Kuuɗe Nelaaɓe 26 - Fulfulde Bible

Pol yecci Agarippa o walaa aybe

¹ Agarippa wi'i Pol: “Mi duŋanake ma waŋgingo hujja ma jonta.” Pol ɓaŋgti juŋngo mum, wolwi hujja muuɗum, wi'i:

² “Yaa laamiiɗo Agarippa! Mi seyake waŋgingo hujja am hannde yeeso ma, dow ko Yahuudu'en ngullori yam fuu.

³ Ko ɓuri ɗum boo, a anndi al'aadaaji Yahuudu'en e hujjaaji maɓɓe fuu. Ngam maajum mi tori ma, hoo'u munyal, nan haala am.

⁴ Yahuudu'en fuu anndi no joonde am wa'i diga mi ɓiŋngel. Ɓe anndi no mi jooɗori diga fuɗɗam caka yimɓe am e haa Urusaliima boo.

⁵ Mi tokki laawol Farisa'en, laawol diina ɓurŋgol saatugo. Ɓe anndi ɗum diga ɓooyma, ɓe ceedoto ɗum boo, to ɓe ngiɗi.

⁶ Jonta mi ɗon yeeso kiita ngam mi ɗon tammoro iinawol ngol Allah waɗani kaakiraaɓe amin.

⁷ Le'i amin sappo e ɗiɗi fuu ɗon ndeena kebbitinki iinawol ngo'ol. Ngam maajum ɓe ɗon njaggano Allah bee tiinaare jemma e naaŋge. Ngam daliila tammunde nde'e Yahuudu'en ngulli yam, barkaama!

⁸ Onon Yahuudu'en, koni on nuɗɗintaa Allah ummitinan maayɓe?

⁹ Min boo, mi haɓdino wonnugo innde Yeesu mo Nasaratu bee dabareeji feere feere.

¹⁰ Mi waɗi ɗum haa Urusaliima. Mi maɓɓi senaaɓe ɗuuɗɓe haa fursina dow duŋayeere mawɓe liman'en. Nde ɓe kiiti ɓe kiita mbareego boo, mi yerdi ɗum.

¹¹ Mi ukkani ɓe torraaji ɗuuɗɗi nder cuuɗi dewal maɓɓe, haa mi doola ɓe wolwugo kalluka dow Allah. Mi ɓernani ɓe masin haa mi taasni ɓe nder gure jananne, mi toonyi ɓe ton.”

Seedamku Pol

¹² “Ngam daliila man mi ɗonno yaha Damas bee duŋayeere e baawɗe mawɓe liman'en.

¹³ Caka nyalawma, nde mi ɗon dow laawol, mi yi'i annoora ɓurka annoora naaŋge, iwi haa asama. Ka yaynani yam, min e yahduɓe bee am fuu.

¹⁴ Min fuu min ndo'i haa lesdi. Nden mi nani sawtu wolwani yam bee Ibraniŋkeere: Sol, Sol, koni toonyotoɗa mi? A ɗon naawna hoore ma meere bee tuurtango yam.

¹⁵ Mi ƴami: An a moy, Jawmiraawo? Jawmiraawo wi'i: Min woni Yeesu mo toonyotoɗa.

¹⁶ Ammaa umma, dara. Mi waŋgani ma ngam mi suɓi ma haa a laato kuuwanoowo yam e ceedoowo ko mi yi'ni ma e ko mi tammi hollugo ma.

¹⁷ Mi hisnete juuɗe Isra'iila'en e yimɓe ummaatooje goɗɗe, ɓe mi ɗon nela ma haa maɓɓe,

¹⁸ ngam a maɓɓita gite maɓɓe, haa ɓe ngaylita ɓaawo haa nyiɓre, ɓe nasta haa annoora, ɓe ngurto diga les baawɗe Sayɗaanu, ɓe njaha haa Allah, ɓe keɓa yaafuye hakkeeji maɓɓe e geɗal ndonŋgu maɓɓe caka senaaɓe bee nuɗɗingo yam.”

Pol wolwi haala kuugal muuɗum

¹⁹ “Ngam maajum, yaa laamiiɗo Agarippa, mi accaay ɗowtanaago ko Allah holli yam diga asama.

²⁰ Mi aarti waazaago haa Damas, ɓaawoɗon haa Urusaliima e haa lesdi Yahudiya fuu e haa yimɓe ummaatooje goɗɗe boo. Mi waazi ɓe ɓe tuuba, ɓe nuɗɗina Allah, ɓe kuuwa kuuɗe kollanɗe tuubu maɓɓe.

²¹ Ngam daliila ka'a Yahuudu'en naŋngi yam nder haykaliiru, ɓe ngiɗno mbarugo yam.

²² Ammaa Allah walli yam, haa hannde fuu mi ɗon, jonta mi ɗon dari, mi ɗon seedo mo yeeso mawɓe e leesɓe. Mi wi'aay koo ɗume, sey ko Muusa e annabi'en anndini:

²³ Almasiihu yaran bone, o aartan ummitaago diga maayde, haa o waŋginana Yahuudu'en e yimɓe ummaatooje goɗɗe fuu annoora.”

Pol wi'i Agarippa o nuɗɗina Yeesu

²⁴ Nde Pol ɗon wolwa hujja muuɗum bana nii, Festus hooli, wi'i mo: “Pol, a ginnaaɗo, anndal ma lugguŋgal itti ma hakkiilo!”

²⁵ Pol jaabi: “Naa mi ginnaaɗo, barkaama! Ɗum gooŋga mbi'anmi, ɗum faamoto boo.

²⁶ Mi wolwani laamiiɗo bee dartaare ngam o anndi kuuje ɗe'e fuu. Mi anndi fakat walaa ko o dulli nder maaje ngam ɗe laataaki nder cuuɗiiɗum.

²⁷ A nuɗɗini annabi'en na, barkaama? Mi anndi a nuɗɗini.”

²⁸ Agarippa wi'i Pol: “Lutti seɗɗa a laatinammi Masiihiŋkeejo!”

²⁹ Pol jaabi: “Mi ɗon toro Allah naa ngam maaɗa tan ammaa ngam nananɓe yam hannde fuu, haa on laato bana am, ammaa bilaa callalluuji ɗi'i! Ɗum laato nder jaawɗum malla nder nyalɗe garanɗe.”

³⁰ Nden laamiiɗo e ngomnaajo e Bernike e wonduɓe bee maɓɓe fuu ummi.

³¹ Nde ɓe ndilli, ɓe mbi'mbi'tiri: “Gorko oo waɗaay koo ɗume ko he'i mbarugo mo malla nastingo mo fursina.”

³² Nden Agarippa wi'i Festus: “En njoofanno gorko oo to o ƴamaayno hiiteego haa laamiiɗo Roma kam.”