Kuuɗe Nelaaɓe 6 - Fulfulde Bible

Ɓe cuɓi wallooɓe nelaaɓe njoweeɗiɗo

¹ Nyalɗe man nuɗɗinɓe tokki ɓesdaago. Nden wolwooɓe Yunaniŋkeere ngurŋgurti dow wolwooɓe Ibraniŋkeere ngam rewɓe yurumɓe wonɓe caka maɓɓe keɓataa geɗal haa cennduki nyaamdu nyalaade fuu.

² Nelaaɓe sappo e ɗiɗo mooɓti nuɗɗinɓe fuu, ɓe mbi'i: “Ɗum fottaay min acca waazaago wolde Allah haa min cuklano senndugo nyaamdu.

³ Ngam maajum, deerɗiraaɓe, cuɓe caka mooɗon worɓe njoweeɗiɗo, hoolaaɓe, hebbinaaɓe Ruuhu Ceniiɗo, marɓe hikma, haa min kalfitina ɓe kuugal nga'al.

⁴ Minin kam, min tiinanan do'a e waazaago wolde Allah.”

⁵ Haala ka'a fottani nuɗɗinɓe fuu, ɓe cuɓi Etiyen, goɗɗo marɗo nuɗɗinki, kebbinaaɗo Ruuhu Ceniiɗo, Filip, Porokorus, Nikanor, Timon, Parmenas bee Nikolawus mo Antakiya, jananno tokkiiɗo diina Yahuudu'en.

⁶ Ɓe njahri ɓe haa nelaaɓe. Nelaaɓe mbaɗi do'a, mballini juuɗe muuɗum'en dow suɓaaɓe go.

⁷ Wolde Allah tokki saŋkitaago. Limgal nuɗɗinɓe tokki ɓesdaago masin nder Urusaliima, ɗuuɗɓe nder liman'en boo nuɗɗini.

Mawɓe Yahuudu'en naŋngi Etiyen

⁸ Etiyen, kebbinaaɗo mo'ere e baawɗe Allah, waɗi kaayeefiiji e alaamaaji mawɗi caka yimɓe.

⁹ Ammaa woɗɓe nder suudu dewal Yahuudu'en wi'eteendu Suudu Rimɗinaaɓe, iwɓe haa Sirene bee Aleksandiriya bee yimɓe Silikiya e Asiya ndarni ngaaba bee Etiyen.

¹⁰ Etiyen wolwi bee hikma e bee baawɗe Ruuhu haa ɓe mbaawaay dartanaago mo.

¹¹ Ngam man ɓe njoɓi woɗɓe nder sirri haa ɓe mbi'a: “Min nani o wolwi kalluka dow Muusa e dow Allah boo.”

¹² Bana nii ɓe umminiri ɓerɗe ummaatoore e ndotti'en e moodiɓɓe tawreeta. Ɓe kippi Etiyen, ɓe naŋngi mo, ɓe njahri mo yeeso dawrooɓe.

¹³ Nden ɓe ngaddi seedooɓe haa pewana mo, ɓe mbi'i: “Goɗɗo oo, tum o ɗon wolwa kalluka dow suudu Allah seniindu ndu'u e dow tawreeta Muusa boo.

¹⁴ Ngam min nani o wi'i: Yeesu mo Nasaratu oo, wilan suudu Allah e waylitan al'aadaaji ɗi Muusa accani en.”

¹⁵ Dawrooɓe tawaaɓe ton fuu ɗon cuti Etiyen, ɓe ngi'i yeeso maako nanndi bee yeeso malaa'ikaajo.