Kuuɗe Nelaaɓe 14 - Fulfulde Bible

Nelaaɓe ngaazi nder wuro Ikoniya

¹ Ɓaawo maajum Pol e Barnabas njehi Ikoniya, ɓe nasti suudu dewal Yahuudu'en, ɓe ngaazi. Yahuudu'en e yimɓe ummaatooje goɗɗe ɗuuɗɓe nuɗɗini.

² Ammaa Yahuudu'en saliiɓe nuɗɗingo, ummini ɓerɗe yimɓe ummaatooje goɗɗe, haa ɓe nganya nuɗɗinɓe.

³ Nelaaɓe ɓe'e paɓɓi ton. Ɓe mbolwi haala Jawmiraawo bee dartaare. Jawmiraawo boo gooŋgɗini waazu mo'ere muuɗum bee hokkugo ɓe baawɗe waɗugo alaamaaji e kaayeefiiji.

⁴ Yimɓe wuro cenndi geɓe ɗiɗi dow haala ka'a, woɗɓe tokki Yahuudu'en, woɗɓe boo tokki nelaaɓe.

⁵ Yimɓe ummaatooje goɗɗe bee Yahuudu'en e mawɓe muuɗum'en fuu mbaɗi anniya torrugo nelaaɓe bee fiɗugo ɓe bee kaa'e.

⁶ Nde nelaaɓe nani ɗum, ɓe ndoggi ɓe ndilli haa Listira e Derbe, gure haa lesdi Likoniya e haa gure taariiɗe Ikoniya.

⁷ Ton boo ɓe ngaazi Linjiila.

Nelaaɓe ngaazi nder Listira e Derbe

⁸ Haa Listira woodi goɗɗo mo kosɗe mum jiijiiɗe. O boosɗo diga danyeeki maako, o meeɗaay yahugo.

⁹ O nani waazu Pol. Nde Pol suti mo, o faami goɗɗo man woodi nuɗɗinki ngam haa o yamɗitine,

¹⁰ o towni sawtu, o wi'i: “Umma, dara dow kosɗe ma!” Goɗɗo man hafti, o fuɗɗi yahugo.

¹¹ Nde mooɓe ngi'i ko Pol waɗi, ɓe puɗɗi hoolugo bee wolde likoniire, ɓe mbi'i: “Ɗowanteeɓe nannduɓe bee yimɓe njippake haa meeɗen!”

¹² Barnabas, ɓe ewni ɗum Zes, Pol boo, ɓe ewni ɗum Hermes ngam kaŋko woni hunndukoojo maɓɓe.

¹³ Limanjo Zes mo suudu diina mum ɗonno yaasi wuro, waddi ga'i jaagnaaɗi bee pinndi bamaaɗi haa dammuɗe wuro. Kaŋko bee mooɓe fuu ngiɗi lii'anaago nelaaɓe kirseteeŋga.

¹⁴ Nde Barnabas e Pol nani ɗum, ɓe ceeki limce maɓɓe, ɓe njawɗi, ɓe njehi caka mooɓre, ɓe towni sawtu, ɓe mbi'i:

¹⁵ “Onon worɓe, koni mbaɗoton ɗum? Minin boo min yimɓe bana mon! Min ngari haa ɗo ngam min ngaazina on Linjiila, haa on acca kuuje meereeje ɗe'e, on nuɗɗina Allah geeto, tagɗo asama e lesdi e mbeela e ko woni nder maajum fuu.

¹⁶ Naane o accino ummaatooje fuu tokko laabi muuɗum'en.

¹⁷ Koo non fuu o ɗon waŋginira hoore maako bee kuuɗe booɗɗe. O ɗon toɓnana on iyeende diga asama, o ɗon waɗana on ƴaamnde, o ɗon ɗuuɗɗina nyaamdu mon e hayru mon.”

¹⁸ Ammaa koo nde ɓe mbolwi bolle ɗe'e boo, bee daker ɓe kaɗiri mooɓre lii'anango ɓe kirseteeŋga.

¹⁹ Yahuudu'en woɗɓe ngari diga wuro Antakiya nder lesdi Pisidiya e wuro Ikoniya. Ɓe ummini mooɓe, haa ɓe piɗi Pol bee kaa'e, ɓe ndasi mo yaasi wuro, ɓe tammi o maayi.

²⁰ Ammaa nde pukara'en njehi, taari mo, o ummi, o lori wuro. Jaŋngo man o dillidi bee Barnabas haa Derbe.

Pol e Barnabas lori Antakiya nder Siriya

²¹ Pol e Barnabas ngaazi Linjiila haa Derbe haa ɗuuɗɓe njaɓi tokkaago Yeesu. Nden ɓe lorti haa Listira e Ikoniya e Antakiya nder Pisidiya.

²² Ɓe tiɗɗini nuɗɗinɓe, ɓe cemmbiɗini ɓe haa ɓe tabita nder nuɗɗinki. Nden ɓe mbi'i: “Sey bee boneeji ɗuuɗɗi en nastirta laamu Allah.”

²³ Haa jama'aaje nuɗɗinɓe fuu ɓe cuɓani ɓe ndotti'en. Ɓe mbaɗi do'a, ɓe cuumi, ɓe kalfini ɓe haa Jawmiraawo mo ɓe nuɗɗini.

²⁴ Nde ɓe caali Pisidiya, ɓe njotti Pamfiliya.

²⁵ Ɓe ngaazini wolde Allah haa Perge, nden ɓe njehi Attaliya.

²⁶ Diga ton ɓe nasti koommbowal, ɓe lorti haa Antakiya. Haa wuro ngo ɓe kalfinano mo'ere Allah ngam huuwugo kuugal ngal ɓe kuuwi.

²⁷ Nde ɓe njotti Antakiya, ɓe mooɓti jama'aare nuɗɗinɓe, ɓe ngecci ɓe ko Allah waɗi bee juuɗe maɓɓe, no Allah maɓɓitiri laawol ngam haa ummaatooje goɗɗe nuɗɗina Yeesu.

²⁸ Ɓe paɓɓi haa ton bee nuɗɗinɓe balɗe ɗuuɗɗe.