Kuuɗe Nelaaɓe 10 - Fulfulde Bible

Piyer waazi Korneliyus

¹ Woodi goɗɗo haa Kaysariya, innde muuɗum Korneliyus: O ardiiɗo dow yeɓre sooje'en Roma teemerre wi'eteende Yeɓre Italiya.

² O kulɗo Allah, kaŋko bee saare maako fuu, ɓe ɗon ndewa Allah. Tum o ɗon walla ummaatoore, o waɗa sadaka, o ɗon toro Allah tum.

³ Nyannde feere deydey njamndi tati, o yi'i bee baŋguɗum nder wahayu, malaa'ikaajo Allah nasti saare maako, ewni mo: “Korneliyus!”

⁴ O suti malaa'ikaajo man, o hultori, o wi'i: “Ko waɗi, jawmam?” Malaa'ikaajo jaabi: “Allah nani tornde ma, o yerdi sadaka ma.

⁵ Jonta nel nelaaɓe haa Joppe haa ɓe ewnoya Simon coometeeɗo Piyer.

⁶ O ɗon weeri haa Simon, koppoowo lare, saare maako ɗon kommbi mbeela.”

⁷ Nde malaa'ikaajo go dilli, Korneliyus ewni ɗiɗo haa suka'en mum, bee soojeejo gooto ɓadiiɗo mo, kulɗo Allah.

⁸ Korneliyus limtani ɓe haala ka'a fuu, nden o neli ɓe haa Joppe.

⁹ Jaŋngo man, deydey caka nyalawma, yaake nelaaɓe go ɗonno haa laawol, ɓe ɓadino yottaago Joppe, Piyer wa'i dow soorowol ngam waɗugo do'a.

¹⁰ O maati dolo, o yiɗi nyaamugo. Ammaa nde ɓe ɗon ndefana mo nyaamdu, Allah yi'ni mo kaayeefi,

¹¹ o yi'i asama maɓɓiti, huunde bana godoore mawnde, jogaande haa tolɗi maare nayi fuu ɗon jippo haa lesdi.

¹² Nder maare woodi dabbaaji marɗi kosɗe nayi e ladooji e colli.

¹³ O nani sawtu, wi'i mo: “Piyer! Umma, hirsu, nyaam!”

¹⁴ Ammaa Piyer wi'i: “Aa'a, yaa Jawmiraawo, mi meeɗaay nyaamugo karamɗum malla coɓɗum.”

¹⁵ O nani sawtu go fahin, wi'i mo: “Ko Allah laɓɓini, taa harmin ɗum.”

¹⁶ Ɗum waɗi nde tati, ɓaawoɗon huunde man wiftaama haa asama.

¹⁷ Piyer sakli, faamaay ko wahayu man yiɗi wi'go. Wakkati man nelaaɓe Korneliyus keɓti saare Simon, ɓe ɗon ndari haa yolnde.

¹⁸ Ɓe towni sawtu, ɓe ƴami: “Simon coometeeɗo Piyer ɗon weeri haa ɗo na?”

¹⁹ Piyer ɗonno numa dow wahayu go. Ɗon nii Ruuhu Allah wi'i mo: “Ndaa, yimɓe tato ɗon ɗaɓɓite.

²⁰ Umma, jippa, dillidu bee maɓɓe bilaa miijaago sam, ngam min neli ɓe.”

²¹ Nden Piyer jippi, yehi haa yimɓe man, wi'i ɓe: “Ndaa yam. Min woni mo ɗaɓɓititton. Ko waddi on?”

²² Ɓe njaabi: “Korneliyus, ardiiɗo dow sooje'en teemerre neli min. O adiliijo, kulɗo Allah. Yahuudu'en fuu ceedani mo ɗum. Malaa'ikaajo Allah wi'i mo o ewno ma haa saare maako, ngam haa o nana ko mbi'ata mo.”

²³ Piyer jaɓɓi ɓe, weerni ɓe. Jaŋngo man o ummi, o dillidi bee maɓɓe. Nuɗɗinɓe woɗɓe nder wuro Joppe njahdi bee maɓɓe.

²⁴ Ɓe njotti Kaysariya faɓɓijaŋngo. Korneliyus ɗonno reena ɓe, o ewni banndiraaɓe maako e soobiraaɓe maako hoolaaɓe.

²⁵ Nde Piyer yiɗi nastugo saare, Korneliyus fotti bee maako, tuggi koppi, sujidani mo.

²⁶ Ammaa Piyer ummini mo, wi'i mo: “Dara, min boo mi neɗɗo.”

²⁷ Piyer yeewtidi bee Korneliyus, nden nasti saare. O tawi yimɓe ɗuuɗɓe ɗon mooɓti ton.

²⁸ O wi'i ɓe: “Onon boo on anndi fakat, diina Yahuudu'en haɗi Yahuuduujo ɗakkotirgo bee jananno malla nastugo saare maako. Ammaa Allah holli yam taa mi laara koo moy karamɗo malla o coɓɗo.

²⁹ Ngam maajum, mi jaɓi ewnaandu maaɗa bilaa waabaago. Ammaa jonta mi yiɗi anndugo daliila ewnaandu mon.”

³⁰ Korneliyus jaabi: “Waɗi balɗe tati, bana wakkatiire nde'e, mi ɗonno waɗa do'a saa'a tati haa suudu am. Saa'i man goɗɗo ɓorniiɗo limce ɗelkanɗe dari yeeso am.

³¹ O wi'i: Korneliyus, Allah nani do'a ma, o yerdake sadaka ma.

³² Nel goɗɗo haa Joppe ngam ewnoygo Simon coometeeɗo Piyer. O ɗon weeri haa saare Simon, koppoowo lare, gonɗo kommbi mbeela.

³³ Ngam maajum mi neli goɗɗo haa ma law, an boo a yerdake, a wari. Jonta min fuu min kawti yeeso Allah, haa min nana ko Jawmiraawo umri ma wolwugo fuu.”

Waazu Piyer

³⁴ Piyer fuɗɗi wolwugo, wi'i: “Jonta mi faami fakat, Allah senndindirtaa yimɓe.

³⁵ Kulɗo mo, kuuwanɗo kuuɗe adiliije fuu, fottanan mo, koo o goɗɗo asŋgol ngole fuu.

³⁶ Allah neldi Isra'iila'en wolde mum, waazini ɓe Linjiila ngaddanka salaaman bee Yeesu Almasiihu, Jawmiraawo yimɓe fuu.

³⁷ Onon on anndi ko saali haa Yahudiya fuu, ɗum fuɗɗi haa Galiili ɓaawo baptisma ka Yuhanna waazi.

³⁸ On anndi habaru Yeesu mo Nasaratu, no Allah moytiri mo Ruuhu Ceniiɗo, no o hokkiri mo baawɗe. O yehi koo toy, o huuwi kuuɗe booɗɗe, o yamɗitini torraaɓe Iblisa fuu, ngam Allah ɗon wondi bee maako.

³⁹ Minin min seedooɓe ko o waɗi nder lesdi Yahuudu'en e nder Urusaliima. Ɓe mbari mo bee ɓilugo mo dow leggal.

⁴⁰ Ammaa Allah ummitini mo diga maayde nyalaade tataɓre, waŋgini mo haa amin.

⁴¹ O waŋganaay yimɓe fuu, sey minin laatiiɓe seedooɓe ɓe Allah aarti suɓugo. Ɓaawo Allah ummitini mo diga maayde, min nyaamdi, min njardi bee maako.

⁴² O umri min min ngaazina ummaatoore, min ceedo kaŋko woni mo Allah darni ngam hiitaago yeeɗɓe e maayɓe.

⁴³ Annabi'en fuu ceedi haala ka'a, ɓe mbi'i: Koo moy nuɗɗini mo, heɓan yaafuye hakkeeji muuɗum barka innde maako.”

Ummaatooje keɓi Ruuhu Ceniiɗo

⁴⁴ Yaake Piyer ɗon wolwa bolle ɗe'e tawon, Ruuhu Ceniiɗo jippi dow nanooɓe waazu fuu.

⁴⁵ Yahuudu'en nuɗɗinɓe warduɓe bee Piyer kayɗini ngam koo yimɓe ummaatooje boo, Allah waanji ɓe Ruuhu Ceniiɗo!

⁴⁶ Ngam ɓe nani ɓe ɗon mbolwa bee ɗemɗe goɗɗe, ɓe ɗon maŋgta maŋngu Allah. Piyer wi'i:

⁴⁷ “Yimɓe ɓe'e boo keɓi Ruuhu Ceniiɗo bana no en keɓri ɗum. Moy haɗata ɓe jaɓugo baptisma bee ndiyam?”

⁴⁸ Nden o umri ɓe mbaɗana ɓe baptisma bee innde Yeesu Almasiihu. Ɓe tori mo o faɓɓa bee maɓɓe balɗe seɗɗa.