Kuuɗe Nelaaɓe 12 - Fulfulde Bible

Torra nuɗɗinɓe tulliti

¹ Yaake man laamiiɗo Hirudus fuɗɗi torrugo yimɓe woɗɓe nder jama'aare nuɗɗinɓe.

² O mbari Yaakuba, deerɗiraawo Yuhanna bee kaafahi.

³ Nde o yi'i ɗum fottani Yahuudu'en, o waɗi anniya naŋngugo Piyer boo. Ɗum waɗi nder nyalɗe juulde tamseeje ɗe ufnaaka.

⁴ Nde o naŋngi mo, o maɓɓi mo nder fursina. O umri geɓe sooje'en nayi ayna mo, yeɓre fuu mari sooje'en nayo. Hirudus waɗi anniya hiitaago mo yeeso yimɓe fuu ɓaawo juulde Paska.

⁵ Nii non ɓe ayniri Piyer nder fursina, ammaa jama'aare nuɗɗinɓe ɗon toro Allah ngam maako bee tiinaare.

Malaa'ikaajo wurtini Piyer saare fursina

⁶ Hirudus annini hiitaago mo jaŋngo. Jemmaare man Piyer ɗon ɗaani caka sooje'en ɗiɗo. Ɓe kaɓɓi mo bee callalluuji ɗiɗi, sooje'en boo ɗon ayna haa dammuɗe saare fursina.

⁷ Ndaa, malaa'ikaajo Allah wari, annoora yayni nder suudu. Malaa'ikaajo dimmbi Piyer, findini mo, wi'i mo: “Umma law!” Ɗon nii callalluuji piisti haa juuɗe maako, njani.

⁸ Nden malaa'ikaajo wi'i: “Taada, faɗɗa paɗe ma.” Piyer waɗi non, nden malaa'ikaajo wi'i mo: “Moja mojaare ma, tokkam.”

⁹ Piyer tokki mo haa ɓe ngurti saare fursina. Ammaa o numaay nii ko malaa'ikaajo ɗonno waɗa ɗon laato bee gooŋga, o tammi ɗum koyɗol.

¹⁰ Ɓe caali yeɓre sooje'en aynooɓe arannde, ɓe caali boo yeɓre ɗiɗawre, nden ɓe njotti dammugal njamndi fursina tiitiiŋgal berniwol. Parewal maɓɓiti feere muuɗum. Ɓe ngurti, ɓe tokki laawol, ɗon nii malaa'ikaajo go dilli, acci Piyer haa ton.

¹¹ Nde Piyer heɓti hakkiilo muuɗum, o wi'i: “Jonta mi annditi fakat Jawmiraawo neli malaa'ikaajo muuɗum, hisni yam juŋngo Hirudus e ɗum ko yimɓe Yahuudu'en anninino waɗugo yam fuu.”

¹² Nde o faami ko waɗi, o yehi haa saare Mariyama, daada Yuhanna coometeeɗo Markus. Yimɓe ɗuuɗɓe ɗon kawti ton, ɓe ɗon mbaɗa do'a.

¹³ Piyer tappi parewal haa yolnde. Derkeejo debbo bi'eteeɗo Rode yehi laarugo ɗum moy.

¹⁴ Nde o annditi daande Piyer, o seyi masin, ammaa o maɓɓitaay parewal, o doggi, o lori haa jooɗiiɓe go, o wi'i: Piyer ɗon dari yaasi.

¹⁵ Ɓe mbi'i mo: “A ginnaaɗo na?” Ammaa o tokki wi'ugo ɓe: “Gooŋga, ɗum kaŋko.” Nden ɓe mbi'i: “Nden kam ɗum malaa'ikaajo maako.”

¹⁶ Piyer tokki tappugo parewal. Nde ɓe maɓɓiti, ɓe ngi'i mo, nden ɓe kayɗini.

¹⁷ O ɓaŋgtani ɓe juŋngo ngam haa ɓe njeeɗo, o tinndini ɓe no Jawmiraawo wurtiniri mo saare fursina. O wi'i: “Ngecce Yaakuba e deerɗiraaɓe woɗɓe haala ka'a.” Nden o dilli nokkuure feere.

¹⁸ Nde weeti, sooje'en cakli masin. Ɓe ɗon mbi'a: “Noy Piyer waɗi?”

¹⁹ Hirudus ɗaɓɓiti mo, ammaa o heɓtaay mo. O dili sooje'en aynooɓe go, nden o umri ɓe mbara ɓe. Ɓaawoɗon Hirudus ummi Yahudiya, dilli Kaysariya, faɓɓoyi ton.

Maayde Hirudus

²⁰ Hirudus tikkani yimɓe Tirus e yimɓe Sidon masin. Ɓe mooɓti, ɓe ngari haa maako. Ɓe aarti narrugo bee Balastus, kaliifaajo waaleteendu laamiiɗo haa o jiŋnga ɓe. Nden ɓe njehi haa Hirudus, ɓe tori mo sulhu, ngam yimɓe maɓɓe ɗon cooda nguure haa lesdi maako.

²¹ Nde nyalaade Hirudus ta'ino waɗi, o ɓorni limce laamu, o jooɗi haa leeso laamu, o wolwani ɓe.

²² Yimɓe kooli, mbi'i: “Ɗum Allah wolwi, naa ɗum neɗɗo!”

²³ Ɗon nii malaa'ikaajo Jawmiraawo fiyi mo ngam o teddinaay Allah. Gilɗi nyaami mo, o maayi.

²⁴ Ammaa wolde Allah tokki yahugo yeeso yeeso.

²⁵ Nde Barnabas e Sol timmini kuugal maɓɓe haa Urusaliima, ɓe kootidi bee Yuhanna coometeeɗo Markus haa Antakiya.