Jabuura 89 - Fulfulde Bible

Tornde ngam haa Jawmiraawo siftora Alkawal muuɗum

¹ Yimre Etan Esrahiijo ekkitinoore.

² Yaa Jawmiraawo, mi maŋgtete ngam kuuɗe ma booɗɗe haa foroy, mi anndinan yimɓe gooŋgaaku ma diga yidere haa yidere.

³ Mi anndi mbooɗeeŋga ma tabitan haa foroy, gooŋgaaku ma tabiti haa asama.

⁴ A wi'i: “Mi haɓɓi alkawal bee cuɓaaɗo am, mi hunani jaggiiɗo am Daawuda,

⁵ mi tabitinan danygol maako haa foroy, non boo leeso laamu maako diga yidere haa yidere.”

⁶ Sey asamanji maŋgta kaayeefiiji ma, yaa Jawmiraawo, mooɓorde seniiɓe maŋgta gooŋgaaku ma.

⁷ Walaa koo gooto nder asama nanndi bee ma, walaa ɗowanteeɗo foti bee maaɗa.

⁸ An woni kuleteeɗo masin nder dawriinde seniiɓe, a ɓurdi taariiɓe ma fuu baawɗe kulniiɗe.

⁹ Yaa Allah, Jawmiraawo honooɓe asama, a baawɗo, walaa mo nanndi bee ma, kuuɗe ma fuu ɗe gooŋɗuɗe.

¹⁰ An waawtata mawnitaare mbeela, to ƴuuge maaga ummake, a de'itinan ɗe.

¹¹ A mbari kuuŋga mbi'eteeŋga Rahab bee koyɗum bana nga mbaatnooŋga, a saŋkiti konne'en ma bee juŋngo ma semmbiɗŋgo.

¹² An mari asama bee lesdi fuu, an tagi duniyaaru e ko woni nder maaru.

¹³ An tagi woyla e fombina, kooseeje Hermoon e Taboora ɗon ngimane bee seyo.

¹⁴ An mari baawɗe e semmbe, juŋngo ma nyaamo jaaloto.

¹⁵ Leeso laamu ma tabiti dow kiita adiliiha e ngooŋɗuka, mbooɗeeŋga e gooŋgaaku ɗon yeeso ma.

¹⁶ Barka laatanto yimananɓe ma bee welwelo, mbooɗeeŋga ma laatoto jayŋgol dow laawol maɓɓe.

¹⁷ Ngam daliila innde ma ɓe ceyoto nyalaade fuu, ɓe ɗon njuroro adilaaku maaɗa.

¹⁸ Baawɗe ma ɗon hokka min tedduŋgal, yerduye ma ɗon hokka min jaalorgal,

¹⁹ ngam an suɓi laamiiɗo laatiiɗo wawarde amin, yaa Ceniiɗo Isra'iila, an hokki min laamiiɗo oo.

²⁰ Ɓooyma a wolwani hoolaaɓe ma bee wahayu, a wi'i: “Mi walli cemmbiɗɗo, mi ɓaŋgti derkeejo caka ummaatoore.

²¹ Mi suɓi jaggiiɗo am Daawuda, mi moyti mo bee nebbam am ceniiɗam.

²² Juŋngo am ɗon jogi mo foroy, baawɗe am ɗon cemmbiɗina mo.

²³ Konne'en maako njuhataa mo, halluɓe keɓataa ɓillugo mo.

²⁴ O laaran no mi namirta konne'en maako, mi mbaran wanyɓe mo.

²⁵ Gooŋgaaku am e mbooɗeeŋga am wondan bee maako, mi hokkan mo jaalorgal bee innde am.

²⁶ Mi laaminan mo diga Mbeela haa yotto maaje Tigiris e Efratis.

²⁷ Kaŋko o wi'atam: An woni baaba am, a Allah am, tapaare am hisnoore.

²⁸ Min boo mi waɗan mo afo am, ɓuranɗo laamiiɓe duniyaaru fuu.

²⁹ Foroy mi woonanan mo, alkawal am bee maako tabiti.

³⁰ Mi tabitinan danygol maako haa foroy, laamu maako duumoto bana asama.

³¹ Ammaa to yimɓe danygol maako acci tawreeta am, to ɓe tokkaaki kiitaaji am,

³² to ɓe tuurtani farillaaji am, to ɓe ɗowtanaaki umrooje am,

³³ nden kam mi hiitoto tuurtolji maɓɓe bee sawru, mi ɓoccan ɓe ngam aybeeji maɓɓe.

³⁴ Ammaa mi accataa woonango Daawuda, mi ittantaa mo gooŋgaaku am.

³⁵ Mi fiistataa alkawal am bee maako, mi waylataa koŋngol am.

³⁶ Nde woore kunoriimi innde am seniinde: Mi fewataa Daawuda sam!

³⁷ Danygol maako jinnataa, laamu maako tabiti bana naaŋge,

³⁸ ngu tabiti haa foroy bana lewru, kayru woni ceedoowo koolniiɗo haa asama.”

³⁹ Ammaa jonta, yaa Allah, a ɗon ɓernana laamiiɗo mo moytuɗa masin, a fiɗɗake mo, a wudini mo.

⁴⁰ A yawi alkawal ngal kaɓɓuɗa bee maccuɗo ma, a sakkini meetaleewol maako nder mbulwuldi.

⁴¹ A yibbini mahi maako, a wili cuuɗi maako cemmbiɗɗi.

⁴² Saalotooɓe fuu ɗon ɓofta kuuje maako, heeddiɗɗiraaɓe maako fuu ɗon kuɗa mo.

⁴³ A hokki konne'en maako jaalorgal, a seyni wanyɓe mo fuu.

⁴⁴ A laskini kaafahi maako, a wallitaay mo nder haɓre.

⁴⁵ A itti tedduŋgal maako, a hippi leeso laamu maako.

⁴⁶ A naywini mo law, a suddi mo bee toskaare.

⁴⁷ Yaa Jawmiraawo, ndey accata suuɗaago? Ndey ɓernuki ma accata wulugo bana yiite?

⁴⁸ Yaa Jawmiraawo, siftor no balɗe am ndammiri, a tagi ɓiɓɓe Aadama fuu bana huunde meere.

⁴⁹ Woodi goɗɗo geeto mo meeɗataa maayugo na? Moy hisnata hoore mum diga baawɗe joonde maayde?

⁵⁰ Yaa Jawmiraawo, toy kuuɗe ma ɗe a huuwani min ɓooyma, ɗe kuniiɗa hokkugo Daawuda fodde gooŋgaaku ma?

⁵¹ Yaa Jawmiraawo, siftor toskaare maccuɗo ma, laar no ummaatooje ɗuuɗɗe kuɗirtammi.

⁵² Konne'en ma ɗon kuɗa laamiiɗo mo cuɓɗa, ɓe ɗon kuɗa mo koo toy o yahata fuu.

⁵³ Yettoore laatano Jawmiraawo haa foroy! Aamiina! Aamiina!