Laataanooji 22 - Fulfulde Bible

Jawmiraawo foondi Ibrahiima

¹ Ɓaawo kuuje ɗe'e, Allah foondi Ibrahiima, wi'i mo: “Ibrahiima!” O jaabi: “Na'am.”

² Allah wi'i: “Hoo'u ɓiya bajjo, Isiyaaku mo ngiɗɗa, yah nder lesdi Moriya. Lii'a mo ton bana nguleteeŋga dow hooseere nde mi tammi tinndinango ma.”

³ Ibrahiima dawi cub, daɗɗi wamnde mum, hoo'i suka'en mum ɗiɗo e ɓiyum Isiyaaku. O seeki leɗɗe ngam nguleteeŋga, nden o ummi, o dilli haa nokkuure nde Allah wi'no mo.

⁴ Nyannde tataɓre Ibrahiima tijji, eewi nokkuure maajum diga daayiiɗum.

⁵ O wi'i suka'en maako: “Njooɗe haa ɗo bee wamnde. Ammaa min bee derkeejo min njahan haa too, min cujida, nden min loroto haa mooɗon.”

⁶ Ibrahiima hoo'i leɗɗe ngam nguleteeŋga, wallini ɗe dow ɓiyum Isiyaaku. O hoo'i yiite bee laɓi. Ɓe ndillidi, ɓe ɗiɗo fuu.

⁷ Nden Isiyaaku wi'i Ibrahiima, baaba muuɗum: “Baaba!” Ibrahiima jaabi: “Ndaa yam, ɓiŋngel am.” Isiyaaku ƴami: “Ndaa yiite bee leɗɗe, ammaa toy jawgel guleteeŋgel?”

⁸ Ibrahiima jaabi: “Ɓiŋngel am, Allah hiɓɓan ɗum, heɓanan hoore mum jawgel guleteeŋgel.” Ɓe tokki yahdugo, ɓe ɗiɗo fuu.

⁹ Nde ɓe njotti nokkuure nde Allah wi'no Ibrahiima, o mahi hirsirde, o yowndindiri leɗɗe. O haɓɓi ɓiyiiko Isiyaaku, o wallini mo dow hirsirde, haa dow leɗɗe.

¹⁰ Nden o forti juŋngo maako, o hoo'i laɓi ngam o hirsa ɓiyiiko.

¹¹ Ammaa malaa'ikaajo Jawmiraawo ewni mo diga asama: “Ibrahiima! Ibrahiima!” O jaabi: “Na'am.”

¹² Malaa'ikaajo wi'i: “Taa meem derkeejo, taa waɗ mo koo ɗume! Ngam jonta mi annditi a kulɗo Allah, ngam a haɗaay yam ɓiɗɗo maaɗa bajjo.”

¹³ Ibrahiima ɓaŋgti gite, yi'i njawdiri mbaalu ɓaawo maako. Luwe maari ɗon njomi nder wumre sukkunde. O yehi, o hoo'i ndi, o lii'ani ndi Allah nguleteendi haa mbattudi ɓiyiiko.

¹⁴ Ibrahiima inndi nokkuure man Jawmiraawo hiɓɓan ɗum. Haa hannde ɗum ɗon wi'e: “Dow hooseere Jawmiraawo, ɗum hiɓɓoto”.

Allah barkiɗini Ibrahiima ɓaawo poondol

¹⁵ Malaa'ikaajo Jawmiraawo ewni Ibrahiima nde ɗiɗawre diga asama,

¹⁶ wi'i: “Mi ɗon hunoro hoore am – non Jawmiraawo wi'i – ngam a waɗi ɗu'um, a haɗaay yam ɓiɗɗo ma bajjo,

¹⁷ fakat mi barkiɗinte, mi ɗuɗɗinan danygol maaɗa masin, bana koode asama, bana njaareendi maayo. Danygol ma jaɓtan berniiji konne'en muuɗum'en.

¹⁸ Daliila danygol ma mi barkiɗinan ummaatooje duniyaaru fuu, ngam a ɗowtani koŋngol am.”

¹⁹ Ibrahiima lori haa suka'en muuɗum, ɓe fuu ɓe lortidi Biirsaba. Ibrahiima jooɗi ton.

Danygol Nahor, deerɗiraawo Ibrahiima

²⁰ Ɓaawo kuuje ɗe'e, ɓe anndini Ibrahiima: “Ndaa, Milka boo danyani deerɗa Nahor ɓiɓɓe worɓe:

²¹ Uus, afo maako e Bus, deerɗum e Kemuwel, baaba Aram

²² e Keset e Haso e Pildas e Yidilaf e Betu'iila.”

²³ Betu'iila danyi Rebekka. Njoweetato ɓe'e, ngoni ɓiɓɓe ɓe Milka danyani Nahor, deerɗiraawo Ibrahiima.

²⁴ Culaaɗo maako Rewma danyi Tebak e Gaham e Tahas e Ma'aka.