuro maɓɓe, ɓe mbi'i:

²¹ “Worɓe ɓe'e ɓe kaɓɓotirɓe bee meeɗen. Ɓe njooɗodo bee meeɗen nder lesdi, ɓe mbaɗa filu. Lesdi ɗon yaaji ngam maɓɓe. En te'a ɓiɓɓe maɓɓe rewɓe, en ndokka ɓe ɓe meeɗen boo.

²² Ammaa haa yimɓe ɓe'e njaɓa jooɗodaago bee meeɗen ngam laatooɗen ummaatoore woore kam, sey to worɓe meeɗen fuu njuulnake bana ɓe maɓɓe.

²³ Tokke maɓɓe e mardi maɓɓe e dabbaaji maɓɓe fuu laatanto en. Sey en njaɓana ɓe, haa ɓe njooɗodo bee meeɗen.”

²⁴ Tawaaɓe haa dammugal wuro man fuu nanani Hamor e ɓiyum Sikem. Worɓe wuro man fuu njuulni.

²⁵ Nyalaade tataɓre nde worɓe ɓe'e ɗon bee naawreeŋga, ɓiɓɓe Yaakubu ɗiɗo, Simeyon e Lewi, deerɗiraaɓe Dina koo'i kaafaaje muuɗum'en. Ɓe ngari nder wuro hoolɗiniiŋgo, ɓe mbari worɓe fuu, walaa ko dartani ɓe sam.

²⁶ Hamor e ɓiyum Sikem mbaraama bee kaafahi. Ɓe koociti Dina diga saare Sikem, ɓe ngurti.

²⁷ Ɓiɓɓe Yaakubu woɗɓe ukkani sarraaɓe, ɓe ɓofti marle wuro man fuu, ngam ɓe toskinno deerɗiraawo maɓɓe.

²⁸ Ɓe koo'i dammooji e na'i e bamɗe, ko wonno nder wuro e haa ngesa fuu.

²⁹ Ɓe ndilliri keɓal mardi fuu, ɓe njaɓti ɓikkoy e rewɓe e ko woni nder cuuɗi fuu.

³⁰ Yaakubu wi'i Simeyon e Lewi: “On nastini yam nder saklere! Jonta jooɗiiɓe lesdi ndi'i, Kanaani'en e Perezzi'en fuu nganyatam! Mi ɗon bee jama'aare famarde. Ɓe kawtanto yam, mi nattidan bee saare am fuu!”

³¹ Simeyon e Lewi njaabi: “Goɗɗo waɗan deerɗiraawo amin bana debbo daakaareejo na?”