Jabuura 78 - Fulfulde Bible

Gooŋgaaku Allah dow yimɓe mum tuurtooɓe

¹ Yimre Asaf ekkitinoore. Onon yimɓe am, keɗite ekkitinol am, kakkilane bolle am.

² Haa mi wolwana on bee balndol, mi anndina on annditanamji zamanuuji caaliiɗi.

³ Kaakiraaɓe meeɗen ngecci min ɗum, min nani, min anndi ɗum boo.

⁴ Min cuuɗataa ɗum ɓikkoy amin, ammaa min anndinan yidere warannde, kuuɗe Jawmiraawo mawɗe e baawɗe mum e kaayeefiiji ɗi o waɗi fuu.

⁵ O hokki danygol Yaakubu seedamku, yimɓe Isra'iila keɓi tawreeta maako. O umri kaakiraaɓe men ɓe anndina ka ɓiɓɓe maɓɓe,

⁶ ngam haa ɓiɓɓe danyeteeɓe nder yidere warannde ekkito ka, anndina ka ɓiɓɓe muuɗum'en,

⁷ haa ɓe koolo Allah, ngam taa ɓe ngejjita kuuɗe maako, ammaa ɓe ɗowtano umrooje maako foroy.

⁸ Taa ɓe laato bana kaakiraaɓe maɓɓe yidere tuurtooɓe, luutooɓe Allah. Kamɓe, ɓerɗe maɓɓe tabitaay, ngam ɓe tokkaaki Allah bee gooŋga.

⁹ Yimɓe Efrayim, haɓooɓe bee lagaaje e kuri ndoggi nder nyalaade haɓre.

¹⁰ Ɓe njogaaki alkawal Allah, ɓe cali ɗowtanaago tawreeta maako.

¹¹ Ɓe ngejjiti kuuɗe maako mawɗe e kaayeefiiji maako ɗi o holli ɓe.

¹² O waɗi kaayeefiwol yeeso kaakiraaɓe maɓɓe nder lesdi Misra, nder ladde Co'an.

¹³ O seeki maayo, o eerni ɓe, o darni ndiyamji bana mahol.

¹⁴ Nyalawma o ɗowri ɓe bee ruulde, jemma boo bee jayŋgol yiite.

¹⁵ O seeki tapaaje nder ladde, o yarni ɓe ndiyam ɗuuɗɗam, iwɗam les lesdi.

¹⁶ O wurtini ndiyam diga ceekgol tapaare, o ilni ɗam bana maaje.

¹⁷ Ammaa ɓe tokki waɗugo hakke dow Allah, ɓe tuurtani Ɓaŋiiɗo nder ladde hamaadaare.

¹⁸ Ɓe poondi Allah bee haɓɓere, nde ɓe ƴami nyaamdu fodde suuno maɓɓe.

¹⁹ Ɓe mbolwi kalluka dow Allah, ɓe mbi'i: “Kadi Allah waawan nyaamnugo min nder ladde nde'e na?

²⁰ Gooŋga, o fiyi tapaare haa ndiyam ili bana maayo. Ammaa o waawan hokkugo min tamseeje e heɓango yimɓe maako kusel na?”

²¹ Jawmiraawo nani ɗum, ɓernani ɓe, ukkani danygol Yaakubu tikkere muuɗum saatunde. Ɓernuki maako saati dow yimɓe Isra'iila,

²² ngam ɓe nuɗɗinaay Allah, ɓe koolaaki kisndam maako.

²³ Kaŋko o umri duule haa dow, o maɓɓiti burɗe asama.

²⁴ O toɓni mannu dow maɓɓe ngam nyaamnugo ɓe, o hokki ɓe nyaamdu iwndu diga asama.

²⁵ Ɓe nyaami nyaamdu ndu malaa'ika'en ngaddani ɓe, Allah neldi ɓe ko haarnata ɓe.

²⁶ Nden o ummini henndu fuunaaŋge, bee baawɗe maako o wifni henndu fombina.

²⁷ O jippinani ɓe colli ɗuuɗɗi bana collaaje, bana njaareendi maayo, ngam ɓe nyaama.

²⁸ O do'i ɗi caka saŋngeere maɓɓe, ɗi taari laymaaji maɓɓe fuu.

²⁹ Ɓe nyaami, ɓe kaari masin, o hokki ɓe ko ɓe ngiɗno.

³⁰ Ammaa diga suuno maɓɓe de'itaay tawon, kusel boo ɗon caka nyii'e maɓɓe tawon,

³¹ Allah ɓernani ɓe, mbari semmbiɗɓe maɓɓe, o do'i suka'en Isra'iila suɓaaɓe.

³² Ammaa bee non fuu ɓe tokki waɗugo hakke, ɓe nuɗɗinaay kaayeefiiji Allah.

³³ Ngam maajum o timmini balɗe maɓɓe meere, o timmini duuɓi maɓɓe nder kultoreeŋgol.

³⁴ Ammaa nde o fuɗɗi mbarugo ɓe, ɓe ngayliti heedi maako, ɓe tuubani mo, ɓe ɗakkotiri bee maako.

³⁵ Ɓe ciftori Allah woni tapaare maɓɓe hisnoore, Allah Ɓaŋiiɗo woni coottoowo ɓe.

³⁶ Ammaa ɓe ngiɗi sargugo Allah bee bolle maɓɓe, ɓe ɗon pewa mo.

³⁷ Ɓe ɗakkotiraay bee maako, ɓe kakkilanaay alkawal maako bana ko haani.

³⁸ Ammaa Allah hinni yimɓe muuɗum, yaafi aybeeji maɓɓe, halkaay ɓe. Nde ɗuuɗɗum o naŋgti ɓernuki maako, o yoofaay ɓernuki maako fuu.

³⁹ Ngam o siftori ɓe maayanɓe, ɓe caaloto bana henndu ndu wartataa.

⁴⁰ Ɓe tuurtani mo nder ladde nde ɗuuɗɗum, haa ladde hamaadaare, ɓe ɗuɗɗini laskingo ɓernde maako.

⁴¹ Fahin ɓe poondi mo, ɓe mettini Ceniiɗo Isra'iila.

⁴² Ɓe ciftoraay baawɗe maako nyalaade nde o hisnino ɓe diga konne'en maɓɓe,

⁴³ o waɗno alaamaaji e kaayeefiiji nder lesdi Misra, nder ladde Co'an.

⁴⁴ O wartiri maaje Misra ƴiiƴam, haa Misra'en keɓaay yarugo ndiyam.

⁴⁵ O ukkani ɓe buubi, ɗi ŋati ɓe, o neldi ɓe paaɓi, ɗi ndaami ɓe.

⁴⁶ O yoofi baɓɓatti, ɗi nyaami ƴaamle gese maɓɓe, mbonni nafuuda kuugal maɓɓe.

⁴⁷ O wonni inabooje maɓɓe bee mallimallooje, ibbe maɓɓe boo bee peewol.

⁴⁸ O nattini tokke dabbaaji maɓɓe bee mallimallooje e pelmaali.

⁴⁹ O yoofi dow maɓɓe ɓernuki maako gulanki bana yiite, o ɓilli ɓe, o neldi ɓe yeɓre malaa'ika'en halkooɓe, ɓe torri ɓe.

⁵⁰ O naŋgtaay ɓernuki maako, o hisnaay yoŋkiiji maɓɓe, ammaa o halki ɓe bee nyawu kalluŋgu, ndaaɓoowu.

⁵¹ O mbari ɓiɓɓe afɓe Misra'en, nder ci'e Haamu'en.

⁵² Bana baali o wurtiniri yimɓe maako yaasi, bana tokkere o ɗowri ɓe nder ladde.

⁵³ O yahri ɓe jam, ɓe kultoraay, yaake maayo moɗi konne'en maɓɓe.

⁵⁴ O nastini ɓe lesdi maako ceniindi, o yahri ɓe haa hooseere nde o nyaamno.

⁵⁵ O riiwi ummaatooje yeeso maɓɓe, o yeɗani le'i Isra'iila maral, ɗi njooɗi ton.

⁵⁶ Ammaa ɓe poondi Allah Ɓaŋiiɗo, ɓe tuurtani mo, ɓe kakkilanaay seedamkuuji maako.

⁵⁷ Ɓe tuurtani mo, ɓe zammbi mo bana kaakiraaɓe maɓɓe, ɓe mboofi bana kuri piɗaaɗi bee lagaawal ɓosliiŋgal.

⁵⁸ Ɓe ɓernini mo bee nokkuuje maɓɓe towɗe, ɓe ummini kaajal maako bee labbi maɓɓe.

⁵⁹ Allah laari ɗum, o ɓerni, o wudini Isra'iila.

⁶⁰ O acci joonde maako haa Silo, laymaaru maako ndu o tigguno caka yimɓe.

⁶¹ Sundukru alkawal maako waŋginanndu baawɗe maako e tedduŋgal maako, o acci konne'en njaɓti ndu.

⁶² O hokki ummaatoore maako haa kaafahi konne'en, o ɓernani yimɓe laatiiɓe maral maako.

⁶³ Nder ummaatoore maako, yiite nyaami sukaaɓe suɓaaɓe, faanyɓe nanaay gimol teegal.

⁶⁴ Liman'en maayri bee kaafahi, rewɓe yurumɓe keɓaay woyugo maayɓe muuɗum'en.

⁶⁵ Nden Jawmiraawo fini bana ɗaaniiɗo, bana konoowo mo nguykinoojam hokki ɗum semmbe.

⁶⁶ O lorni konne'en maako ɓaawo, o toskini ɓe haa foroy.

⁶⁷ O wudini danygol Yusufu, o suɓaay lenyol Efrayim.

⁶⁸ Ammaa o suɓi lenyol Yahuuda e hooseere Siyona nde o yiɗi.

⁶⁹ O nyiɓi suudu maako seniindu bana joole haa asama, o tabitini ndu haa foroy bana lesdi.

⁷⁰ O suɓi Daawuda, jaggiiɗo maako, o hooci mo haa waalde tokkere maako,

⁷¹ ngam taa o tokko durugo baali, ammaa o dura danygol Yaakubu ummaatoore maako, waato Isra'iila, maral maako.

⁷² Daawuda duri ɓe bee ɓernde laaɓnde, o ɗowri ɓe bee anndal.