Kuuɗe Nelaaɓe 27 - Fulfulde Bible

Pol nelaama haa Roma

¹ Nde ɗum tabiti min njahan Italiya bee koommbowal, ɓe kalfini Pol e naŋngaaɓe woɗɓe haa Yuliyus, ardiiɗo dow sooje'en teemerre, gonɗo nder yeɓre wi'eteende Yeɓre-laamiiɗo-Roma.

² Min nasti koommbowal Adaramittenus, min mbakki gure gonɗe fomoonde mbeela e nder lesdi Asiya. Aristarkus, goɗɗo Tessaloniiki nder lesdi Makedoniya yahdi bee amin.

³ Jaŋngo man min njotti Sidon. Yuliyus enɗi Pol, duŋani mo yahugo haa soobiraaɓe maako haa o heɓa ballal maɓɓe.

⁴ Diga ɗon min ummi, min mbakki duunde Kiprus haa wakeere nde walaa henndu, ngam min ɗonno potta bee henndu haa wakeere feere.

⁵ Min ta'i mbeela kommbi Silikiya bee Pamfiliya, min njotti wuro Mira nder lesdi Lisiya.

⁶ Ton ardiiɗo dow sooje'en go tawi koommbowal iwŋgal Aleksandiriya, jahanŋgal Italiya, o nastini min nder maagal.

⁷ Baakin balɗe ɗuuɗɗe, koommbowal yaawaay sam, bee daker min njottori Kinidus. Nde henndu haɗi min yahugo yeeso, min mbakki Kereta haa wakeere nde walaa henndu, min caali nokkuure Salmoni.

⁸ Min mbakki fomoonde, bee daker min njottori nokkuure wi'eteende Jipporɗe-Booɗɗe, nde daayaaki wuro Laseya.

⁹ Min paɓɓi ton, wakkati man jahaaŋgal bee koommbowal saɗi masin ngam saa'i suumaye maa saalake. Ngam maajum Pol reentini yimɓe,

¹⁰ wi'i: “Hey yimɓe, jahaaŋgal meeɗen nga'al tammi saɗugo, kuuje e koommbowal mbonnoto. Naa kanjum tan, koo yoŋkiiji meeɗen maa kisataa.”

¹¹ Ammaa ardiiɗo sooje'en yerdi ko laanyoowo e jawmu koommbowal mbi'i, o yerdaaki ko Pol wi'i.

¹² Ɗum naawɗum jooɗaago haa jipporde man dabbunde. Ngam maajum ɓurna yimɓe man fuu ngiɗi dillugo. Ɓe ngiɗi yottaago Fenikis haa ɓe caalina dabbunde ton, to heɓoto. Fenikis woni jipporde koommbooje haa duunde Kereta tiitiinde hiirnaaŋge walaadu woyla e hiirnaaŋge walaadu fombina.

Henndu haa Mbeela

¹³ Nde henndu fombina fuɗɗi waɗugo, ɓe numi tokkitingo jahaaŋgal maɓɓe ngam henndu ndu'u saataay, ɓe ɗoofi tiggirɗum koommbowal, ɓe mbakki fomoonde Kereta.

¹⁴ Nii seɗɗa, henndu saatundu wi'eteendu Erakilon ummi.

¹⁵ Ndu haɗi koommbowal. Nde ngal waawaay tiitaago ndu, min acci henndu ɗon yerɓa ngal.

¹⁶ Nde min caali wakeere duungel bi'eteeŋgel Kawda nde walaa henndu ton, min kisni koommbowal pamaral bee daker.

¹⁷ Ɓe ɓaŋgti koommbowal pamaral go. Nden ɓe kaɓɓi koommbowal maɓɓe bee ɓoggi. Ɓe kuli ɗaggugo haa Sirtis. Ngam maajum ɓe njippini leggal maŋngal darnanŋgal koommbowal, ɓe njoofi koommbowal haa henndu yahra ngal.

¹⁸ Nde henndu man ɗon tokki waɗugo bee semmbe, jaŋngo man ɓe puɗɗi wudingo doŋgle koommbowal.

¹⁹ Faɓɓijaŋngo man ɓe ngudini ɓoggi e ko wonno nder koommbowal bee juuɗe maɓɓe.

²⁰ Balɗe ɗuuɗɗe min ngi'aay koode e naaŋge, ngam henndu tokki saatugo, haa min itti tammunde hisugo fuu.

²¹ Faɓɓi wonɓe nder koommbowal man nyaamaay koo ɗume. Nden Pol dari caka maɓɓe, wi'i: “Hey yimɓe, ndikka to on jaɓino ko mbi'mi on, on ummataano Kereta. En kisanno asar e halkere nde'e.

²² Ammaa jonta mi ɗon toro on, tiɗɗine ɓerɗe mon! Koo gooto caka amin maayataa, sey koommbowal tan wonnoto.

²³ Ngam haŋki malaa'ikaajo Allah mo mi jagganto waŋgani yam,

²⁴ wi'i: Pol, taa hultor! Sey a daro yeeso laamiiɗo Roma. Ndaa, Allah mo'ani ma. O hisnan wonduɓe bee ma nder koommbowal nga'al fuu.

²⁵ Ngam maajum taa kultore, laate on suusɓe. Ngam mi hooli Allah, ko o wi'i yam fuu laatoto.

²⁶ Ammaa henndu yahran en haa duunde feere, darnan en ton.”

²⁷ Nder jemmaare sappo e nayaɓre, henndu yerɓi min nder mbeela Adiriya. Caka jemma laanyooɓe tammi min ɓadake lesdi njoordi.

²⁸ Nden ɓe njippini ɓoggol bee njamndi kaɓɓaandi haa maagol, ngam foondugo luggeeŋga ndiyam. Ɓe tawi luggeeŋga man waɗi baakin meetir cappanɗe tati e joweeɗiɗi, yeeso seɗɗa nga waɗi baakin meetir noogas e joweetati.

²⁹ Ɓe kuli taa henndu yahra koommbowal haa tapaaje, ngam maajum ɓe njippini jamɗe tiggirɗe nayi ɓaawo koommbowal. Ɓe ngeli baɓɓol waɗa law.

³⁰ Laanyooɓe ngiɗno wurtaago koommbowal, ɓe ndilla. Ɓe njippini koommbowal pamaral haa ndiyam, ɓe mbaɗi bana ɓe njippinan jamɗe tiggirɗe feere yeeso koommbowal.

³¹ Ammaa Pol wi'i sooje'en e ardiiɗo maɓɓe: “To laanyooɓe njooɗaaki haa koommbowal, on kisataa.”

³² Nden sooje'en ta'i ɓoggi naŋnguɗi koommbowal pamaral, ɓe njoofi ngal, ngal do'i.

³³ Nde ɓadi weetugo, Pol tori ɓe ɓe nyaama, o wi'i: “Hannde waɗi balɗe sappo e nayi, on nyaamaay koo ɗume, on ɗon ndeena.

³⁴ Ngam maajum mi tori on on nyaama to on ngiɗi hisugo. Ammaa koo gaasaawol hoore mon gootol majjataa.”

³⁵ Nde o wi'i ɗum, o hoo'i tamseere, o yetti Allah yeeso maɓɓe fuu, o yewi nde, o fuɗɗi nyaamugo.

³⁶ Nden hakkiilooji maɓɓe nde'iti, ɓe fuu ɓe nyaami.

³⁷ Limgal yimɓe haa koommbowal waɗi teemeɗɗe ɗiɗo e cappanɗe njoweeɗiɗo e njoweego (276).

³⁸ Nde ɓe kaari, ɓe cakkini alkamaari nder ndiyam ngam ustugo doŋngal.

Ƴuuge ndiyam pusi koommbowal

³⁹ Nde weeti, laanyooɓe anndaa toy ɓe ngoni, ammaa ɓe ngi'i pellel njaareendi haa fomoonde duunde. Ɓe ngiɗi yahrugo koommbowal haa ton, to heɓoto.

⁴⁰ Ngam maajum ɓe ta'i ɓoggi jamɗe tiggirɗe, ɓe acci ɗe nder ndiyam. Nden ɓe piisti ɓoggi kaɓɓuɗi leɗɗe laanyirɗe. Nden ɓe ɓaŋgti leppol maŋngol gonŋgol yeeso koommbowal ngam haa henndu yahra ngal haa duunde.

⁴¹ Ammaa koommbowal tawi pellel haa ndiyam luggaay, dari ton. Yeeso maagal ɗaggi haa njaareendi, dimmbataako sam, ƴuuge ndiyam boo pusi ɓaawo maagal.

⁴² Sooje'en nufi mbarugo naŋngaaɓe, ngam taa ɓe ngino, ɓe ndogga.

⁴³ Ammaa ardiiɗo sooje'en, nde yiɗi hisnugo Pol, haɗi ɓe waɗugo anniya maɓɓe. O umri waawɓe nginam ɓe aarta diwugo haa nder ndiyam, ɓe ngino, ɓe njotto lesdi njoorndi.

⁴⁴ Luttuɓe boo naŋnga kaataakooje malla leɗɗe koommbowal gewɗe. Bana nii ɓe fuu ɓe njottori lesdi jam.