Laataanooji 26 - Fulfulde Bible

Isiyaaku bee Abimelek haa Gerar e Biirsaba

¹ Weelo waɗi nder lesdi, naa ɗum weelo arannde waɗŋgo nder zamanu Ibrahiima. Isiyaaku yehi Gerar, haa Abimelek, laamiiɗo Filisti'en.

² Jawmiraawo waŋgani mo, wi'i: “Taa yah haa Misra, ammaa jooɗa nder lesdi ndi mi hollete.

³ Faɓɓu nder maari, mi wondan bee ma, mi barkiɗinte. Ngam an danygol ma ndokkanmi lesɗe ɗe'e fuu. Mi tabitinan hunayeere nde kunaniimi baaba ma Ibrahiima.

⁴ Mi ɗuɗɗinan danygol ma bana koode asama, mi hokkan danygol ma lesɗe ɗe'e fuu. Daliila danygol maaɗa, ummaatooje duniyaaru fuu keɓan barka.

⁵ Ngam Ibrahiima nanani yam, ɗowtani umrooje am e farillaaji am e sarɗiiji am fuu.”

⁶ Bana non Isiyaaku jooɗori haa Gerar.

⁷ Nde worɓe wuro man ƴami mo haala debbo maako, o wi'i: “O deerɗiraawo am.” O huli wi'go: “O debbo am.” Ngam o huli taa worɓe lesdi man mbara mo daliila Rebekka, ngam o ŋarniiɗo.

⁸ Nde Isiyaaku duuri ton seɗɗa, nyannde feere Abimelek, laamiiɗo Filisti'en yurni haa wurdere suudu. O yi'i no Isiyaaku fijiri bee debbo muuɗum Rebekka.

⁹ Abimelek ewni Isiyaaku, wi'i: “O debbo ma sike! Koni mbi'ɗaa o deerɗiraawo ma?” Isiyaaku jaabi mo: “Mi wi'i ɗum ngam mi huli mbareego daliila maako.”

¹⁰ Abimelek wi'i: “Kayya! Ɗume mbaɗɗaa min ɗo? Luttino seɗɗa gooto nder ummaatoore nde'e waaldanno bee debbo ma, nden a aybinanno min.”

¹¹ Abimelek umri yimɓe fuu, o wi'i: “Meemɗo gorko oo bee debbo maako, kiiteteeɗo kiita mbareego.”

¹² Hitaande maajum, Isiyaaku aawino nder lesdi maajum. O ƴaamni cowi teemerre ko o aawi, ngam Jawmiraawo barkiɗini mo.

¹³ O riski masin. Risku maako yehi yeeso yeeso haa o laati mawɗo masin.

¹⁴ O mari tokke dammooji e tokke na'i e suka'en ɗuuɗɓe. Ngam maajum Filisti'en kaaji mo.

¹⁵ Ɓulli ɗi huuwooɓe baaba maako Ibrahiima ngasno naane fuu, Filisti'en uwi ɗi, kebbini ɗi lesdi.

¹⁶ Abimelek wi'i Isiyaaku: “Dillu diga ɗo, ngam a ɓurdi min baawɗe.”

¹⁷ Isiyaaku dilli, waɗi saŋngeere muuɗum nder waadiwol Gerar. O jooɗi ton.

¹⁸ Isiyaaku ufti ɓulli ndiyam ɗi ɓe ngasno nder zamanu baaba muuɗum Ibrahiima, ɗi Filisti'en uwno ɓaawo maayde Ibrahiima. O ewni ɗi bee inɗe ɗe baaba maako inndinno ɗi.

¹⁹ Suka'en Isiyaaku ngasi ɓulndu nder gaaruwol, ɓe tawi seeɓoore.

²⁰ Waynaaɓe Gerar njokkiri bee ɓe Isiyaaku, ɓe mbi'i: “Ndiyam ɗa'am, minin mari ɗam.” Isiyaaku inndi ɓulndu maajum Esek, ngam ɓe njokkirno bee maako.

²¹ Nden suka'en maako ngasi ɓulndu woɗndu, ɓe njokkiri dow maaru boo. O inndi ndu Sitna.

²² O ummi diga ton, o wasi ɓulndu woɗndu fahin, dow maaru kam ɓe njokkiraay. O inndi ndu Rehobot, ngam o wi'i: “Jonta Jawmiraawo waɗani en babal peeciiŋgal, ngam en ɓesdo nder lesdi.”

²³ O dilli diga ton haa Biirsaba.

²⁴ Jawmiraawo waŋgani mo jemmaare maajum, wi'i: “Min woni Allah mo baaba ma Ibrahiima. Taa hul, ngam mi ɗon wondi bee ma. Mi barkiɗinte, mi ɗuɗɗinan danygol ma ngam daliila Ibrahiima jaggiiɗo am.”

²⁵ Isiyaaku mahi hirsirde haa nokkuure man, o ewni innde Jawmiraawo nder do'a. O darni laymaaru maako ton, suka'en maako ngasi ɓulndu woɗndu.

²⁶ Abimelek wari diga Gerar, ngam laarugo mo. O wardi bee Ahusat, soobaajo maako e Pikol, hooreejo honooɓe maako.

²⁷ Isiyaaku ƴami ɓe: “Ngam ɗume ngarɗon laarugo yam? On nganyi yam, on ndiiwi yam diga mooɗon.”

²⁸ Ɓe njaabi: “Min ngi'i laaɓɗum tal Jawmiraawo ɗon wondi bee ma. Ngam maajum min mbi'i sey hunayeere waɗe hakkunde meeɗen, waato hakkunde amin bee maaɗa. Min kaɓɓa alkawal bee maaɗa:

²⁹ Hunana min a waɗataa min kalluɗum, bana minin boo min mbaɗanaay ma kalluɗum, min mbaɗani ma booɗɗum tan, min acci ma a dilli jam. Jonta a laati mo Jawmiraawo barkiɗini.”

³⁰ Isiyaaku waɗani ɓe nyaamduuji, ɓe nyaami, ɓe njari.

³¹ Ɓe ndawi fajiri cub, ɓe kunotiri. Nden Isiyaaku jaɓɓiti ɓe, ɓe ceedi bee maako nder jam.

³² Nyalaade man suka'en Isiyaaku ngari, anndini mo haala ɓulndu ndu ɓe ngasi, ɓe mbi'i mo: “Min njokki ndiyam.”

³³ O inndi ndu Saba, ngam maajum innde wuro ngo laati Biirsaba haa wargo hannde.

Rewɓe Isuwa jananɓe

³⁴ Nde Isuwa waɗi duuɓi cappanɗe nayi (40), o te'i Yehuudit ɓii Beeri Hetiijo. O te'i boo Basmat ɓii Elon Hetiijo.

³⁵ Ɓe mettini Isiyaaku e Rebekka masin.