Jabuura 75 - Fulfulde Bible

Allah leestinan kalluɗo, ɓaŋgtan adiliijo

¹ Ngam kaliifaajo gime fodde daande “Taa wonnu”. Yimre Asaf.

² Min maŋgtete, yaa Allah, min maŋgtete ngam a ɗon ɓadi min, min ɗon anndina yimɓe kaayeefiiji ɗi mbaɗɗa.

³ Allah wi'i: “To wakkati hiitaago am yottake, mi waɗan kiita ngooŋɗuka.

⁴ Koo to duniyaaru dimmbake bee ko woni dow maaru fuu, naa min tabitini caɓɓaaje maaru?

⁵ Mi wi'i mantooɓe taa ɓe manto, halluɓe boo taa ɓe mawnito.

⁶ Mi wi'i ɓe taa ɓe mawnito dow asama, taa ɓe mbolwa bolle elewɗe dow am.”

⁷ Maŋngu iwataa haa fuunaaŋge malla hiirnaaŋge malla woyla malla fombina.

⁸ Sey Allah woni kiitoowo, o leestinan oo, o ɓaŋgtan oya.

⁹ Juŋngo Jawmiraawo ɗon jogi jardugel, ngel heewi inaboojam ƴuufanɗam, nyaaɗɗam. O yarnan ɗam halluɓe nder lesdi fuu, doole ɓe njarda ɗam bee dembere maajam fuu.

¹⁰ Min kam mi accataa wolwugo haala Allah Yaakubu sam, mi accataa yimango mo maŋgtooje.

¹¹ Kaŋko o leestinan halluɓe, ammaa o ɓaŋgtan adili'en.