Jabuura 97 - Fulfulde Bible

Ceyore Jawmiraawo, adiliijo, laamiiɗo dow lesdi fuu

¹ Jawmiraawo woni laamiiɗo. Sey lesdi welwelta, duuɗe mbeela fuu ceyo.

² Duule e nyiɓre ɗon taari mo, o tabitini leeso laamu maako dow adilaaku e kiita ngooŋɗuka.

³ Yiite ɗon ardo mo, ɗon wula konne'en taariiɓe mo.

⁴ Ma'e maako ɗon yaynana duniyaaru, lesdi ɗon yi'a ɗum, ɗon diwna.

⁵ Kooseeje ɗon ɓolwa yeeso Jawmiraawo bana taari, yeeso Jawmu duniyaaru fuu.

⁶ Asamanji ɗon ngeyna adilaaku maako, ummaatooje fuu ɗon ngi'a tedduŋgal maako.

⁷ Rewooɓe labbi, mantortooɓe ɗi fuu, ɗon cemta, ɗowanteeɓe maɓɓe fuu ɗon cujidana mo.

⁸ Ammaa yimɓe Siyona nani, ɓe ɗon ngima bee welwelo, gure Yahuuda ɗon ceyo ngam daliila kiitaaji ma, yaa Jawmiraawo.

⁹ An woni Ɓaŋiiɗo dow duniyaaru fuu, yaa Jawmiraawo, a ɓurdi ɗowanteeɓe fuu maŋngu.

¹⁰ Nganye halleende, onon yiɗɓe Jawmiraawo! O ɗon ayna yoŋkiiji hoolaaɓe maako, o hisnan ɓe juuɗe halluɓe.

¹¹ Annoora ɗon yaynana adili'en, seyo laatanto gooŋɗa-ɓerɗe'en.

¹² Ceyore Jawmiraawo, onon adili'en, maŋgte innde maako seniinde!