Laataanooji 20 - Fulfulde Bible

Ibrahiima e Abimelek

¹ Ibrahiima ummi diga ton, dilli gal tayre Lesdi Fombina. O jooɗi hakkunde Kaades bee Sura. O faɓɓi haa Gerar.

² Ibrahiima wi'i yimɓe, Saraatu debbo maako ɗum deerɗiiko. Abimelek, laamiiɗo Gerar neli, hoo'i Saraatu.

³ Allah wari haa Abimelek jemma nder koyɗol, wi'i mo: “A maayan ngam daliila debbo mo koo'uɗa, ngam o te'aaɗo.”

⁴ Ammaa Abimelek ɓaditaakino mo. O wi'i: “Yaa Jawmiraawo, a halkan ummaatoore koo to nde adiliinde na?

⁵ Naa kaŋko wi'i yam: O deerɗam na? Debbo boo wi'i: O deerɗam. Mi waɗi ɗum bee ɓernde laaɓnde e juuɗe laaɓɗe.”

⁶ Allah jaabi mo nder koyɗol: “Min boo mi anndi a waɗi ɗum bee ɓernde laaɓnde. Ngam maajum mi haɗi ma waɗugo hakke dow am. Mi accaay ma a meema mo.

⁷ Jonta lornan gorko oo debbo mum, ngam o annabiijo. O do'anto ma, a yeeɗan. Ammaa to a lornataa debbo oo, anndu a maayan fakat, ko marɗa fuu nattan.”

⁸ Abimelek dawi cub, ewni suka'en mum fuu. O yecci ɓe bolle ɗe'e fuu. Ɓe kultori masin.

⁹ Abimelek ewnoyi Ibrahiima, o wi'i mo: “Ɗume mbaɗɗaa min? Aybewol ngole ngaɗanmaami haa ngadda hakkewol maŋngol bana ngo'ol dow am e dow laamu am? A huuwi yam kuuɗe ɗe goɗɗo huuwataa!”

¹⁰ Nden Abimelek tokki wolwango Ibrahiima: “Ɗume nufiiɗaa haa ngaɗaa huunde nde'e?”

¹¹ Ibrahiima jaabi: “Mi tammi, kulol Allah woodaa haa nokkuure nde'e, ɓe mbaratam ngam daliila debbo am.

¹² Dow maajum boo, o deerɗam fakat. Baaba amin gooto, ammaa daada maako feere. Bana nii o laatori debbo am.

¹³ Nde Allah yiilni yam daayiiɗum bee saare baaba am, mi wi'i debbo: Waɗanam mbooɗeeŋga bee wi'go mi deerɗa koo toy njahten fuu.”

¹⁴ Abimelek hoo'i dammooji e na'i e maccuɓe e horɓe, hokki Ibrahiima. O lornani mo boo Saraatu, debbo maako.

¹⁵ Abimelek wi'i: “Ndaa, lesdi am ɗon yeeso ma. Jooɗa haa fottani gite ma.”

¹⁶ O wi'i Saraatu boo: “Ndaa, mi hokki deerɗa ceede cardi ujineere. Ɗum alaama ka seedanta ma a laaɓɗo yeeso wonduɓe bee ma fuu.”

¹⁷ Nden Ibrahiima tori Allah, Allah boo yamɗitini Abimelek bee debbo mum e horɓe muuɗum, ɓe ndanyi fahin.

¹⁸ Ngam Jawmiraawo wartirno rewɓe nder saare Abimelek fuu rimarɓe daliila Saraatu, debbo Ibrahiima.