Kuuɗe Nelaaɓe 15 - Fulfulde Bible

Hawriinde haa Urusaliima

¹ Yimɓe woɗɓe ummi Yahudiya njehi Antakiya, anndini deerɗiraaɓe, mbi'i: “On keɓataa hisugo sonaa to on njaɓi juulnaago fodde ko tawreeta Muusa umri.”

² Pol e Barnabas kujjotiri bee maɓɓe masin dow haala ka'a. Ngam maajum ɓe ndawri, Pol e Barnabas e yimɓe Antakiya woɗɓe njaha haa Urusaliima wolwango nelaaɓe e ndotti'en dow haala man.

³ Nden jama'aare nuɗɗinɓe hokki ɓe ko ɓe mari haaje ngam jahaaŋgal nga'al. Nde ɓe ɗon caalo nder Finikiya e Samariya, ɓe ngecci nuɗɗinɓe: Yimɓe ummaatooje goɗɗe boo nuɗɗini Allah. Habaru man seyni deerɗiraaɓe masin.

⁴ Nde ɓe njotti Urusaliima, jama'aare nuɗɗinɓe e nelaaɓe e ndotti'en fuu njaɓɓi ɓe. Ɓe ngecci ɓe ko Allah waɗi bee juuɗe maɓɓe.

⁵ Ammaa nuɗɗinɓe woɗɓe nder yeɓre Farisa'en ummi, mbi'i: “Sey ɓe njaɓa juulnaago, sey ɓe tokko tawreeta Muusa.”

⁶ Nelaaɓe e ndotti'en kawti, linyi haala ka'a.

⁷ Ngeewta man wuli jaw. Nden Piyer ummi, wi'i: “Deerɗiraaɓe, on anndi diga ɓooyma Allah suɓi yam caka mooɗon haa mi waazina Linjiila haa yimɓe ummaatooje goɗɗe, haa ɓe nana, ɓe nuɗɗina.

⁸ Allah, annduɗo ɓerɗe yimɓe fuu, seedanake ɓe nde o hokki ɓe Ruuhu Ceniiɗo bana no o hokkiri en ɗum.

⁹ O waɗaay ferootiral hakkunde meeɗen e maɓɓe ngam o laɓɓini ɓerɗe maɓɓe nde ɓe nuɗɗini.

¹⁰ Ngam man, koni on ngiɗi foondugo Allah bee yowango ɓe doŋngal nga'al? Koo enen, koo kaakiraaɓe meeɗen fuu, en mbaawaay roondaago ngal.

¹¹ Bana enen en nuɗɗini, en kisri bee mo'ere Jawmiraawo men Yeesu, non kamɓe boo ɓe kisri.”

¹² Mooɓre fuu sirwi nde ɓe nani ko Barnabas e Pol ngecci ɓe fuu, ɓe anndini ɓe alaamaaji e kaayeefiiji ɗi Allah waɗi bee juuɗe maɓɓe caka ummaatooje goɗɗe.

¹³ Nde ɓe timmini wolwugo, Yaakuba wi'i: “Deerɗiraaɓe, nananeeɗam!

¹⁴ Jonta Simon yecci en bee laaɓɗum no Allah hakkilirani ummaatooje goɗɗe diga fuɗɗam, o suɓi woɗɓe maɓɓe haa ɓe laato ummaatoore maako.

¹⁵ Haala ka'a yahdi bee wolde annabi'en bana ko winnda:

¹⁶ Jawmiraawo wi'i: Ɓaawoɗon mi loroto, mi nyiɓtoto suudu Daawuda yibbunoondu, mi nyiɓtoto bille maaru, mi darnan ndu,

^17-18 ngam haa luttuɓe fuu ngaylito haa Jawmiraawo, non boo yimɓe ummaatooje goɗɗe ɗe innde am ewna dow muuɗum'en, non Jawmiraawo wi'i, kaŋko o waŋgini kuuje ɗe'e diga ɓooyma.”

¹⁹ Ngam maajum min, mi yerdi numo ngo'o: “Taa en cakla yimɓe ummaatooje goɗɗe, nuɗɗinɓe Allah.

²⁰ Ndikka en mbinndana ɓe haa ɓe ndeento e kusel lii'anaaŋgel labbi e daakaareeku e ko hirsaaka e ƴiiƴam boo.

²¹ Ngam diga ɓooyma ɓe ɗon ngaazina tawreeta Muusa nder berniiji fuu, ɓe ɗon njaŋnga ka nder cuuɗi dewal Yahuudu'en kala nyannde siwtorde fuu.”

Ɓe neldi bataakewol haa nuɗɗinɓe caka ummaatooje goɗɗe

²² Nden nelaaɓe e ndotti'en e jama'aare nuɗɗinɓe fuu ngerdi cuɓi woɗɓe maɓɓe, ngam ɓe nela ɓe haa Antakiya bee Pol e Barnabas. Ɓe cuɓi Yahuuda bi'eteeɗo Barsabas e Silas. Ɓe ɗiɗo fuu, ɓe ardiiɓe caka deerɗiraaɓe.

²³ Ɓe neldi ɓe bee bataakewol ngo'ol: “Minin nelaaɓe e ndotti'en, deerɗiraaɓe mon, min koofni on, onon deerɗiraaɓe ɓe ummaatooje goɗɗe wonɓe haa Antakiya e Siriya e Silikiya.

²⁴ Min nani woɗɓe amin njehi haa mon, njiiɓi on, cakli on bee bolle muuɗum'en. Ammaa minin min nelaay ɓe.

²⁵ Ngam maajum min ndawri, min narri, min cuɓi woɗɓe, min nela ɓe haa mooɗon. Ɓe njahdan bee yiɗaaɓe men Barnabas e Pol.

²⁶ Yimɓe ɓe'e kasdi koo maayugo ngam innde Jawmiraawo meeɗen Yeesu Almasiihu.

²⁷ Ngam maajum min neldi on Yahuuda e Silas. Kamɓe ɓe ngeccan on habaru man bee kunnduɗe maɓɓe.

²⁸ Ɗum fottani Ruuhu Ceniiɗo bee amin fuu taa min ɓesdana on doŋngal feere sonaa umrooje kaanduɗe ɗe'e:

²⁹ Ndeente e kusel lii'anaaŋgel labbi e ƴiiƴam e ko hirsaaka e daakaareeku. On mbaɗi ko wooɗi to on kaɗi ko'e mon kuuje ɗe'e. Njooɗe jam.”

³⁰ Yimɓe ɓe'e acci ɓe, njippi Antakiya. Nde ɓe njotti ton, ɓe mooɓti nuɗɗinɓe fuu, ɓe ndokki ɓe bataakewol man.

³¹ Nde ɓe njaŋngi ngol, ɓe ceyi nanugo haala maagol, ngol semmbiɗini ɓe.

³² Yahuuda e Silas, laatiiɓe annabi'en, mbolwani ɓe bolle ɗuuɗɗe, sembiɗini ɓe, tiɗɗini ɓe.

³³ Nde ɓe paɓɓi haa ton seɗɗa, deerɗiraaɓe ɗofti ɓe, njaɓɓiti ɓe, torani ɓe salaaman. Nden ɓe lori haa nelɓe ɓe. [

³⁴ Ammaa Silas jooɗi ton.]

³⁵ Pol e Barnabas paɓɓi haa Antakiya. Kamɓe e woɗɓe ɗuuɗɓe, ɓe ekkitini yimɓe, ɓe ngaazi ɓe Linjiila, wolde Jawmiraawo.

Luural hakkunde Pol bee Barnabas

³⁶ Ɓaawo nyalɗe seɗɗa, Pol wi'i Barnabas: “En loro, en ndaara deerɗiraaɓe haa berniiji haa en ngaazino wolde Jawmiraawo fuu, haa en ndaara no ɓe mba'i.”

³⁷ Barnabas yiɗi Yuhanna bi'eteeɗo Markus yahda bee maɓɓe,

³⁸ ammaa Pol jaɓaay, ngam Markus senndirino bee maɓɓe diga Pamfiliya, accino kuugal, hawtanaayno ɓe fahin.

³⁹ Luural waɗi hakkunde maɓɓe, haa ɓe cenndiri. Barnabas hoo'i Markus, ɓe nasti koommbowal, ɓe njehi Kiprus.

⁴⁰ Pol boo suɓi Silas, ɓe ndilli. Deerɗiraaɓe kalfini ɓe haa mo'ere Allah.

⁴¹ Pol yehi nder lesdi Siriya e Silikiya, o semmbiɗini jama'aaje nuɗɗinɓe.