Jabuura 83 - Fulfulde Bible

Tornde nattinki konne'en Isra'iila

¹ Yimre Asaf.

² Yaa Allah, taa sirwa, taa sukku noppi ma, taa siwta, yaa Allah.

³ Ndaa, konne'en ma ummake, wanyɓe ma ɗon mbaɗa fitina.

⁴ Ɓe ɗon kaɓɓa dabareeji dow ummaatoore ma, ɓe ɗon nufano aynaaɓe ma kalluɗum.

⁵ Ɓe mbi'i: “Ngare, nattinen ɓe, haa ummaatoore Isra'iila majja, innde maare wile.”

⁶ Ɓe carwootiri bee ɓernde woore, ɓe kaɓɓi alkawal ngam honugo ma:

⁷ Yimɓe Edoom e Isma'iilu'en, yimɓe Mo'ab e Hagari'en,

⁸ yimɓe Gebal e Ammoon e Amalek, Filisti'en e yimɓe Tirus.

⁹ Assuura'en boo kawti bee maɓɓe, mballiti danygol Ludu.

¹⁰ Waɗ ɓe ko mbaɗnoɗa Mediyan'en e Sisera e Yabin haa maayel Kison.

¹¹ Kamɓe ɓe kalki haa En-Door, ɓalli maɓɓe nyoli, laati koonal.

¹² Waɗ hoore'en maɓɓe ko mbaɗnoɗa Oreb e Ze'eb. Waɗ laamiiɓe maɓɓe bana mbaɗnoɗa Zebaha e Calmunna,

¹³ wi'nooɓe: “Marten maral Allah!”

¹⁴ Yaa Allah, laatin ɓe bana nyaande, bana dumo nder henndu.

¹⁵ Bana yiite wuldata ladde, bana ɗemɗe maage nyaamirta kooseeje,

¹⁶ non riiw ɓe bee henndu ma saatundu, hulnu ɓe bee naargewol ma!

¹⁷ Semtin ɓe, yaa Jawmiraawo, ngam haa ɓe ewno innde ma!

¹⁸ Ɓe cemta, ɓe kultora foroy, ɓe maaya bee toskaare!

¹⁹ Nden kam ɓe anndan an feere ma bi'eteeɗo Jawmiraawo, an woni Ɓaŋiiɗo dow duniyaaru fuu!