Laataanooji 29 - Fulfulde Bible

Yaakubu yotti saare Laban

¹ Yaakubu tokkitini laawol muuɗum, yehi gal lesdi yimɓe fuunaaŋge.

² Nyanndere feere o yi'i ɓulndu nder ladde. Tokke dammooji tati ɗonno mbaali kommbi maaru, ngam ton waynaaɓe njarnata tokke. Hayre mawnde ɗonno maɓɓi ndu.

³ To tokke fuu mooɓtake, ɓe talla hayre diga hunnduko ɓulndu, ɓe njarna dammooji, ɓaawoɗon ɓe lorna hayre go fahin dow hunnduko ɓulndu haa nokkuure maare.

⁴ Yaakubu ƴami waynaaɓe: “Deerɗiraaɓe am, diga toy iwɗon?” Ɓe njaabi: “Min iwi diga Haran.”

⁵ O ƴami ɓe: “On anndi Laban ɓii Nahor na?” Ɓe mbi'i: “Min anndi mo.”

⁶ O ƴami ɓe: “O jamo na?” Ɓe njaabi: “O jamo. Ndaa, Rahiilu, ɓiyiiko debbo, ɗon wara bee baali.”

⁷ O wi'i ɓe: “Ndaa, naaŋge ɓaŋgtake, wakkati mooɓtugo dabbaaji siwaa. Njarne ɗi, nden on lorna ɗi haa ngaynaaka”.

⁸ Ɓe mbi'i: “Min mbaawataa waɗugo ɗum, sey to tokke fuu mooɓtake. Nden min talla hayre diga hunnduko ɓulndu, min njarna baali.”

⁹ Yaake o ɗon wolida bee maɓɓe tawon, Rahiilu wari bee baali baaba muuɗum, ngam o gaynaako.

¹⁰ Nde Yaakubu yi'i Rahiilu, ɓii Laban kaawu muuɗum bee dammooji, o ɓaditi, o talli hayre diga hunnduko ɓulndu, o yarni baali Laban, kaawu maako.

¹¹ Nden o hebbi Rahiilu, o fuɗɗi woyugo bee sawtu.

¹² O faamtini Rahiilu no o banndiri bee baaba maako, o ɓii Rebekka. Rahiilu doggi, anndini ɗum baaba muuɗum.

¹³ Nde Laban nani habaru dow Yaakubu, ɓii deerɗiiko debbo, o doggi haa o fottoya bee maako. O harli mo, o hebbi mo, o yahri mo nder saare maako. Yaakubu boo anndini Laban habaru fuu.

¹⁴ Laban wi'i mo: “Fakat a banndiraawo am ɓadiiɗo.” Yaakubu faɓɓi haa maako lewru.

Yaakubu te'i Leya e Rahiilu

¹⁵ Laban wi'i Yaakubu: “A huuwantam meere ngam a banndiraawo am na? Wi' am ɗume laatoto ngeenaari ma?”

¹⁶ Laban woodino ɓiɓɓe rewɓe ɗiɗo. Innde addaajo, Leya, innde minyiraawo boo, Rahiilu.

¹⁷ Gite Leya pure, ammaa Rahiilu o ŋarniiɗo ɓanndu e daarɗe.

¹⁸ Yaakubu yiɗi Rahiilu, o wi'i Laban: “Mi huuwante duuɓi joweeɗiɗi ngam Rahiilu, ɓiya minyiraajo.”

¹⁹ Laban wi'i: “Ndikka mi hokke mo, ɓuran dow hokkugo mo goɗɗo feere. Jooɗa haa am.”

²⁰ Yaakubu huuwi duuɓi joweeɗiɗi ngam Rahiilu. Ɗi laati haa maako bana nyalɗe seɗɗa non, ngam o yiɗi mo masin.

²¹ Nden Yaakubu wi'i Laban: “Hokkam debbo am, ngam nyalɗe am ɗe mi huuwante ciki, mi nastan haa maako.”

²² Laban mooɓti worɓe wuro fuu, waɗani ɓe nyaamdu ɓaŋgal.

²³ Nde maŋngariba waɗi, o hoo'i ɓiyiiko Leya, o yahri mo haa Yaakubu, kaŋko o hawti bee maako.

²⁴ Laban hokki korɗo muuɗum Zilpa haa Leya, ɓiyiiko, o laato korɗo maako.

²⁵ Nde weeti, Yaakubu yi'i ɗum Leya. O wi'i Laban: “Koni mbaɗɗaami ɗum? Naa ngam Rahiilu mi huuwani ma na? Koni mbaɗɗaa yam rikici?”

²⁶ Laban jaabi: “Haa al'aada wuro amin, minyiraawo aartataa adda mum te'eego.

²⁷ Timmin asaweere ɓaŋgal bee maako, nden mi hokkete oya boo, dow kuugal ngal a tammi huuwango yam duuɓi joweeɗiɗi goɗɗi fahin.”

²⁸ Yaakubu jaɓi, timmini asaweere man bee Leya. Nden Laban hokki mo ɓiyum Rahiilu bana debbo fahin.

²⁹ Laban hokki korɗo muuɗum Bilha haa Rahiilu, ɓiyum, o laato korɗo maako.

³⁰ Yaakubu hawti bee Rahiilu boo, o ɓuri yiɗugo Rahiilu dow Leya. O huuwani Laban duuɓi joweeɗiɗi goɗɗi.

Ɓiɓɓe Yaakubu

³¹ Nde Jawmiraawo yi'i Leya ganyaaɗo, o waɗi mo o danyoowo. Ammaa Rahiilu jooɗi dimaro.

³² Leya reedi, danyi ɓiɗɗo gorko. O inndi mo: Ruben, o wi'i: “Jawmiraawo laari toskaare am. Jonta kam gorko am yiɗatam.”

³³ Kadiboo o reedi, o danyi ɓiɗɗo gorko. O wi'i: “Jawmiraawo nani mi ganyaaɗo, ngam maajum o hokki yam oo boo.” O inndi mo Simeyon.

³⁴ Kadiboo o reedi, o danyi ɓiɗɗo gorko. O wi'i: “Jonta kam, gorko am ɗakkotiran bee am, ngam mi danyani mo ɓiɓɓe tato.” Ngam maajum o inndi mo Lewi.

³⁵ Kadiboo o reedi, o danyi ɓiɗɗo gorko. O wi'i: “Jonta mi maŋgtan Jawmiraawo.” Ngam maajum o inndi mo Yahuuda. Nden o acci danyugo.