Jabuura 76 - Fulfulde Bible

Allah marɗo jaalorgal, o kulniiɗo

¹ Ngam kaliifaajo gime bee moolooji. Yimre Asaf.

² Yimɓe Yahuuda fuu anndi Allah, o mari innde mawnde nder Isra'iila.

³ Suudu maako ɗon nder Saliima, o ɗon jooɗi dow hooseere Siyona.

⁴ Haa ton o yewi kuri konne'en, non boo bawarɗe e kaafaaje e balmi maɓɓe.

⁵ Annoora ma ɗon yayna, yaa Allah, a mawɗo, a kaayeefiijo, saa'i njippiɗa kooseeje, ɓaawo a fiyi konne'en ma.

⁶ A jaɓti keɓal honooɓe maɓɓe semmbiɗɓe, jonta ɓe ɗon ɗaani ɗoyŋgol duumiiŋgol, juuɗe yoora-ɓerɗe'en fuu tampi.

⁷ An a furkiti ɓe, yaa Allah Yaakubu, pucci mbaati, wa'iiɓe ɗi fuu ndo'i, maayi.

⁸ Fakat a kulniiɗo! Moy waawata daraago yeeso ma to a tikki?

⁹ Diga asama a yeeyni kiitaaji ma, duniyaaru hultori, sirwi,

¹⁰ nde umminɗa kiita, ngam mballa yaŋkiniiɓe fuu haa duniyaaru.

¹¹ Koo tikkere yimɓe boo laatoto daliila maŋgtoore ma, hisɓe konu mbaɗante juulde.

¹² Togane Allah Jawmiraawo mon togayeeje e kebbitine ɗe boo, onon ummaatooje taariiɗe mo fuu, ngaddane Allah kulniiɗo dokke mon.

¹³ Allah leestinan mawɓe, o hulnan laamiiɓe duniyaaru.