Jabuura 81 - Fulfulde Bible

Jawmiraawo yiɗi ummaatoore muuɗum ɗowtano ɗum

¹ Ngam kaliifaajo gime fodde daande “gittit”. Yimre Asaf.

² Ngimane Allah bee seyo, kaŋko woni baawɗe men. Ngimane Allah Yaakubu bee seyo.

³ Ummine gimol, piye bawɗi, piye moolooji e hooduuji.

⁴ Puufe luwal haa juulde lewru hesru, to lewru foti, nyalaade juulde meeɗen.

⁵ Kanjum woni farilla dow Isra'iila, Allah Yaakubu taynori ɗum.

⁶ O tabitinani le'i Yusufu seedamku ngu'u, saa'i o yehi hippaago lesdi Misra. Mi ɗon nana sawtu goɗɗo mo mi anndaa, o wi'i:

⁷ “Mi wakkiti doŋgle balbe mon, juuɗe mon ndimɗi e jogaago silaawo.

⁸ Saa'i on ɓilliiɓe, on ngookani yam, mi hisni on. Mi jaabi on saa'i mi ɗon wiirni nder naargewol, mi foondi on haa seeɓoore ndiyam Meriba.

⁹ Nane, onon yimɓe ummaatoore am, haa mi reentina on, onon Isra'iila'en, keɗite yam.

¹⁰ Taa ɗowanteeɗo jananno tawe caka mooɗon, taa cujidane ɗowanteeɗo jananno.

¹¹ Min woni Jawmiraawo Allah mon, gurtinɗo on lesdi Misra. Maɓɓite kunnduɗe mon, haa mi hebbina ɗe, on kaara.

¹² Ammaa ummaatoore am sali nanango yam, Isra'iila'en njaɓaay ɗowtanaago yam.

¹³ Mi acci ɓe bee caatal ko'e maɓɓe, ɓe mbaɗa ko ɓerɗe maɓɓe nufi fuu.

¹⁴ Asee! To yimɓe Isra'iila nananino yam, to ɓe tokkakeno laawol am,

¹⁵ law mi leestinanno konne'en maɓɓe, mi jaalotono wanyɓe ɓe,

¹⁶ wanyɓe Jawmiraawo fuu tefanno fottango mo bee bolle belɗe, balɗe maɓɓe njuutanno haa foroy,

¹⁷ mi nyaamnanno ɓe alkamaari ɓurndi wooɗugo, mi saftinanno ɓe njumri ladde!”