Jabuura 9 - Fulfulde Bible

Jawmiraawo woni kiitoowo halluɓe e kisnoowo toskaaɓe

¹ Ngam kaliifaajo gime, fodde daande “mut labben”. Yimre Daawuda.

² Mi yettete, yaa Jawmiraawo, bee ɓernde am fuu! Mi limtan kaayeefiiji ɗi mbaɗɗa fuu!

³ Mi seyorto ma, mi welweltan, mi yimndete, an Allah Ɓaŋiiɗo!

⁴ Konne'en am fuu loroto ɓaawo, ɓe pergoto, ɓe kalka haa yeeso ma.

⁵ Ngam a waŋgini gooŋga am, a gooŋɗini yam, a ɗon jooɗi dow leeso laamu ma, a kiitoowo adiliijo.

⁶ A furkiti ummaatooje, a nattini halluɓe, a wili inɗe maɓɓe haa abada abadin.

⁷ Konne'en njinni, a nastini ɓe nder halkere duumiinde, a yibbini berniiji maɓɓe, walaa mo siftorta ɗi.

⁸ Ammaa Jawmiraawo ɗon laamo haa foroy, o tabitini leeso laamu maako ngam kiita.

⁹ O ɗon laamano duniyaaru bee adilaaku, o ɗon hiito ummaatooje kiita ndarnuka.

¹⁰ Jawmiraawo woni hisrude townde ngam toonyaaɓe, o hisnan ɓe wakkatiiji ɓillaare.

¹¹ Annduɓe innde ma ɗon koolo ma, yaa Jawmiraawo, ngam ɓadititɓe ma fuu, a wudintaa ɓe, yaa Jawmiraawo.

¹² Jawmiraawo ɗon jooɗi haa Siyona, ngimane mo yettoore, ngooyne kuuɗe maako mawɗe caka ummaatooje fuu.

¹³ Kaŋko woni baatoowo ƴiiƴam toonyaaɓe, o ɗon siftora ɓe, o yejjitittaa gookaali toskaaɓe.

¹⁴ Hinnam, yaa Jawmiraawo! Laar suno ngo wanyɓe yam ukkani yam! Mi yottake dammugal joonde maayɓe, hisnam,

¹⁵ ngam haa mi daro haa dammuɗe Urusaliima, mi yecca daliila maŋgtooje am fuu, mi ɗon bee seyo ngam a hisni yam.

¹⁶ Yimɓe ummaatooje heefeerɓe ngasi ngaska, ammaa ɓe ndo'i nder maaka. Ɓe tuufni tuuforgol, ɓe nyukkini ngol, ammaa ngol naŋngi kosɗe maɓɓe.

¹⁷ Jawmiraawo waŋgini hoore mum, waɗi kiita, halluɓe naŋngaama nder dabareeji muuɗum'en kalluɗi.

¹⁸ Sey halluɓe lorto haa joonde maayɓe, heefeerɓe yejjitɓe Allah fuu loroto ton.

¹⁹ Ammaa laafuɗo yejjitittaake haa foroy, tammunde toonyaaɓe majjataa haa foroy.

²⁰ Umma, yaa Jawmiraawo! Taa neɗɗo heɓa jaalorgal! Sey yimɓe ummaatooje kiite haa yeeso ma.

²¹ Hulnu ɓe, yaa Jawmiraawo, haa ɓe anndita ɓe ɓiɓɓe Adaama tan.