Jabuura 87 - Fulfulde Bible

Siyona daada ummaatooje

¹ Yimre ngol ɓiɓɓe Koora. Jawmiraawo jo'ini berniwol mum dow kooseeje ceniiɗe.

² Allah ɓuri yiɗugo Siyona, dow joole yimɓe Yaakubu goɗɗe fuu.

³ An berniwol Allah, heɗita kuuje kaayeefiije ɗe o wi'ante:

⁴ “To mi limi ummaatooje annduɗe yam, mi ɓesdan Misra e Baabila. Filistiya e Tirus e Etiyopiya, diga ton ummaatooje ɗe'e iwi.

⁵ Ammaa Siyona woni daada ummaatooje, min Allah Ɓaŋiiɗo tabitini ngol bee hoore am.”

⁶ Jawmiraawo winndan inɗe ummaatooje fuu: Diga ton ummaatooje ɗe'e iwi.

⁷ Yimooɓe e wamooɓe ɗon mbi'a: Haa maaɗa ceeɓooje am fuu ngoni.