Jabuura 77 - Fulfulde Bible

Ciftorki kuuɗe Allah mawɗe, caaliiɗe

¹ Ngam kaliifaajo gime. Yimre Asaf fodde daande “Yedutuun”.

² Mi wookanan Allah, mi toroto mo bee sawtu ngam o nanammi.

³ Nder wakkati ɓillaare, mi waylititto heedi Jawmiraawo, koo bee jemma mi ɗon ɓaŋgta juuɗe am gal maako bilaa siwtaago, ɓernde am sali de'ititgo.

⁴ To mi siftori Allah, mi uuman. To mi numi, ɓernde am sakloto.

⁵ A ɗon haɗammi ɗaanaago, mi saklake, mi wolwataa sam.

⁶ Mi ɗon numta haala balɗe caaliiɗe, mi ɗon siftora duuɓi ɓooymaaji.

⁷ Mi ɗon waala numtugo gime am, ndaa ko mi ƴamata hoore am:

⁸ “Jawmiraawo wudini min haa foroy na? O meetataa yerdaago min na?

⁹ Mbooɗeeŋga maako dow amin timmi haa foroy na? O acci wolwango min haa abada na?

¹⁰ Allah yejjiti enɗugo min na? Ɓernuki maako haɗi hinnuye maako na?”

¹¹ Nden mbi'mi: “Ndaa ko ɓurata naawugo yam: Ɓaŋiiɗo acci woonango min bana naane!”

¹² Sey mi siftora kuuɗe ma mawɗe, yaa Jawmiraawo, mi siftora kaayeefiiji ɗi kuuwɗa ɓooyma,

¹³ sey mi numta kuuɗe ma fuu, mi numta kuuɗe ma mawɗe.

¹⁴ Yaa Allah, laabi ma ɗi ceniiɗi! Walaa ɗowanteeɗo mawɗo bana maaɗa.

¹⁵ An woni Allah, baɗoowo kaayeefiiji, a waŋgini baawɗe ma caka ummaatooje.

¹⁶ A sootti yimɓe ma bee juŋngo semmbiɗŋgo, a hisni danygol Yaakubu e Yusufu.

¹⁷ Ndiyamji ngi'i ma, yaa Allah, ɗi kultori, ndiyamji lugguɗi ndiwni.

¹⁸ Duule ndufi iyeele, mbaɗi pelmaali, cakkini ma'e.

¹⁹ Felmaaŋgo ma felmi nder duluuru, ma'e ma njaynani duniyaaru fuu, lesdi dimmbi, diwni.

²⁰ A ta'i mbeela e maaje cemmbiɗɗe, ammaa walaa mo yi'i batte ma.

²¹ A ɗowi yimɓe ma bana tokkere bee juuɗe Muusa e Haruna.