Kuuɗe Nelaaɓe 24 - Fulfulde Bible

Yahuudu'en ngulli Pol

¹ Ɓaawo balɗe jowi, Ananiyas, mawɗo liman'en, yotti Kaysariya. O wardi bee ndotti'en woɗɓe e Tertullus, annduɗo dooka kiita Roma'en. Ɓe ngulli Pol yeeso ngomnaajo.

^2-3 Nde ɓe ewni mo, Tertullus fuɗɗi haadango mo, wi'i: “Yaa Felikus tedduɗo, ngam barka ma min njooɗi jam, lesdi amin fuu wooti ngam hikma maaɗa. Koo ndeye e koo toy fuu, min ɗon ngerdo ɗum, min ɗon ngette masin.

⁴ Bolle am ɗuuɗataa! Barka enɗam ma, mi tori ma, nanan min haala amin seɗɗa.

⁵ Min tawi gorko oo, o kalluɗo masin, o ɗon ummina tuurtol caka Yahuudu'en nder duniyaaru fuu, kaŋko woni ardiiɗo biɗu'aaku Nasaratu'en.

⁶ Nden o yiɗi soɓnugo haykaliiru boo, ammaa min naŋngi mo. [Min ngiɗno hiitaago mo fodde kiita tawreeta amin,

⁷ ammaa Lisiyas, hooreejo sooje'en wari, jaɓti mo haa juuɗe amin bee semmbe.

⁸ Nden o umri wulliiɓe mo ɓe ngara yeeso maaɗa.] To a ƴamti mo, a dili mo, a anndan ko min ngullori mo ɗum gooŋga.”

⁹ Yahuudu'en fuu mbi'i: “Ko Tertullus wolwi, ɗum gooŋga.”

Pol waŋgini hujja mum yeeso Felikus

¹⁰ Ngomnaajo sappi Pol, o wolwa. Nden Pol wi'i: “Mi anndi, duuɓi ɗuuɗɗi an woni kiitoowo lesdi ndi'i, ngam maajum mi seyi waɗugo hujja am yeeso maaɗa.

¹¹ Ɓuraay balɗe sappo e ɗiɗi ko njahmi Urusaliima ngam mi sujidana Allah. To a linyi ɗum, a tawan ɗum non.

¹² Walaa mo meeɗi tawugo yam mi ɗon waɗa ngaaba bee goɗɗo nder haykaliiru malla mi ɗon ummina haala koo nder cuuɗi dewal maɓɓe malla nder berniwol.

¹³ Ɓe mbaawataa gooŋɗingo wullaandu ndu'u caka maɓɓe.

¹⁴ Ammaa ndaa ko mi waŋginante: Mi ɗon jaggano Allah kaakiraaɓe amin bee tokkaago laawol ngol ɓe ndaari bana biɗu'aaku. Ammaa min boo mi ɗon nuɗɗini ko winnda nder tawreeta Muusa e defte annabi'en fuu.

¹⁵ Min ɗon bee tammunde no Allah ummitinan adili'en e halluɓe fuu diga maayde bana kamɓe boo ɓe ɗon tammoro ɗum.

¹⁶ Ngam maajum mi ɗon haɓda jooɗaago ɓernde laaɓnde bilaa feloore yeeso Allah e yeeso yimɓe boo.

¹⁷ Ɓaawo yiilaago yaasi Urusaliima duuɓi seɗɗa, mi lori ton ngam mi yahrana ummaatoore am sadaka e mi waɗana Allah dokke.

¹⁸ Wakkati man ɓe tawi yam haa haykaliiru. Ɓe tawi yam ɓaawo mi timmini al'aada cenki, woodaa mooɓre haa am, woodaa hoolo.

¹⁹ Woodino Yahuudu'en iwɓe haa lesdi Asiya. Ɓe potino wargo yeeso ma ngam wullaago yam, to woodi ko ɓe mbi'ata dow am.

²⁰ Malla sey yimɓe ɓe'e ngecce halleende ndeye mi waɗi yaake ɓe ndarni yam yeeso dawrooɓe,

²¹ sonaa haala ngoota mi wolwi bee sawtu yaake mi dari yeeso maɓɓe, mi wi'i: On kiiti yam hannde ngam mi nuɗɗini ummitineeki maayɓe.”

²² Nde Felikus anndi haala Laawol Jawmiraawo, o yerɓi haala man yeeso, o wi'i ɓe: “Mi ta'an kiita mon, to Lisiyas, ardiiɗo dow sooje'en ujineere wari.”

²³ O umri ardiiɗo dow sooje'en teemerre, o ayna mo booɗɗum, ammaa o acca mo o feeco seɗɗa, o acca soobiraaɓe maako mballa mo.

Pol wolwani Felikus bee Durusilla

²⁴ Ɓaawo balɗe seɗɗa, Felikus wardi bee debbo mum Durusilla, Yahuuduujo. O ewni Pol, o nani ko o wolwi dow nuɗɗinki nder Yeesu Almasiihu.

²⁵ Ammaa nde Pol wolwi dow adilaaku e naŋgtaare e kiita ngaranka, Felikus hultori, wi'i: “He'i jonta kam, dillu! To mi heɓi wakkati, mi ewnete fahin.”

²⁶ O tammi Pol hokkan mo ceede, ngam maajum o tokki ewnaago mo tum, haa ɓe ngewta.

²⁷ Ɓaawo duuɓi ɗiɗi, Porkiyus Festus laami haa pellel Felikus. Ammaa Felikus yoofaay Pol ngam o yiɗi seynugo Yahuudu'en.