Laataanooji 31 - Fulfulde Bible

Yaakubu lori haa Kanaana

¹ Yaakubu nani ko ɓiɓɓe Laban mbi'i: “Yaakubu hooci ko baaba meeɗen mari fuu. Bana non o faggani hoore maako risku ngu'u.”

² Yaakubu faami boo hakkiilo Laban sannji, gondal maɓɓe wonaay bana naane.

³ Nden Jawmiraawo wi'i Yaakubu: “Lorta haa lesdi kaakiraaɓe ma, haa asŋgol maaɗa, mi wondan bee maaɗa.”

⁴ Yaakubu neli ewnoyaago Rahiilu e Leya ɓe ngara haa ngesa haa o wonno bee dammooji maako.

⁵ O wi'i ɓe: “Mi ɗon faama no baaba mooɗon wondaay bee am bana naane. Ammaa Allah, mo baaba am ɗon wondi bee am.

⁶ Onon boo on anndi, mi huuwani baaba mooɗon bee semmbe am fuu.

⁷ Baaba mooɗon waɗi yam rikici, o wayliti ngeenaari am nde sappo. Ammaa Allah duŋanaay mo o waɗammi kalluɗum.

⁸ Nde o wi'i: Jamalum laatoto ngeenaari ma, dammooji fuu ndimi jamalum. Nde o wi'ata: Diidaaɗum laatoto ngeenaari ma, dammooji fuu ndimi diidaaɗum.

⁹ Allah hooci dabbaaji baaba mooɗon, hokki yam ɗi.

¹⁰ Ngi'mi nder koyɗol: Wakkati goowrindiral maaji, jawɗi ba'otooɗi debbi laati diidaaɗi e jamali e cirgi.

¹¹ Malaa'ikaajo Allah wolwani yam nder koyɗol: Yaakubu! Mi jaabi: Na'am.

¹² O wi'i: Tijja, laar! Jawɗi ba'otooɗi debbi fuu laati diidaaɗi e jamali e cirgi. Ngam mi yi'i ko Laban waɗno ma fuu.

¹³ Min woni Allah mo waŋgani ma haa Baytila, haa nokkuure nde ndufɗa nebbam dow hayre siftinorde, haa ngaɗanɗa yam togayeere. Jonta kam umma, wurta lesdi ndi'i, lorta haa lesdi asŋgol ma.”

¹⁴ Rahiilu e Leya njaabi mo, mbi'i mo: “Min ngoodi geɗal malla ndonŋgu fahin haa saare baaba amin na?

¹⁵ Naa o hoociri min bana hoɗɓe? Ngam o soorri min, non boo o nyaami saman amin fuu.

¹⁶ Risku ngu Allah itti diga baaba amin fuu, wartani min e ɓikkoy amin. Kadi, waɗ ko Allah wi'i ma fuu.”

¹⁷ Yaakubu ummi, wa'ini ɓikkoy mum e rewɓe mum dow geelooɗi.

¹⁸ O soggi dabbaaji maako e mare maako ɗi o heɓi haa Paddan-Aram fuu, ngam o loro haa baaba maako Isiyaaku nder lesdi Kanaana.

¹⁹ Laban dilluno ta'ugo gaasa baali muuɗum. Saa'i maajum Rahiilu wujji labbi baaba muuɗum.

²⁰ Yaakubu ƴoyri Laban Aramiijo, ngam o anndinaay mo o doggan.

²¹ O doggi bee ko o mari fuu, o dilli. O eeri maayo Efrata, o tiiti gal kooseeje Gile'at.

²² Nyalaade tataɓre, ɓe anndini Laban Yaakubu doggi.

²³ Laban hoo'i deerɗiraaɓe mum, taasni mo. O jokki mo nyalaade joweeɗiɗawre dow kooseeje Gile'at.

²⁴ Ammaa Allah warani Laban Aramiijo nder koyɗol jemma, wi'i mo: “Reenta, taa wolwan Yaakubu koo ɗume!”

²⁵ Laban jokki Yaakubu haa nokkuure nde Yaakubu darnuno laymaaru muuɗum dow hooseere. Laban e deerɗum'en boo darni laymaaru muuɗum'en dow hooseere Gile'at.

²⁶ Laban ƴami Yaakubu: “Ko ngaɗɗaa? A ƴoyri yam, a dilliri ɓiɓɓe am rewɓe bana naŋngaaɓe konu!

²⁷ Koni a doggi bee sirri, a ƴoyri yam, a anndinaay yam? Mi ɗofteteno ma bee seyo e gimi, bee mbaggu e moolooru.

²⁸ A accaay yam mi jaɓɓito ɓiɓɓe am rewɓe e taaniraaɓe am. Haa ɗo kam, a waɗi bana paataaɗo.

²⁹ Mi woodi baawɗe waɗugo on kalluɗum. Ammaa Allah baaba mooɗon wolwani yam haŋki, o wi'i: Reenta, taa wolwan mo koo ɗume!

³⁰ Mi anndi a hooti ngam a yenwi saare baaba ma masin. Ammaa ngam ɗume a wujji ɗowanteeɓe am?”

³¹ Yaakubu jaabi Laban: “Mi huli, ngam mi numi teema a jaɓtatam ɓiɓɓe ma rewɓe.

³² Ammaa mo tawata ɗowanteeɓe maaɗa haa muuɗum, taa o yeeɗa. Ɗaɓɓitit ɗum yeeso banndiraaɓe meeɗen caka ko woni haa am e hoo'u ko laati mardi maaɗa.” Ammaa Yaakubu anndaa Rahiilu wujjino labbi.

³³ Laban nasti laymaaru Yaakubu e laymaaru Leya, nden haa laymaaru horɓe ɗiɗo. O tawaay koo ɗume. O wurti laymaaru Leya, o nasti ndu Rahiilu.

³⁴ Rahiilu hoo'uno labbi, wallini ɗi nder kirke ngeelooba, o jooɗi dow maaji. Laban ɗaɓɓiti nder laymaaru fuu, ammaa o tawaay koo ɗume.

³⁵ Rahiilu wi'i baaba muuɗum: “Taa jaagorɗo am tikka, mi waawaay ummaago yeeso maaɗa. Ɗum wakkati lootgol am.” Laban ɗaɓɓiti koo toy, ammaa o tawaay labbi go.

³⁶ Yaakubu tikki, jokkiri bee Laban, wi'i mo: “Toy aybe am? Toy hakkewol am ngam haa a taasnammi bee tiɗɗinaare bana nii?

³⁷ A wiɗiti kuuje am fuu. Ɗume tawɗa diga kuuje saare ma? Hollu ɗum haa ɗo yeeso deerɗiraaɓe am e deerɗiraaɓe ma, ɓe ta'a kiita hakkunde meeɗen ɗiɗo!

³⁸ Waɗi duuɓi noogas mi ɗon wondi bee maaɗa. Baali ma e be'i ma coldinaay. Mi nyaamaay jawɗi tokkere ma.

³⁹ Mi meeɗaay wartirango ma ko huunde ladde faɗɗi. Mi ɗonno efta, mi yoɓa. Ko wujja jemma malla naaŋge, a nyaamti ɗum haa am.

⁴⁰ Nguli naaŋge torri yam nyalawma non jaaŋgol boo jemma. Ɗoyŋgol doggi gite am.

⁴¹ Waɗi duuɓi noogas mi ɗon haa saare ma. Mi huuwani ma duuɓi sappo e nayi ngam ɓiɓɓe ma rewɓe ɗiɗo, nden duuɓi joweego ngam dammooji ma! A wayliti ngeenaari am nde sappo.

⁴² To naa Allah maama am, Allah Ibrahiima, mo baaba am Isiyaaku ɗowtani ɗum wonduno bee am, fakat a accatamno mi dilla juuɗe meere. Ammaa Allah laari bone am e kuugal am, haŋki o ta'i haala man.”

⁴³ Laban jaabi Yaakubu: “Ɓiɓɓe rewɓe ɓe'e ɗum ɓiɓɓe am, ɓikkoy koy ɗum ɓikkoy am, dammooji ɗi'i ɗum dammooji am, ko ngi'ata fuu min jeyi. Ɗume ngaɗananmi ɓiɓɓe am rewɓe hannde e ɓikkoy muuɗum'en koy ɓe ndanyi?

⁴⁴ War jonta, en kaɓɓotir alkawal, min bee maaɗa, ngam ɗum laato seedamku hakkunde am bee maaɗa.”

⁴⁵ Nden Yaakubu hoo'i hayre, darni nde siftinorde.

⁴⁶ Nden o wi'i yimɓe maako: “Ɓofte kaa'e.” Ɓe ɓofti kaa'e, ɓe mbaagi ɗe, ɓe nyaami dow waagaare maajum.

⁴⁷ Laban inndi nde Yegar-Sahaduta, Yaakubu boo inndi nde Galet.

⁴⁸ Laban wi'i: “Waagaare nde'e laato hannde seedorammaaku hakkunde am bee maaɗa.” Ngam maajum ɓe inndi nde Galet.

⁴⁹ Ɓe inndi nde boo Mispa, ngam Laban wi'no boo: “Jawmiraawo heedo hakkunde am bee maaɗa, yaake en laatoto daaytotirɓe.

⁵⁰ To a toskini ɓiɓɓe am rewɓe, to a ɓaŋgi rewɓe woɗɓe dow maɓɓe, koo to walaa neɗɗo wondi bee meeɗen, anndu Allah woni ceedoowo hakkunde am bee maaɗa.”

⁵¹ Laban wi'i Yaakubu: “Ndaa waagaare nde mbaagumi hakkunde am bee maaɗa, ndaa boo hayre siftinorde.

⁵² Waagaare e hayre siftinorde, ɗiɗi fuu laato seedamku. Min mi saalataako waagaare nde'e ngam honoygo ma. An boo a saalataako waagaare nde'e e hayre siftinorde nde'e ngam honoygo yam.

⁵³ Allah mo Ibrahiima e Nahor, hiito hakkunde meeɗen.” Nden Yaakubu hunori bee Allah mo baaba maako Isiyaaku ɗowtani ɗum bee kulol.

⁵⁴ Yaakubu lii'ani Allah kirsaaŋga dow hooseere, o ewnoyi banndiraaɓe maako dow nyaamdu. Ɓe nyaami, nden ɓe mbaali dow hooseere jemma man.