Jabuura 80 - Fulfulde Bible

Tornde ngam kisndam Isra'iila

¹ Ngam kaliifaajo gime fodde daande “gurguli seedamku”. Yimre Asaf.

² Yaa gaynaako Isra'iila, heɗita, an ɗowoowo yimɓe Yusufu bana tokkere! An jooɗiiɗo dow keruba'en, waŋgu nder daraja ma!

³ Waŋgin baawɗe ma yeeso le'i Efrayim e Benyamin e Manassa! War, hisnu min!

⁴ Lortin min, yaa Allah, woonan min haa min kisa!

⁵ Yaa Allah, Jawmiraawo honooɓe asama, ndey accata tikkango do'aaje ummaatoore ma?

⁶ A yarni min gonɗi ɗuuɗɗi masin, ɗi laatanake min nyaamdu.

⁷ A laatini min daliila jokkirgol caka heeddiɗɗiraaɓe amin, konne'en amin ɗon njanca min!

⁸ Lortin min, yaa Allah honooɓe asama, woonan min haa min kisa!

⁹ A ɗoofi inabohi nder lesdi Misra, a riiwi ummaatooje, a jubi ki nder lesdi maaje.

¹⁰ A feecini ki, ki waɗi ɗaɗi, ki heewi lesdi.

¹¹ Ɗowdi maaki suddi kooseeje, lice maaki cuddi leɗɗe cemmbiɗɗe, maapinndiije.

¹² Ki forti lice maaki gal Mbeela, non boo gal maayo Efratis.

¹³ Ngam ɗume ngibbinɗa mahol taariiŋgol ki? Jonta koo moy caalotooɗo heɓan ɓorugo ɓiɓɓe maaki.

¹⁴ Gaduuji ladde ɗon mbonna ki, kuuje ladde ɗon nyaama ki.

¹⁵ Wartu, yaa Allah honooɓe asama! Laar min diga asama, hakkilan inabohi ma.

¹⁶ Aynu inabohi ki juŋngo ma jubi, leggel keccel ngel mawninɗa booɗɗum.

¹⁷ Konne'en amin nguli ki, ta'i ki. Telɓan ɓe bee ɓernuki, halku ɓe.

¹⁸ Aynu goɗɗo mo cuɓɗa, mo cemmbiɗinɗa, wondu bee maako!

¹⁹ Min meetataa daayaago ma, yeeɗitin min haa min ewno innde ma.

²⁰ Lortin min, yaa Allah, Jawmiraawo honooɓe asama, woonan min haa min kisa!