Jabuura 98 - Fulfulde Bible

Ceye, Jawmiraawo ɗon wara hiitanaago duniyaaru

¹ Yimre. Ngimane Jawmiraawo yimre hesre, ngam o waɗi kaayeefiiji. Juŋngo maako seniiŋgo mari baawɗe, waɗani mo jaalorgal.

² Jawmiraawo anndini kisndam mum, waŋgini adilaaku mum yeeso ummaatooje fuu.

³ O yejjitaay mbooɗeeŋga maako e hoolaare maako heedi yimɓe Isra'iila. Haa keerol duniyaaru fuu, yimɓe ngi'i kisndam Allah meeɗen.

⁴ Ceyore Jawmiraawo, onon yimɓe duniyaaru fuu, ngimane mo bee seyo e welwelo.

⁵ Ngimane Jawmiraawo bee moolooji, bee moolooji e kuuje gimruɗe.

⁶ Ngimane Jawmiraawo, Laamiiɗo mon, bee hoolo luwe e algaytaaji.

⁷ Mbeela e ko woni nder maaga fuu koola, non boo duniyaaru e ko woni nder maaru.

⁸ Maaje kella juuɗe, kooseeje fuu mbelmbelta

⁹ yeeso Jawmiraawo. Ngam o ɗon wara hiitanaago duniyaaru, O hiitoto yimɓe duniyaaru bee kiita adiliiha e ummaatooje kiita ndarnuka.