Kuuɗe Nelaaɓe 2 - Fulfulde Bible

Garki Ruuhu Ceniiɗo

¹ Nde nyannde juulde Pantekosta yottake, nuɗɗinɓe fuu kawti nokkuure woore.

² Law ɓe nani iidoore iwnde haa asama bana iidoore henndu semmbiɗndu, heewi suudu haa ɓe ɗon njooɗi.

³ Nden ɗemɗe nannduɗe ɗemɗe yiite mbaŋgani ɓe, caŋkiti e njooɗi dow koo moy maɓɓe.

⁴ Ɓe fuu ɓe kebbinaaɓe Ruuhu Ceniiɗo, ɓe puɗɗi wolwugo bee bolle jananne, bana no Ruuhu hokkiri ɓe baawɗe wolwugo.

⁵ Woodino Yahuudu'en jooɗiiɓe haa Urusaliima, hulɓe Allah, iwɓe haa lesɗe duniyaaru fuu.

⁶ Nde ɓe nani hoolo ngo'o, ɗuuɗɓe maɓɓe mooɓi ton. Ɓe cakli ngam koo moy maɓɓe nani nuɗɗinɓe ɗon mbolwa wolde muuɗum.

⁷ Ɓe kayɗini masin, ɓe mbi'i: “Yimɓe wolwanɓe bolle ɗe'e, naa ɓe fuu ɓe yimɓe lesdi Galiili!

⁸ Kadi noy en nanata ɓe ɗon mbolwa bolle meeɗen?

⁹ Ɓe iwi haa lesɗe Partiya, Mediya, Elam, Mesopotamiya, Yahudiya, Kappadosiya, haa Pontus e Asiya,

¹⁰ haa Firigiya e Pamfiliya, haa Misra, haa geɓe lesdi Libiya kommbi Sirene, woɗɓe maɓɓe ngari diga Roma,

¹¹ woɗɓe boo ngari diga Kereta e Arabiya. Woodi boo Yahuudu'en e jananɓe tokkiiɓe diina Yahuudu'en. Ammaa en ɗon nana ɓe ɗon mbolwa bee bolle meeɗen haala kuuɗe mawɗe ɗe Allah waɗi.”

¹² Ɓe fuu ɓe kayɗini, ɓe cakli, ɓe ƴamƴamtiri: “Ɗume ɗum yiɗi wi'go?”

¹³ Ammaa woɗɓe njanci nuɗɗinɓe, mbi'i: “Ɓe nguyki!”

Waazu Piyer

¹⁴ Nelaaɓe sappo e ɗiɗo fuu ummi. Nden Piyer towni sawtu, wi'i ɓe: “Onon Yahuudu'en e yimɓe jooɗiiɓe haa Urusaliima fuu, paame ko ɗon saalo e nananeeɗam booɗɗum:

¹⁵ Yimɓe ɓe'e, ɓe nguykaay bana numoton, ngam naaŋge nyalwaay tawon,

¹⁶ ammaa ɗum kebbitinki ko annabi Yo'el wolwuno:

¹⁷ Allah wi'i: Nder balɗe ragareeje: Mi waanjan Ruuhu am dow yimɓe fuu: Ɓiɓɓe mon worɓe e rewɓe mbaɗan annabaaku, suka'en mooɗon keɓan wahayuuji, ndotti'en mooɗon koyɗan koyɗi.

¹⁸ Koo dow maccuɓe am e horɓe am fuu boo, mi waanjan Ruuhu am dow maɓɓe nder saa'i man, ɓe mbaɗan annabaaku.

¹⁹ Mi waɗan kaayeefiiji haa asama e dow lesdi boo alaamaaji, ƴiiƴam e yiite e cuurɗe ɓaleeje mbaŋgan.

²⁰ Naaŋge nyiɓɓan, lewru boo woojan bana ƴiiƴam. Nden nyalaade am mawnde hulniinde waran!

²¹ Koo moy ewnotooɗo innde Jawmiraawo, hisan.

²² Onon Isra'iila'en, nananeeɗam: Yeesu mo Nasaratu, o gerdaaɗo Allah yeeso mooɗon. On anndi ɗum, ngam bee maako Allah waari kaayeefiiji e alaamaaji caka mooɗon.

²³ Diga ɓooyma Allah muuyi, acci Yeesu haa juuɗe mooɗon. Onon on mbari mo, nde on nduŋani hakke'en ɓe ɓila mo dow leggal gaafaaŋgal.

²⁴ Ammaa Allah ummitini mo, wurtini mo taaku maayde, ngam maayde walaa baawɗe jogaago mo.

²⁵ Ndaa ko Daawuda wi'no dow maako: Mi ɗon yi'a Jawmiraawo yeeso am tum, o ɗon haa nyaamo am, ngam taa mi dimmbo.

²⁶ Ngam maajum ɓernde am ɗon seyo, hunnduko am ɗon welwita, Koo ɓanndu am boo siwtoto jam nder hoolaare.

²⁷ Ngam an, yaa Allah, a wudintaa yoŋki am haa joonde maayɓe, a accataa ceniiɗo maaɗa nyola.

²⁸ A holli yam laawol jahranŋgol haa ngeendam, ngam a ɗon wondi bee am, mi woodi seyo ɗuuɗŋgo.

²⁹ Deerɗiraaɓe am, sey mi wolwana on bee dartaare dow kaakiraawo meeɗen Daawuda. O maayi, ɓe uwi mo. Haa hannde yenaande maako ɗon ɗo.

³⁰ O annabiijo, o anndi hunayeere nde Allah waɗani mo: Allah huni o laaminan goɗɗo danygol maako dow leeso laamu maako.

³¹ Daawuda faami ummitineeki Almasiihu diga wakkati man siwaa. Ngam maajum o wi'i: Allah accaay mo nder joonde maayɓe, ɓanndu maako boo nyolaay.

³² Yeesu oo, Allah ummitini mo diga maayde, min fuu min seedooɓe haala ka'a.

³³ Allah ɓaŋgti mo, jo'ini mo haa nyaamo muuɗum. O heɓi Ruuhu Ceniiɗo diga Baabiraawo mo iinanino mo ɗum, waanji Ruuhu oo dow amin bana no ngi'oton e nanoton.

³⁴ Ngam Daawuda eeŋgaay haa asama, ammaa kaŋko bee hoore maako o wi'i: Jawmiraawo wi'i jawmiraawo am: Jooɗa haa nyaamo am,

³⁵ haa to mi laatini konne'en ma jaaɓruɗum kosɗe ma.

³⁶ Ngam maajum sey Isra'iila'en fuu paama fakat, Yeesu oo, mo on ɓili dow leggal gaafaaŋgal, Allah laatini mo Jawmiraawo e Almasiihu!”

³⁷ Nde yimɓe nani ɗum, ɓerɗe maɓɓe ta'i, ɓe mbi'i Piyer e nelaaɓe woɗɓe: “Noy min mbaɗata, deerɗiraaɓe?”

³⁸ Piyer jaabi: “Tuube, koo moy mooɗon jaɓa baptisma bee innde Yeesu Almasiihu. Nden Allah yaafanto on hakkeeji mooɗon, o hokkan on Ruuhu Ceniiɗo boo.

³⁹ Iinawol ngo'ol ɗon ngam mooɗon, ngam ɓiɓɓe mon e yimɓe daayiiɓe fuu, ɓe Allah tammi ewnaago haa maako.”

⁴⁰ Piyer ɓesdi wolwango ɓe bolle ɗuuɗɗe ngam wasugo ɓe, o wi'i ɓe: “Kisne ko'e mooɗon e yimɓe zamanuuru hallundu ndu'u!”

⁴¹ Jaɓɓe bolle ɗe Piyer wolwi njaɓi baptisma. Nyannde man yimɓe baakin ujine tato ɓesdaama dow nuɗɗinɓe.

⁴² Ɓe tiiɗi nanugo ekkitinol nelaaɓe, jooɗaago nder kawtal deerɗiraagu, senndugo nyaamdu e waɗugo do'a.

Joonde nuɗɗinɓe

⁴³ Nelaaɓe ngaɗi kaayeefiiji e alaamaaji ɗuuɗɗi, haa yimɓe fuu kultori.

⁴⁴ Nuɗɗinɓe fuu kawti, laati jama'aare woore, ɓe mooɓti ko ɓe mari fuu.

⁴⁵ Ɓe coorri kuuje e mardi maɓɓe, ɓe cenndi ceede man caka maɓɓe, fodde haaje koo moy.

⁴⁶ Nyalaade fuu ɓe ɗon kawta nder haykaliiru bee ɓernde woore, ɓe ɗon kawta haa ci'e maɓɓe boo, ɓe ɗon nyaamda bee seyo e bee ɓernde woore,

⁴⁷ ɓe ɗon ngetta Allah. Yimɓe fuu ngerdi ɓe. Nyalaade fuu Jawmiraawo ɗon ɓesdana jama'aare maɓɓe hisnaaɓe.