Jabuura 99 - Fulfulde Bible

Maŋgte Jawmiraawo laamiiɗo ceniiɗo

¹ Jawmiraawo woni laamiiɗo, ummaatooje ɗon ndiwna. O ɗon jooɗi haa dow keruba'en, lesdi ɗon dimmbo.

² Jawmiraawo woni mawɗo nder Siyona, o Ɓaŋiiɗo dow ummaatooje fuu.

³ Sey ɗe fuu ɗe maŋgta innde maako mawnde, hulniinde, o Ceniiɗo!

⁴ Yaa Laamiiɗo baawɗo, a yiɗi ko fotti, an tabitini kiita ndarnuka, an waɗani danygol Yaakubu kiita gooŋɗuka e adiliiha.

⁵ Maŋgte Jawmiraawo Allah men, cujide yeeso leeso laamu maako, o Ceniiɗo!

⁶ Muusa e Haruna laatino boo liman'en maako, Samuyila wonno gooto nder torotooɓe mo. Ɓe tori Jawmiraawo, o jaabi ɓe.

⁷ O wolwani ɓe nder ruulde nanndunde bee daŋraŋgal, ɓe ɗowtani seedamkuuji maako e farillaaji ɗi o hokki ɓe.

⁸ Yaa Jawmiraawo Allah amin, a jaabi ɓe. A laatani ɓe Allah jaafoowo, ammaa a waati kuuɗe maɓɓe kalluɗe.

⁹ Maŋgte Jawmiraawo Allah men, cujide haa hooseere maako seniinde. Ngam Jawmiraawo Allah men o Ceniiɗo.