Kuuɗe Nelaaɓe 11 - Fulfulde Bible

Piyer yecci jama'aare nuɗɗinɓe Urusaliima haala Korneliyus

¹ Nelaaɓe e nuɗɗinɓe haa lesdi Yahudiya nani yimɓe ummaatooje goɗɗe boo njaɓi wolde Allah.

² Nde Piyer lori Urusaliima, Yahuudu'en nuɗɗinɓe peli mo,

³ mbi'i: “A nasti ci'e yimɓe ɓe njuulnaaki e a nyaamdi boo bee maɓɓe!”

⁴ Ammaa Piyer yecci ɓe bee tokkindirki ko laati fuu, o wi'i:

⁵ “Mi ɗonno haa Joppe, mi ɗonno waɗa do'a. Nden Allah yi'ni yam kaayeefi, mi yi'i huunde bana godoore mawnde, jogaande haa tolɗi maare nayi fuu, nde jippi diga asama, nde wari kommbi am.

⁶ Mi suti nde booɗɗum, mi yi'i dabbaaji ɗi kosɗe nayi e kuuje ladde e ladooji e colli.

⁷ Nden nanmi sawtu wi'i yam: Piyer! Umma, hirsu, nyaam!

⁸ Ammaa mbi'mi: Aa'a, yaa Jawmiraawo! Karamɗum malla coɓɗum meeɗaay nastugo hunnduko am.

⁹ Fahin sawtu man wi'i: Ko Allah laɓɓini, taa harmin ɗum.

¹⁰ Ɗum waɗi nde tati, nden kuuje man fuu lori haa asama.

¹¹ Wakkati man nden, yimɓe tato njotti saare nde min ngonno. Goɗɗo neli ɓe haa am diga Kaysariya.

¹² Ruuhu wi'i yam mi yahda bee maɓɓe law, taa mi miijo. Nuɗɗinɓe njoweego ɓe'e boo njahdi bee am haa Kaysariya, min fuu min nasti haa saare Korneliyus.

¹³ Korneliyus yecci min no o yi'ri malaa'ikaajo ɗon dari nder saare maako, wi'i mo: Nel goɗɗo haa Joppe ngam ewnoyaago Simon coometeeɗo Piyer.

¹⁴ O wi'ete bolle ɗe kisnete, an e saare ma fuu.

¹⁵ Nde mi fuɗɗi wolwugo, Ruuhu Ceniiɗo jippi dow maɓɓe bana jippori dow meeɗen haa fuɗɗam.

¹⁶ Nden ciftormi ko Jawmiraawo wi'no yam: Yuhanna waɗi baptisma bee ndiyam, ammaa onon on njaɓan baptisma nder Ruuhu Ceniiɗo.

¹⁷ Nde nii Allah hokki ɓe Ruuhu Ceniiɗo bana o hokkirno en ɗum, yaake en nuɗɗini Jawmiraawo men Yeesu Almasiihu, Kadi min mi moy haa mi dartano Allah?”

¹⁸ Nde ɓe nani bolle ɗe'e, ɓe nde'iti, ɓe maŋgti Allah, ɓe mbi'i: “Asee, Allah holli yimɓe ummaatooje goɗɗe boo laawol tuubugo haa ɓe keɓa ngeendam!”

Jama'aare nuɗɗinɓe haa wuro Antakiya

¹⁹ Nuɗɗinɓe caŋkitiiɓe daliila fitina ka waɗi yaake mbareeki Etiyen, njehi haa Finikiya e Kiprus e Antakiya. Walaa mo ɓe ngaazini, sey Yahuudu'en tan.

²⁰ Ammaa nuɗɗinɓe woɗɓe iwɓe haa Kiprus e Sirene ndilli Antakiya, ɓe ngaazi yimɓe wolwanɓe Yunaniŋkeere, ɓe ngecci ɓe Linjiila Jawmiraawo Yeesu.

²¹ Jawmiraawo wondi bee maɓɓe, yimɓe ɗuuɗɓe tuubi, nuɗɗini Jawmiraawo.

²² Nde habaru man yotti jama'aare nuɗɗinɓe haa Urusaliima, ɓe neli Barnabas haa Antakiya.

²³ Nde o yotti, o yi'i no Allah barkiɗiniri yimɓe man, o seyi, o suusɗini ɓe fuu haa ɓe tokko hoolaago Jawmiraawo bee ɓernde woore,

²⁴ ngam Barnabas o goɗɗo booɗɗo, kebbinaaɗo Ruuhu e nuɗɗinki. Yimɓe ɗuuɗɓe nuɗɗini Jawmiraawo.

²⁵ Nden Barnabas yehi wuro Tarsus tefoygo Sol.

²⁶ Nde o tawi mo, o yahri mo haa Antakiya. Ɓe njooɗi ton hitaande woore, ɓe njehi haa kawte jama'aare nuɗɗinɓe, ɓe ekkitini ummaatoore ɗuuɗnde. Haa Antakiya, nuɗɗinɓe aarti wi'eego Masiihiŋke'en.

²⁷ Yaake man annabi'en woɗɓe ummi Urusaliima, njehi Antakiya.

²⁸ Gooto maɓɓe, bi'eteeɗo Agabus, dari caka yimɓe. Bee baawɗe Ruuhu Ceniiɗo o wi'i weelo saatuŋgo tammi waɗugo haa duniyaaru fuu. Ɗum waɗi boo nder zamanu laamiiɗo Kalawdiyus.

²⁹ Pukara'en mbaɗi anniya, koo moy maɓɓe nelda ko o waawi ngam wallugo nuɗɗinɓe wonɓe lesdi Yahudiya.

³⁰ Ɓe mbaɗi non. Ɓe neldi Barnabas e Sol bee dokke man, ɓe njahrani ɗe ndotti'en jama'aare nuɗɗinɓe.