Laataanooji 21 - Fulfulde Bible

Danyeeki Isiyaaku

¹ Jawmiraawo woonani Saraatu, waɗani mo bana o wi'no.

² Saraatu reedi, danyani Ibrahiima ɓiɗɗo gorko nder ndottaaku muuɗum, nder saa'iire nde Allah wi'no mo.

³ Ibrahiima inndi ɓiɗɗo mo Saraatu danyani mo Isiyaaku.

⁴ Ibrahiima juulni ɓiyum nyalaade joweetataɓre bana Allah umruno mo.

⁵ Ibrahiima woodino duuɓi teemerre (100), nde o danyana Isiyaaku.

⁶ Saraatu wi'i: “Allah jalni yam ngam seyo. Koo moy nananɗo ɗum, jalan ngam daliila am.”

⁷ O wi'i boo: “Moy yeccanno Ibrahiima: Saraatu musinanno ɓiɓɓe? Ammaa mi danyani mo ɓiɗɗo gorko nder ndottaaku maako.”

⁸ Ɓiŋngel mawni. Nyannde ngel enta, Ibrahiima waɗi nyaamduuji ɗuuɗɗi.

Hajara e Isma'iilu ndiiwaama

⁹ Nyannde wonnde, Saraatu yi'i Isma'iilu mo Hajara Misraajo danyani Ibrahiima, ɗon fija.

¹⁰ O wi'i Ibrahiima: “Riiw korɗo oo bee ɓiyum! Ngam ɓii korɗo oo rondataa bee ɓiyam Isiyaaku.”

¹¹ Haala ka'a fottanaay Ibrahiima sam, ngam Isma'iilu boo ɗum ɓiyiiko.

¹² Ammaa Allah wi'i Ibrahiima: “Taa laar ɗum bana kalluɗum dow derkeejo e korɗo ma. Waɗ ko Saraatu wi'i ma fuu, ngam bee Isiyaaku keɓrata danygol ma.

¹³ Ammaa ɓii korɗo boo, mi laatinan mo ummaatoore, ngam o danygol ma.”

¹⁴ Jaŋngo maajum Ibrahiima dawi cub, hoo'i nyaamdu e kanyakanyaawu ndiyam, hokki ɗum Hajara. O jo'inani ɓiŋngel dow balawal. O jaɓɓiti mo. Hajara dilli, ɗon yiilo nder ladde Biirsaba.

¹⁵ Nde ndiyam nder kanyakanyaawu timmi, o acci ɓiŋngel les wumre.

¹⁶ Nden o dilli baakin fiɗaande kurol, o jooɗi, o tiiti ngel. Ngam o wi'i: “Taa mi laara maayde ɓiŋngel.” O jooɗi, o tiiti ngel, o fuɗɗi woyugo.

¹⁷ Allah nani sawtu derkeejo. Malaa'ikaajo Allah ewni Hajara diga asama, wi'i mo: “Ko waɗ ma, Hajara? Taa hul, ngam Allah nani bojji derkeejo haa o woni.

¹⁸ Umma, hoo'u mo, joga mo haa juŋngo booɗɗum, ngam mi laatinan mo ummaatoore mawnde.”

¹⁹ Allah maɓɓiti gite Hajara, o yi'i seeɓoore ndiyam. O yehi, o hebbini kanyakanyaawu, o yarni derkeejo.

²⁰ Allah wondi bee derkeejo, o mawni, o jooɗi nder ladde. O laati gawjo.

²¹ O jooɗi nder ladde Paran. Daada maako te'ani mo debbo iwɗo lesdi Misra.

Ibrahiima e Abimelek kaɓɓi alkawal

²² Saa'i maajum Abimelek wardi bee Pikol, hooreejo honooɓe muuɗum haa Ibrahiima, wi'i mo: “Allah ɗon wondi bee ma nder ko mbaɗata fuu.

²³ Jonta ɗo, hunoranam bee Allah, a zammbataako yam, koo ɓiyam, koo taaniraawo am. Bana mi waɗirani ma mbooɗeeŋga, non an boo waɗanam, min e lesdi ndi ngonɗa nder maari jonta.”

²⁴ Ibrahiima wi'i: “Mi hunake.”

²⁵ Nden Ibrahiima feli Abimelek ngam haala ɓulndu ndu maccuɓe Abimelek njaɓti.

²⁶ Abimelek wi'i: “Mi anndaa mo waɗi ɗum. An boo a yeccaay yam, mi meeɗaay nanugo ɗum, sey hannde.”

²⁷ Nden Ibrahiima hoo'i dammooji e na'i, hokki ɗi Abimelek. Ɓe ɗiɗo fuu ɓe kaɓɓotiri alkawal.

²⁸ Ibrahiima hoo'i borti joweeɗiɗi haa dammooji, darni ɗi sera.

²⁹ Abimelek wi'i Ibrahiima: “Ɗume borti joweeɗiɗi ɗi'i, ɗi ndarnuɗa sera ngaɗata?”

³⁰ O jaabi: “Borti joweeɗiɗi ɗi'i, jaɓ ɗi diga juŋngo am ngam seedaago no min wasi ɓulndu ndu'u.”

³¹ Ngam maajum nokkuure nde'e ewna Biirsaba, ngam ɓe ɗiɗo fuu ɓe kunino ton.

³² Bana non ɓe kaɓɓiri alkawal haa Biirsaba. Abimelek ummi bee Pikol, hooreejo honooɓe muuɗum, lorti haa lesdi Filisti'en.

³³ Ibrahiima jubi lekki aslahi haa Biirsaba. Haa ton o ewni innde Jawmiraawo, Allah duumiiɗo nder do'a.

³⁴ Ibrahiima faɓɓi nyalɗe ɗuuɗɗe nder lesdi Filisti'en.