Jabuura 93 - Fulfulde Bible

Jawmiraawo woni laamiiɗo duumiiɗo

¹ Jawmiraawo woni laamiiɗo. O ɗon ɓorni maŋngu. Jawmiraawo ɓornake ngu, ɗon moji baawɗe. Duniyaaru tabiti, dimmbataako.

² Leeso laamu ma ɗon tabiti diga fuɗɗam, diga ɓooyma, a ɗon.

³ Maaje mawɗe ɓaŋgti sawtu, yaa Jawmiraawo, ɗe ɓaŋgti sawtu, ɗe kooli.

⁴ Ammaa maŋngu Jawmiraawo Ɓaŋiiɗo ɓuri sawtu ndiyamji ɗuuɗɗi e hoolo ƴuuge mbeela ƴaggiiɗe.

⁵ Yaa Jawmiraawo, seedamkuuji ma ɗi koolniiɗi masin, senaare fottani suudu ma haa foroy.