Laataanooji 11 - Fulfulde Bible

Suudu towndu haa Baabila

¹ Nder wakkati maajum yimɓe fuu ɗonno mbolwa ɗemŋgal gootal e bolle goote.

² Nde yimɓe ndilli gal fuunaaŋge, ɓe tawi waadiwol nder lesdi Sine'ar, ɓe njooɗi ton.

³ Ɓe mbi'mbi'tiri: “Mbaɗen birikje, ngulen ɗe haa ɗe caata.” Ɓe nyiɓri bee maaje bana bee kaa'e, ɓe koo'i taari lesdi boo ngam takkindirgo ɗe.

⁴ Ɓe mbi'i: “Ndillen! Nyiɓen berniwol e suudu towndu, haa hoore suudu ndu'u yotto asama, ngam haa mbaɗanen ko'e meeɗen innde, taa en caŋkito nder duniyaaru fuu.”

⁵ Jawmiraawo jippi ngam laarugo berniwol e suudu towndu, ko ɓiɓɓe Aadama nyiɓata.

⁶ O wi'i: “Ndaa, ɓe ummaatoore woore, ɓe ɗon mbolwa ɗemŋgal gootal. Ko ɓe ngaɗi ɗo, ɗum fuɗɗoode tawon. Jonta kam, walaa ko haɗata ɓe waɗugo ko ɓe nufoto fuu.

⁷ Ndillen, en njippo, en njiiɓa wolde maɓɓe, taa ɓe paampaamtira!”

⁸ Jawmiraawo saŋkiti ɓe diga ton nder duniyaaru fuu, ɓe acci nyiɓugo berniwol.

⁹ Ngam maajum ngol inndinaama Baabila, ngam haa ton Jawmiraawo jiiɓi wolde yimɓe duniyaaru fuu e diga ton boo o saŋkiti ɓe nder duniyaaru fuu.

Danygol Sem

¹⁰ Ndaa habaru danygol Sem: Nde Sem waɗi duuɓi teemerre (100), duuɓi ɗiɗi ɓaawo ilam tuufaana, o danyi Arfasada.

¹¹ Ɓaawo danyeeki Arfasada, Sem yeeɗi duuɓi teemeɗɗe jowi (500). O danyi ɓiɓɓe worɓe e rewɓe.

¹² Nde Arfasada waɗi duuɓi cappanɗe tati e jowi (35), o danyanaama ɓiɗɗo: Sala.

¹³ Ɓaawo danyeeki Sala, Arfasada yeeɗi fahin duuɓi teemeɗɗe nayi e tati (403). O danyi ɓiɓɓe worɓe e rewɓe.

¹⁴ Nde Sala waɗi duuɓi cappanɗe tati, o danyi Eber.

¹⁵ Ɓaawo danyeeki Eber, Sala yeeɗi duuɓi teemeɗɗe nayi e tati (403). O danyi ɓiɓɓe worɓe e rewɓe.

¹⁶ Nde Eber waɗi duuɓi cappanɗe tati e nayi (34), o danyi Pelek.

¹⁷ Ɓaawo danyeeki Pelek, Eber waɗi duuɓi teemeɗɗe nayi e cappanɗe tati (430). O danyi ɓiɓɓe worɓe e rewɓe.

¹⁸ Nde Pelek waɗi duuɓi cappanɗe tati (30), o danyi Re'u.

¹⁹ Ɓaawo danyeeki Re'u, Pelek waɗi duuɓi teemeɗɗe ɗiɗi e joweenayi (209). O danyi ɓiɓɓe worɓe e rewɓe.

²⁰ Nde Re'u waɗi duuɓi cappanɗe tati e ɗiɗi (32), o danyi Seruku.

²¹ Ɓaawo danyeeki Seruku, Re'u yeeɗi duuɓi teemeɗɗe ɗiɗi e joweeɗiɗi (207). O danyi ɓiɓɓe worɓe e rewɓe.

²² Nde Seruku waɗi duuɓi cappanɗe tati, o danyi Nahor.

²³ Ɓaawo danyeeki Nahor, Seruku yeeɗi duuɓi teemeɗɗe ɗiɗi (200). O danyi ɓiɓɓe worɓe e rewɓe.

²⁴ Nde Nahor waɗi duuɓi noogas e joweenayi (29), o danyi Tera.

²⁵ Ɓaawo danyeeki Tera, Nahor yeeɗi fahin duuɓi teemerre e sappo e joweenayi (119). O danyi ɓiɓɓe worɓe e rewɓe.

²⁶ Nde Tera waɗi duuɓi cappanɗe joweeɗiɗi (70), o danyi Abraama e Nahor e Haran.

Danygol Tera

²⁷ Ndaa habaru danygol Tera: Tera danyi Abraama e Nahor e Haran. Haran boo danyi Ludu.

²⁸ Haran maayi nder lesdi Kaldiya, nder berniwol Ur haa o danya, yaake baaba maako geetono.

²⁹ Abraama e Nahor te'i rewɓe. Innde debbo Abraama, Saray. Innde debbo Nahor boo, Milka ɓii Haran. Haran woni baaba Milka e Yiska.

³⁰ Saray laatino dimaro, o walaano ɓiŋngel.

³¹ Tera hoo'i ɓiyum Abraama e Ludu ɓii Haran, taaniraawo mum e Saray, esiraawo mum, debbo Abraama. Ɓe fuu ɓe ummi diga Ur nder Kaldiya, haa ɓe njaha lesdi Kanaana. Ɓe njotti Haran, ɓe njooɗi ton.

³² Duuɓi Tera mbaɗi teemeɗɗe ɗiɗi e jowi (205). O maayi nder Haran.