Jabuura 86 - Fulfulde Bible

Tornde hinnuye Allah booɗɗo wakkati toonyaare

¹ Do'aare Daawuda. Heɗitam, yaa Jawmiraawo, jaabam! Ngam mi laafuɗo, mi ɓilliiɗo.

² Aynu yoŋki am ngam mi koolaaɗo, hisnu maccuɗo ma kooliiɗo ma.

³ Hinnam, yaa Jawmiraawo, ngam mi ɗon toro ma nyalaade fuu!

⁴ Seynu maccuɗo ma, yaa Jawmiraawo, mi halfitini ma yoŋki am.

⁵ Yaa Jawmiraawo, a booɗɗo, a jaafoowo. Koo moy tori ma, a waŋginanan ɗum mbooɗeeŋga ma ɗuuɗŋga.

⁶ Yaa Jawmiraawo, heɗita do'aare am, hakkilan tornde am.

⁷ Mi toroto ma nder wakkati ɓillaare, ngam mi anndi a jaaboto yam.

⁸ Walaa ɗowanteeɗo nanndi bee maaɗa, yaa Jawmiraawo, walaa baawanɗo huuwugo kuuɗe ɗe kuuwata.

⁹ Ummaatooje ɗe tagɗa fuu, ngaran sujidango ma, teddinan innde ma, yaa Jawmiraawo.

¹⁰ Ngam a mawɗo, a baɗoowo kaayeefiiji, an feere ma woni Allah.

¹¹ Sappinam laawol ma, yaa Jawmiraawo, ngam mi tokko gooŋga ma, hokkam ɓernde laaɓnde, haa mi hula innde ma.

¹² Yaa Jawmiraawo Allah am, mi maŋgtete bee ɓernde am fuu, mi teddinan innde ma haa foroy!

¹³ Mbooɗeeŋga ma ɗuuɗani yam masin, a hisni yoŋki am diga luggeeŋga joonde maayɓe.

¹⁴ Yaa Allah, mawnitiiɓe ummanake yam, mooɓre toonyooɓe yiɗi halkugo yam, walaa ko yaali ɓe bee maaɗa.

¹⁵ Ammaa an, yaa Jawmiraawo, a Allah marɗo enɗam e hinnuye, mo tikkataa law, mo mbooɗeeŋga mum e gooŋgaaku mum ɗuuɗi.

¹⁶ Waylita haa am, hinnam! Semmbiɗinam, hisnam, min maccuɗo ma, ɓii korɗo ma!

¹⁷ Hokkam alaama mbooɗeeŋga ma, haa wanyɓe yam ngi'a ɗum, cemta, ngam an, yaa Jawmiraawo, a wallatam, a de'itintam.