Laataanooji 3 - Fulfulde Bible

Aadamu e Hawwa mbaɗi hakke

¹ Dabbaaji ladde ɗi Jawmiraawo Allah tagi fuu, mboodi ɓuri ɗi ƴoyre. Ndi ƴami debbo: “Gooŋga Allah wi'i taa on nyaama ɓiɓɓe leɗɗe jarne fuu na?”

² Debbo jaabi mboodi: “Min mbaawan nyaamugo ɓiɓɓe leɗɗe jarne.

³ Ammaa ko laarani ɓiɓɓe lekki gonki caka jarne kam, Allah wi'i: Taa nyaame ɗe, taa meeme ɗe boo, ngam taa maayon!”

⁴ Mboodi wi'i debbo: “Woodaa! On maayataa!

⁵ Ammaa Allah anndi, nyalaade nde on nyaami ɗe, gite mooɗon maɓɓititto, on laatoto bana Allah, on anndan ko woni booɗɗum e kalluɗum.”

⁶ Debbo yi'i ɓiɓɓe lekki man welani nyaamugo, ɗe pottani gite, ɗe mbooɗi masin haa hokkugo hakkiilo. O hoo'i haa ɓiɓɓe maaki, o nyaami, nden o hokki goriiko mo ɗonno kommbi maako, gorko boo nyaami.

⁷ Law gite maɓɓe maɓɓiti, ɓe annditi ɓe temmbuɓe. Ngam maajum ɓe mbami haakooji ibbi, ɓe mbaɗi ɗum bana gude.

⁸ Nde hiiri, ɓe nani sonyo, Allah Jawmiraawo ɗon waanca nder jarne. Gorko e debbo muuɗum nyukki yeeso Allah Jawmiraawo caka leɗɗe jarne.

⁹ Jawmiraawo Allah ewni neɗɗo, ƴami mo: “Toy ngonɗaa?”

¹⁰ Neɗɗo jaabi: “Mi nani sonyo maaɗa nder jarne. Mi hultori, ngam mi temmbo. Ngam maajum nyukkiimi.”

¹¹ Allah Jawmiraawo ƴami: “Moy anndin ma a temmbo? Malla a nyaami ɓiɓɓe lekki ki kaɗnomaami nyaamugo go?”

¹² Neɗɗo jaabi: “Debbo gonduɗo bee am, mo ndokkuɗaami, hokki yam ɓiɓɓe lekki, mi nyaami.”

¹³ Allah Jawmiraawo wi'i debbo: “Ngam ɗume mbaɗɗaa ɗum?” Debbo jaabi: “Mboodi esti yam, mi nyaami.”

¹⁴ Nden Allah Jawmiraawo wi'i mboodi: “Nde a waɗi ɗum, a naalaaɗo caka dabbaaji e kuuje ladde fuu. A dasoto dow reedu maaɗa, a nyaaman mbulwuldi balɗe ngeendam maaɗa fuu.

¹⁵ Mi waɗan konnaagu hakkunde maaɗa e debbo, hakkunde danygol maaɗa e danygol maako. Goɗɗo danygol maako namete hoore, an boo a ŋatan mo teppere.”

¹⁶ Nden o wi'i debbo: “Mi ɗuɗɗinan luuwe danyki maaɗa. A danyan bee bone. A yenwan gondal bee gorko maaɗa, ammaa o laamoto dow maaɗa.”

¹⁷ Nden o wi'i neɗɗo: “A jaɓani debbo maaɗa, a nyaami ɓiɓɓe lekki ki kaɗnomaami nyaamugo. Ngam daliila maaɗa mi naali lesdi. Bee bone keɓata ko nyaama haa maari balɗe maaɗa fuu.

¹⁸ Ndi fuɗnante gi'e e giŋngille, a nyaaman haakooji gese.

¹⁹ Bee wulweende yeeso maaɗa nyaamrata nyaamdu ma, haa to a lortake haa mbulwuldi, ngam haa maari a hoo'a. An a mbulwuldi, haa mbulwuldi boo lorotoɗa!”

²⁰ Neɗɗo inndi debbo muuɗum: Hawwa, bana wi'go “Geeto”, ngam kaŋko woni daada yeeɗɓe fuu.

²¹ Jawmiraawo Allah waɗani Aadamu e debbo maako kolte lare, o ɓorni ɓe.

²² O wi'i: “Ndaa, nde neɗɗo laatake bana gooto meeɗen, o anndi ko woni booɗɗum e kalluɗum. Jonta kam taa o forta juŋngo maako, o hoo'a boo ɓiɓɓe lekki ngeendam. To o nyaami, o yeeɗan haa foroy.”

²³ Nden Jawmiraawo Allah wurtini mo jarne Adnin, ngam o remoya lesdi ndi o hoo'ano e muuɗum.

²⁴ Ɓaawo nde o riiwi mo, o darni keruba'en haa fuunaaŋge jarne Adnin bee kaafahi ɗelkanki bana ɗemŋgal yiite, ki ɗon yirla nder bakeeje fuu, ngam aynugo laawol jahranŋgol haa lekki ngeendam.