Jabuura 92 - Fulfulde Bible

Ɗum booɗɗum maŋgtugo Allah gooŋɗuɗo

¹ Yimre ngam nyannde siwtorde.

² Ndaa ko fotti: Yettugo Jawmiraawo, e yimndugo innde maaɗa, an Ɓaŋiiɗo,

³ anndingo mbooɗeeŋga ma fajiri e gooŋgaaku ma jemma fuu,

⁴ bee hoodu marndu ɓoggi sappo e moolooru, bee gimol geegiiru.

⁵ Ngam a seyni yam bee kuuɗe ma, yaa Jawmiraawo, mi ɗon yima bee seyo ngam daliila kuuɗe ma.

⁶ Kuuɗe ma, yaa Jawmiraawo, ɗe mawɗe, numooji ma ɗi lugguɗi masin.

⁷ Humakiijo heɓtataa ɗum, paataaɗo faamataa ɗum.

⁸ Koo nde halluɓe ɗon puɗa bana geene, waɗooɓe zunuuba fuu boo ɗon keɓa saa'a, ɓe nattinteeɓe haa foroy.

⁹ Jawmiraawo, an a Ɓaŋiiɗo haa foroy.

¹⁰ Ngam konne'en maaɗa, yaa Jawmiraawo, fakat konne'en ma nattan, waɗooɓe zunuuba boo caŋkititto.

¹¹ A semmbiɗini yam bana kalhala bani, a wuji hoore am bee nebbam kesam.

¹² Gite am ceyori do'ere dartantooɓe yam, noppi am nani gookaali halluɓe.

¹³ Gooŋga'en puɗan bana dibinooje, ɓe mawnan bana leɗɗe cemmbiɗɗe haa Libanon.

¹⁴ Ɓe nanndi bee leɗɗe jubaaɗe nder saare Jawmiraawo, mawnanɗe haa dalde haykaliiru Allah men.

¹⁵ Koo nder ndottaaku maɓɓe ɓe keɓan ɓiɓɓe, bana leɗɗe kecce, keewɗe ndiyam,

¹⁶ ngam anndingo yimɓe Jawmiraawo o gooŋɗuɗo, kaŋko woni tapaare hisrude am, mo walaa aybe sam.