Jabuura 7 - Fulfulde Bible

Tornde ngam gooŋɗineeki

¹ Yimre boyki nde Daawuda yimi yeeso Jawmiraawo ngam daliila Kuusi Benyaminiijo.

² Yaa Jawmiraawo Allah am, mi nyukkake haa maaɗa, hisnam juuɗe toonyooɓe yam fuu, rimɗinam!

³ To naa non ɓe ceekatam bana mbarooga, ngam walaa kisnoowo yam feere.

⁴ Yaa Jawmiraawo Allah am, to mi waɗi bana ni'i: To zunuuba takkake juuɗe am,

⁵ to mi waɗani soobaajo am halleende, to mi jaɓti huunde konneejo am bilaa daliila,

⁶ nden kam sey konneejo am taasnammi, jokkammi, yaaɓammi bee kosɗe mum, itta daraja am, wallinammi nder mbulwuldi lesdi.

⁷ Yaa Jawmiraawo, umma bee tikkere ma, dartana ɓernuki konne'en am! Fin, wallam, ngam a tabitini kiita ngooŋɗuka.

⁸ Sey mooɓgal ummaatooje fuu taare, an, jooɗa haa joonde ma towtunde dow maaje.

⁹ Yaa Jawmiraawo, hiitu ummaatooje ɗe'e. Gooŋɗinam, yaa Jawmiraawo, ngam mi adiliijo, mi walaa aybe!

¹⁰ Haɗ halleende halluɓe, tabitin adili'en! Ngam an woni Allah adiliijo, a ɗon linya ɓerɗe e anniyaaji lugguɗi.

¹¹ Allah woni wawarde am, o kisnoowo gooŋɗa-ɓerɗe'en.

¹² Allah woni kiitoowo adiliijo, nyalaade fuu o ɗon waŋgina caatal maako.

¹³ Kalluɗo mo tuubaay, o welnan kaafahi maako, o tiran lagaawal maako, o taaskan fiɗugo ɗum,

¹⁴ o taaskitinan balmi maako mbarooji, o tiitinan kuri yiiteeji dow kalluɗo man.

¹⁵ Ndaa, kalluɗo oo reedi bee zunuuba. Halleende hebbini reedu maako, o danyan fewre.

¹⁶ O wasi ngaska, o luggini ka, ammaa kaŋko bee hoore maako do'i nder maaka.

¹⁷ Halleende maako loroto dow hoore maako, aybe maako do'an dow gumbal hoore maako.

¹⁸ Mi yettan Jawmiraawo ngam adilaaku maako, mi yimanan Jawmiraawo Ɓaŋiiɗo maŋgtooje.