Laataanooji 12 - Fulfulde Bible

Allah ewni Abraama

¹ Jawmiraawo wi'i Abraama: “Wurta lesdi maaɗa e lenyol maaɗa e saare baaba maaɗa. Yah haa lesdi ndi mi hollete.

² Mi laatinte ummaatoore mawnde, mi barkiɗinte, mi mawninan innde maaɗa. A laatanto woɗɓe daliila barka.

³ Mi barkiɗinan barkiɗinanɓe ma, mi naalan naalanɓe ma. Ngam daliila maaɗa asli duniyaaru fuu keɓan barka.”

⁴ Abraama dilli, bana Jawmiraawo wi'no mo, Ludu yahdi bee maako. Abraama woodino duuɓi cappanɗe joweeɗiɗi e jowi (75), saa'i o wurto Haran.

⁵ O hoo'i Saray, debbo maako e Ludu, ɓii deerɗiiko e mardi maɓɓe, non boo maccuɓe ɓe o soodi haa Haran fuu. Ɓe ngurti ngam ɓe njaha lesdi Kanaana. Ɓe njotti ton boo.

Abraama haa lesdi Kanaana e haa Misra

⁶ Abraama saali lesdi maajum fuu haa yotti nokkuure wi'eteende Sikem, haa lekki makki bi'eteeki More woni. Wakkati maajum Kanaani'en ɗonno njooɗi nder lesdi ndi'i.

⁷ Jawmiraawo waŋgani Abraama, wi'i mo: “Mi hokkan danygol maaɗa lesdi ndi'i.” Ton Abraama mahani Jawmiraawo mo waŋgani mo hirsirde.

⁸ Nden o ummi diga ton, o yehi lesdi kooseeje, haa fuunaaŋge Baytila. Ton o darni laymaaru maako, hakkunde Baytila haa hiirnaaŋge e Ayu haa fuunaaŋge. Ton o mahani Jawmiraawo hirsirde feere, o ewni innde Jawmiraawo nder do'a.

⁹ Nden o dilli, o tokki laawol maako yahugo Lesdi Fombina.

¹⁰ Weelo waɗi nder lesdi. Abraama dilli haa Misra haa o faɓɓoya ton, ngam weelo maajum saati.

¹¹ Nde o ɓadi nastugo Misra, o wi'i Saray, debbo maako: “Ndaa, mi anndi a debbo ŋarniiɗo.

¹² To Misra'en ngi'i ma, ɓe mbi'an: Oo, ɗum debbo maako. Ɓe mbaratam, an kam ɓe accete.

¹³ Ngam maajum sey mbi'a ɓe a deerɗiraawo am, haa mi jooɗo jam e yoŋki am boo hisa ngam daliila maaɗa.”

¹⁴ Nde Abraama yotti Misra, Misra'en ngi'i debbo oo, o ŋarniiɗo masin.

¹⁵ Saraaki'en Firawna ngi'i mo, mani mo yeeso Firawna, nden ɓe njahri mo nder saare maako.

¹⁶ Firawna woonani Abraama daliila maako. O hokki Abraama dammooji e na'i e bamɗe e maccuɓe e horɓe e geelooɗi.

¹⁷ Ammaa Jawmiraawo hiiti Firawna e saare maako bee masiibooji naawɗi ngam daliila Saray, debbo Abraama.

¹⁸ Nden Firawna ewni Abraama, wi'i mo: “Ɗum ɗume mbaɗanɗa yam ɗo? Koni a anndinaay yam o debbo maaɗa?

¹⁹ Koni mbi'ɗa o deerɗa, haa mi hoo'i mo ngam o laato debbo am? Jonta, ndaa debbo maaɗa, hoocu mo, dillu!”

²⁰ Firawna umri worɓe woɗɓe ɗofta mo, ɓe ɗofti mo kaŋko e debbo maako e ko o mari fuu.